Proverbios 17 - Chol: I T’an Dios

¹ Uts'at to'ol waj jach yic'ot i ñʌch'tʌlel lac pusic'al. Mach uts'atic colem otot ba'an cabʌl i bʌl lac ñʌc' yic'ot a'leya.

² Jini ch'iton mu' bʌ i yʌq'uen i ch'ijiyemlel i tat mi caj i yuman x'e'tel xuc'ul bʌ i pusic'al. Ba' ora tsa'ix chʌmi i tat, che' mi' tilelob i pi'ʌlob cha'an mi' t'oxob i chubʌ'an, lajal an i ye'tel jini x'e'tel yic'otob.

³ Mi' yulmesʌntel plata ti p'ejt, mi' yʌjq'uel ti c'ajc jini oro, pero lac pusic'al mi' q'uejlel ti Dios.

⁴ Jini jontol bʌ mi' bʌc' ac' ti' pusic'al i t'an jini jontolo' bʌ. Jini xlot mi' ñich'tʌben i t'an xjop't'an.

⁵ Jini mu' bʌ i wajlen jini mach bʌ anic i chubʌ'an woli' yʌ'liben i yum tsa' bʌ i mele. Jini tijicña bʌ mi' q'uel i wocol i pi'ʌlob mux i toj i mul.

⁶ I ñuclel jini ñoxo' bʌ jiñʌch i yalobilob i yalobil. I ñuclel jini alobob jiñʌch i tatob.

⁷ Mach i t'ojolic jini wen t'an ti' yej xñusa t'añob. Che' ja'el mach i t'ojolic lot ti' yej jini ñuc bʌ i ye'tel.

⁸ Jini mu' bʌ i yʌq'uen i majtan am bʌ i ye'tel cha'an mi' yuts'esʌben i pusic'al, lajalʌch i majtan bajche' i t'ojol jax bʌ xajlel letsem bʌ i tojol. Jini mu' bʌ i ch'ʌm mi' jac'ben i mandar i yum.

⁹ Jini mu' bʌ i mucben i mul yambʌ, woli' yʌc' i bʌ ti c'uxbintel. Jini mu' bʌ i tsictesʌben i mul mi' yʌc' i bʌ ti ts'a'lentel. Mach i pi'ʌlic yilal.

¹⁰ Uts'at mi' jac' i tic'ol jini wen bʌ i pusic'al. Mach che'ic jini tonto bʌ. Anquese mi' jajts'el ti jo'c'al asiyal, ma'anic mi' ju'sʌbentel i pusic'al.

¹¹ Jini xñusa t'an yom i tech jontolil. Jini cha'an ma'anic mi caj i p'untʌntel che' mi' toj.

¹² Mach yocʌ wocolic mi tsi' tajayonla bajlum chilbebil bʌ i yal, pero wen wocol mi tsi' tajayonla juntiquil tonto bʌ woli bʌ i mel bajche' yom i pusic'al.

¹³ Mux i jal'an wocol ti' yotot xjontolil mi jontol tsi' q'uextʌbeyonla lac wenlel.

¹⁴ Che' mi' cajelob ti leto mi' yutsi p'ojlel che' bajche' ja'. Jini cha'an cʌyʌx leto ame utsi p'ojlic.

¹⁵ Jini xmeloñel mach bʌ anic mi' mel xjontolilob yic'ot ja'el jini xmeloñel mu' bʌ i yʌc' ti toj mulil jini tojo' bʌ, junlajal an i mul ti cha'ticlelob.

¹⁶ ¿Chucoch mi' lon ña'tan i mʌn i ña'tʌbal jini tonto bʌ mach bʌ mejlic i ch'ʌmben isujm?

¹⁷ Mi isujm mi' c'uxbiñonla laj cʌñʌ bʌ ma'anic mi' cʌy i c'uxbiñonla ti pejtelel ora. Junlajalʌch bajche' lac pi'ʌl ba' ora woli la cubin wocol.

¹⁸ Tontojʌch mu' bʌ i to'ol otsan i bʌ i tojben i bet xbeta taq'uin. Ma'anic mi' ña'tan chuqui woli' mel. Mi' yotsan i bʌ ti' tojlel i cʌñʌyo' bʌ cha'an mi' ch'ʌmben i bet ti' wenta.

¹⁹ Jini mu' bʌ i mulan leto mi' mulan i ñusan t'an. Jini mu' bʌ i chañ'esan i bʌ mi' caj ti jilel.

²⁰ Jini mu' bʌ i mulan i soc i bʌ ma'anic mi' wis taj chuqui wen ti pejtelel ora. Jini mu' bʌ i soc i t'an mi caj i taj wocol.

²¹ Jini tonto bʌ mi' yʌq'uen i ch'ijiyemlel i tat tsa' bʌ i p'olo. Ma'anic ba' mi' taj i tijicñʌyel i tat.

²² I tijicñʌyel lac pusic'al i wentajʌch wen bʌ ts'ac. I ch'ijiyemlel lac pusic'al mi' tiquesan lac bʌc'tal.

²³ Jini sajtem bʌ mi' mucul aq'uen i majtan xmeloñel cha'an mi' ñusʌben i mul.

²⁴ Baqui jach mi' majlel jini wen bʌ i pusic'al mi' taj i ña'tʌbal, pero mach i tajayic i ña'tʌbal jini tonto bʌ anquese ñajt mi' sʌclan majlel.

²⁵ Jini tonto bʌ mi' yʌq'uen i ch'ijiyemlel i tat yic'ot i quisin i ña' tsa' bʌ i yʌc'ʌ ti pañimil.

²⁶ Isujm mach i t'ojolic mi' yʌjq'uel ti toj mulil jini toj bʌ. Mach i t'ojolic mi' lojwel jini am bʌ i ye'tel, toj bʌ mi' cha'len meloñel.

²⁷ Añʌch i ña'tʌbal jini mu' bʌ i cʌntan i yej. Ñʌch'ʌl i pusic'al jini mu' bʌ i wen ña'tan bajche' yom mi' mel.

²⁸ Che' ñʌch'ʌl jini tonto bʌ lajal yilal bajche' cabʌl bʌ i pusic'al. Mi' ch'ʌmben isujm yilal che' woli' cʌntan i yej.