Proverbios 11 - Chol: I T’an Dios

¹ Ts'a' mi' q'uel lac Yum jini xewel bʌ balanza, pero tijicña i pusic'al cha'an ts'ʌcʌl bʌ i yalel balanza.

² Jini mu' bʌ i chañ'esan i bʌ mi' cajel ti quisin, pero an wen bʌ i ña'tʌbal jini mu' bʌ i peq'uesan i bʌ.

³ Jini tojo' bʌ mi caj i toj'esʌntelob majlel cha'an tojob i pusic'al. Jini xmulilob mi caj i jisʌntelob cha'an jontolob i pusic'al.

⁴ Ma'anic i c'ʌjñibal chubʌ'añʌl ti' q'uiñilel i mich'lel Dios. Pero i yuts'atlel jini toj bʌ mi' yʌc' ti colel jini mu' bʌ caj ti chʌmel.

⁵ I yuts'atlel jini toj bʌ mi caj i pʌsben majlel i bijlel, pero jini xmulilob mi caj i yajlelob cha'an i jontolil.

⁶ I yuts'atlel jini tojo' bʌ mi caj i coltañob, pero i mul jini xmulilob mi caj i yʌsañob.

⁷ Che' mi' chʌmel jini sajtem bʌ mi' laj jilel i pijtaya. Chuqui tac mi' ña'tañob i taj xjontolilob ti' bajñel p'ʌtʌlel ma'anic mi caj i tajob.

⁸ Jini toj bʌ mi caj i yʌjq'uel ti colel ti wocol. Ya' ba' tsa' loq'ui mi' cajel ti ochel xjontolil.

⁹ Cha'an ti' t'an jini xlotiya mi' jisʌntelob i pi'ʌlob ti chumtʌl, pero jini toj bʌ mi' cajel ti colel cha'an i ña'tʌbal.

¹⁰ Che' uts'at añob jini tojo' bʌ tijicña jini tejclum. Mi' cha'leñob q'uiñijel che' mi' jilelob xjontolilob.

¹¹ Cha'an ti' yutslel i t'an jini tojo' bʌ mi' ñuc'an tejclum, pero mux i jilel cha'an ti' yej xjontolil.

¹² Leco i ña'tʌbal jini mu' bʌ i ts'a'len i pi'ʌlob ti chumtʌl, pero jini wen bʌ i ña'tʌbal mi' tic' i bʌ.

¹³ Jini mu' bʌ i puc majlel jop't'an mi' yʌc' ti tsictiyel mucul tac bʌ. Pero jini xuc'ul bʌ i pusic'al mi' muc cʌytʌl ti' pusic'al chuqui tsi' yubi.

¹⁴ Mi lac yajlel che' ma'anic wen bʌ lac toj'esʌntel, pero an laj coltʌntel che' cabʌl la caj toj'esayajob.

¹⁵ Mi caj lac mel lac pusic'al mi tsa' la cʌq'ue ti bet lac taq'uin jini mach bʌ laj cʌñʌyic, come mach chʌn q'uextʌyic lac taq'uin. Pero tijicñayonla mi tsa' lac bajñel cʌnta lac taq'uin.

¹⁶ Jini x'ixicob yujilo' bʌ p'untaya mi caj i c'uxbintelob. Mi caj i tajob cabʌl chubʌ'añʌl jini p'ʌtʌl bʌ winicob.

¹⁷ Jini yujil bʌ p'untaya mi' coltan i bʌ, pero mi' tic'lan i bʌ jini jontol bʌ i pusic'al.

¹⁸ Lot jach i ganar jini xjontolil. Isujmʌch i chobejtʌbal jini wen bʌ i melbal.

¹⁹ Mux i taj i cuxtʌlel jini xuc'ul bʌ i pusic'al mu' bʌ i chʌn cha'len chuqui uts'at. Mi' cajel ti chʌmel jini mu' bʌ i chʌn cha'len jontolil.

²⁰ Lac Yum mi' ts'a'len jini jontolo' bʌ i pusic'al, pero tijicña i pusic'al lac Yum cha'an i bijlel jini tojo' bʌ.

²¹ Mi mach wʌleyic mi' tojob i mul xjontolilob, mux i tojob ti wi'il, pero i yalobilob jini tojo' bʌ mi' cajelob ti colel. Ma'anic mi caj i yʌjq'uelob ti toj mulil.

²² Jini i t'ojol jax bʌ x'ixic mach bʌ anic i ña'tʌbal lajalʌch bajche' mʌtc'ʌbʌl ti' ñi' chitam. Lolom jach mi' ch'ʌl i bʌ.

²³ Jini tojo' bʌ jini jach uts'at tac bʌ yomob i taj, pero jini xjontolilob muc'ʌch i tajob i mich'ajel Dios.

²⁴ An mu' bʌ i p'ejwob i chubʌ'an, pero mi' yutsi p'ojlel i cha'an. An on bʌ mi' lot i chubʌ'an ñumen bajche' yom, pero mi' yutsi sajtel.

²⁵ Jini mach bʌ chʌquic ti' chubʌ'an mi caj i cha' aq'uentel. Jini mu' bʌ i yʌq'uen ja' yambʌ am bʌ i tiquin ti' mux i lajmel i tiquin ti' ja'el.

²⁶ Jini mu' bʌ i bajñel lot i yixim mux i taj i p'ajol ti winicob x'ixicob. Jini mu' bʌ i chon mi caj i taj uts bʌ t'an.

²⁷ Jini mu' bʌ i ñop i mel chuqui uts'at wolix i sʌclan wen bʌ t'an. Jini mu' bʌ i ñop i mel jontolil mi caj i yutsi taj jontolil.

²⁸ Jini xuc'ul bʌ i pusic'al ti cabʌl i chubʌ'an mi' caj ti jilel. Jini toj bʌ mi caj i ch'ocan lajal bajche' te' mu' bʌ ti ch'ajb. Mi' caj ti loq'uel i yopmal.

²⁹ Jini mach bʌ anic mi' cʌntan i pi'ʌlob ti' yotot ma'anic chuqui mi caj i taj ti' jilibal. Jini tonto bʌ mi caj i yuman jini am bʌ i ña'tʌbal.

³⁰ Jini tojo' bʌ lajalobʌch bajche' cuxul bʌ te' mu' bʌ i yʌq'ueñonla i wut cha'an laj cuxtʌlel. Cabʌlʌch i pusic'al jini mu' bʌ i pʌyob winicob cha'an mi' sujtelob ti hermanojob.

³¹ Isujm mux i tojob i mul jini tojo' bʌ ila ti pañimil. ¿Mach ba ñumenic mi caj i tojob i mul xjontolilob yic'ot xmulilob?