Proverbios 24 - Chol: I T’an Dios

¹ Mach a mulʌben i ñuclel jontolo' bʌ. Mach a tsajcañob majlel.

² Come mu' jach i ña'tañob xujch' ti' pusic'al. Mu' jach i subob jontolil.

³ Wen ña'tʌntel yom cha'an mi' wen xuc'tʌl lac chumlib. Xuc'ul mi' yajñel i yotot jini yujil bʌ i melol.

⁴ Wen ña'tʌntel yom cha'an mi la cotsʌben i bʌl la cotot ti pejtelel chuqui tac yom lac pusic'al letsem tac bʌ i tojol.

⁵ Añʌch i p'ʌtʌlel jini p'ip' bʌ i pusic'al. Ñumen an i p'ʌtʌlel jini cabʌl bʌ i pusic'al bajche' soldado p'ʌtʌl bʌ i bʌc'tal.

⁶ Yom p'ip' i pusic'al mu' bʌ i cha'len guerra. Mi' mʌjlel i cha'an jini am bʌ cabʌl i yaj toj'esayajob ti' t'ejl.

⁷ Mach i tajayic cabʌl i pusic'al jini tonto bʌ. Ma'anic i c'ʌjñibal ti meloñibʌl.

⁸ Jini mu' bʌ i wʌn ña'tan i mel jontolil mi caj i mel. Mux i cʌjñel cha'an i jontolil.

⁹ Tontojʌch mu' bʌ i ña'tan i tech mulil. Mi' yʌc' i bʌ ti ts'a'lentel jini xwajleya.

¹⁰ Mi mach ch'ejletic ti' yorajlel wocol ts'ita' jach a p'ʌtʌlel.

¹¹ Ac'ʌ ti colel jini ña'tʌbilix bʌ mi' chʌmel. Coltan jini bʌbʌq'uen bʌ mi' chʌmel.

¹² Mach isujmic mi tsa' wʌlʌ: Mach c cujilic. Mi che'et, ¿mach ba yujilic jini mu' bʌ i wen q'uel lac pusic'al? Jini mu' bʌ caj i yʌq'ueñob i chobejtʌbal winicob, ¿mach ba anic mi' ña'tan chuqui wola' mel?

¹³ Calobil ma' mʌc' chab, come sumuc jax. Tsajatax ti lemol jini chʌc'law bʌ mi' p'ajtel ti' yajñib chab.

¹⁴ Che'ʌch yom ma' wubin a cʌntesʌntel ja'el cha'an ma' taj cabʌl a pusic'al. Che' bʌ tsa'ix a taja wen bʌ a ña'tʌbal tsajatax mi caj a wubin. Ma'anic mi' caj ti to'ol jilel chuqui tac ma' pijtan.

¹⁵ Mach yomic ma' chijtan jini toj bʌ ti' chumlib. Mach yomic ma' xujch'iben majlel i chubʌ'an.

¹⁶ Anquese mi wucyajl mi' yajlel jini toj bʌ mux i cha' ch'ojyel. Mach che'ic jini sajtemo' bʌ. Mi' junyajlel yajlelob ti mulil.

¹⁷ Mach yomic tijicña a pusic'al che' mi' yajlel a contra. Mi tsi' jats'ʌ i yoc mach yomic tijicña ma' wubin,

¹⁸ ame ts'a'ic mi' q'uelet lac Yum che' jini, ame c'axic i mich'ajel Dios ti a tojlel.

¹⁹ Mach yomic ma' mel a pusic'al cha'an xjontolilob. Mach yomic ma' mulʌben i chubʌ'an sajtemo' bʌ.

²⁰ Come mach wenic i jilibal jini jontolo' bʌ. Mi' caj ti jilel i tijicñʌyel sajtemo' bʌ che' bajche' mi' yajpel c'ajc.

²¹ Calobil, la' lac bʌc'ñan lac Yum yic'ot jini rey. Mach a wʌc'ob ti mich'. Mach a pi'len majlel xtech letojob.

²² Come mi caj i bʌc' tilel ñuc bʌ i wocol. ¿Majqui yujil bajche' mi caj i jilelob?

²³ Wʌ'an yan tac bʌ i subal jini año' bʌ i pusic'al: Mach yomic jelchojc jach mi lac cha'len meloñel.

²⁴ Majqui jach mi' q'uel ti uts'at jini am bʌ i mul mi' taj i p'ajol ti' tojlel winicob x'ixicob. Mi' ts'a'lentel ti pejtelel lum.

²⁵ Tijicña mi' yajñelob jini mu' bʌ i tic'ob am bʌ i mul. Mi caj i tajob uts bʌ t'an. Mi caj i wen chumtʌlob.

²⁶ Jini mu' bʌ i subeñet isujm bʌ t'an c'ux mi' yubiñet.

²⁷ Ñaxan taja a we'tel baqui jach ma' taj. C'ajtin a lum. Ti wi'il wa'chocon a wotot.

²⁸ Mach ma' lon pucbeñob i mul a pi'ʌlob che' mach anic ti a wenta. Mach yomic ma' lotin a pi'ʌlob ti uts bʌ t'an.

²⁹ Mach ma' lon al ti a pusic'al: Che'ʌch mi caj c melben yambʌ che' bajche' tsi' melbeyon. Mi caj j q'uextan jontolil. Mach che'iquet.

³⁰ Lʌc'ʌl tsa' ñumiyon ti' t'ejl i chol jini ts'u' bʌ yic'ot ti' t'ejl i ts'usubil jini mach bʌ anic i ña'tʌbal.

³¹ Awilan, tsa' pam coli ch'ixol ti' pejtelel. Tsa' wen pim'a ti tsajatun. Tsa'ix jejmi jubel jini corral melbil ti xajlel.

³² Tsaj q'uele. Tsa cʌc'ʌ tic pusic'al. Tsa quila. Tsac ña'ta j cʌntesʌntel.

³³ Yom to ts'ita' wʌyel. Poj jumuc' to ñʌcʌcñayet. Yom ma' jal a c'ʌb yambʌ jumuc' to.

³⁴ Che' jini mi caj i bʌc' jilel a chubʌ'an che' bajche' ti xujch'. Mux a wochel ti pobre.