Proverbios 15 - Chol: I T’an Dios

¹ Jini uts bʌ t'an mi' lajmesʌben i mich'ajel winic. Jini tsʌts bʌ t'an mi' yutsi techben i mich'ajel.

² Che' mi' cha'leñob t'an jini weño' bʌ i pusic'al, tsiquil i ña'tʌbal. Che' mi' cha'leñob t'an jini tontojo' bʌ, tsiquil i tontojlel.

³ Lac Yum mi' pam q'uel pejtel ajñibʌl. Mi' q'uel jini jontolo' bʌ, mi' q'uel jini weño' bʌ.

⁴ Jini uts bʌ t'an lajalʌch bajche' te' ba' ch'oyol laj cuxtʌlel. Jini mich' bʌ t'an mi' jec' lac pusic'al.

⁵ Jini tonto bʌ mi' ts'a'liben i cʌntesʌbal i tat, pero mux i tilel wen bʌ i pusic'al jini mu' bʌ i yubiñob i tic'ol.

⁶ Lotol ti' yotot jini tojo' bʌ an cabʌl chubʌ'añʌl cha'an mi' ñuq'uesʌben i pusic'al, pero i chobejtʌbal jini jontolo' bʌ mi caj i yʌc'ob ti wocol.

⁷ Che' mi' cha'len t'an jini wen bʌ i pusic'al tsiquil i ña'tʌbal, pero leco i ña'tʌbal jini tonto bʌ.

⁸ Lac Yum ts'a'atax mi' q'uel i majtan ti' c'ʌb xjontolilob, pero tijicña i pusic'al cha'an i yoración jini tojo' bʌ.

⁹ Lac Yum ts'a'atax mi' q'uel i bijlel xjontolilob, pero c'ux mi' yubin jini mu' bʌ i yesmañob chuqui toj.

¹⁰ Wocol jax mi' yubin i tic'ol jini mu' bʌ i cʌy wen bʌ bij. Jini mu' bʌ i ts'a'len i tic'ol mi' cajel ti chʌmel.

¹¹ Lac Yum mi' q'uelben i yajñib chʌmeño' bʌ. Mi' q'uel jini ch'en mach bʌ anic i yebal. ¿Mach ba ñumenic mi' c'otel i wut ti malil i pusic'al winicob x'ixicob?

¹² Jini xwajleya ts'a' mi' q'uel jini toj bʌ mu' bʌ i tic'. Mach yomic i pi'len majlel jini weño' bʌ i pusic'al.

¹³ I t'ojol jax lac wut che' tijicña lac pusic'al, pero i ch'ijiyemlel lac pusic'al mi' jisañonla.

¹⁴ Jini wen bʌ i pusic'al mi' cha'len wersa i taj i cʌntesʌntel. Jini tontojo' bʌ mi' bej ña'tañob i tontojlel.

¹⁵ Wocol jax mi' ñusan q'uin jini woli bʌ ti wocol, pero woli ti q'uiñijel ti pejtelel ora jini tijicña bʌ i pusic'al.

¹⁶ Anquese mi ts'ita' jach i chubʌ'an jini mu' bʌ i bʌc'ñan lac Yum, ñumen tijicña i pusic'al bajche' jini am bʌ cabʌl i chubʌ'an woli bʌ ti wocol.

¹⁷ Anquese mi pimel jach mi' c'uxob jini mu' bʌ i c'uxbiñob i bʌ, ñumen tijicñayob bajche' jini mu' bʌ i ts'a'leñob i bʌ mu' bʌ i c'uxob we'elʌl.

¹⁸ Jini mich' bʌ i pusic'al mi' tech leto, pero jini mach bʌ orajic mi' mich'an mi' lajmesan leto.

¹⁹ Che' yilal i bijlel jini ts'u' bʌ bajche' pim bʌ ch'ixol, pero chʌcʌch i bijlel jini tojo' bʌ.

²⁰ Jini ch'iton am bʌ wen bʌ i pusic'al mi' ñuq'uesʌben i pusic'al i tat. Jini tonto bʌ mi' ts'a'len i ña'.

²¹ Jini mach bʌ wenic i pusic'al mi' mulan i tontojlel, pero toj mi' cha'len xʌmbal jini wen bʌ i pusic'al.

²² Machic mi temob i t'an winicob che' jach mi' to'ol jilel chuqui mi' ña'tañob i mel, pero muc'ʌch i joloñel ti pejtelel che' mi' temob i t'an che' cabʌlob.

²³ Jini mu' bʌ i wen pejcan i pi'ʌlob mi caj i taj i tijicñʌyel i pusic'al. Jini yujil bʌ wen bʌ t'an an cabʌl i c'ʌjñibal ti coltaya.

²⁴ Jini wen bʌ i pusic'al mi' taj i cuxtʌlel che' mi' letsel majlel ti wen bʌ bij. Ma'anic mi' jubel majlel ti' bijlel chʌmeño' bʌ.

²⁵ Lac Yum mi' yʌc' ti jilel i p'olbal winicob x'ixicob mu' bʌ i chañ'esañob i bʌ. Mi' wen q'uelbeñob i cayajonlel i lum meba'ob.

²⁶ Ts'a' mi' q'uejlel ti lac Yum i ña'tʌbal xjontolil, pero uts'at mi' yubiben i t'an jini sʌc bʌ i pusic'al.

²⁷ Jini wo'atax bʌ ti taq'uin mi' yotsan ti pobre i pi'ʌlob año' bʌ ti' yotot. Jini mu' bʌ i ts'a'len i majtan taq'uin mu' bʌ i pʌsben xjontolil tijicña mi' yajñel.

²⁸ Jini toj bʌ mi' ña'tan ti' pusic'al bajche' yom mi' jac' ti wen bʌ t'an. Jini sajtem bʌ che jach mi' cha'len jontol bʌ t'an.

²⁹ Ñajt mi' tʌts' i bʌ lac Yum ba'an xjontolilob, pero mi' yubiben i yoración jini tojo' bʌ.

³⁰ Tijicña lac pusic'al che' tijicña mi' q'uelonla lac pi'ʌlob. Jini wen bʌ t'an mi' ñuq'uesʌbeñonla lac pusic'al.

³¹ Jini mu' bʌ i wen ñich'tan i cʌntesʌntel cha'an uts'at mi' yajñel mi' caj ti chumtʌl ti' tojlel jini weño' bʌ i pusic'al.

³² Jini mach bʌ muq'uic i jac' i tsico' pusic'al mi' yʌc' i bʌ ti jilel. Jini mu' bʌ i yubin i tic'ol añix i ña'tʌbal.

³³ Cʌntesʌbil i pusic'al jini mu' bʌ i bʌc'ñan lac Yum. Yujil bajche' yom i mel. Jini uts bʌ i pusic'al mi caj i c'uxbintel.