Proverbios 10 - Chol: I T’an Dios

I subal Salomón

¹ Jini ch'iton am bʌ i pusic'al mi' ñuq'uesʌben i pusic'al i tat. Jini tonto bʌ i yalobil mi' yʌq'uen i ch'ijiyemlel i ña'.

² Anquese letsem i tojol chuqui tac mi' ch'ʌm winic ti jontolil, ma'anic chuqui mi' yʌq'uen. I yuts'atlel jini toj bʌ mi' yʌc' ti colel jini mu' bʌ caj ti chʌmel.

³ Lac Yum mi' p'untan jini toj bʌ. Ma'anic mi' yʌq'uen i yubin wi'ñal. Pero mi' choc majlel jini xjontolilob yic'ot i wo'lel.

⁴ Jini ts'ub bʌ ti e'tel mi' yotsan i bʌ ti pobre. Jini bʌx bʌ ti e'tel mi' yotsan i bʌ ti rico.

⁵ Añʌch i pusic'al ch'iton mu' bʌ i cha'len c'ajbal che' i yorajlelix. Jini buchul bʌ ti' yorajlel c'ajbal mi' yʌc' ti quisin i tat.

⁶ Mi' taj i yutslel i t'an jini toj bʌ, pero mach mejlic i letsan i t'an xjontolil ame tsictiyic i jontolil.

⁷ Uts'atax i ña'tʌntel jini tojo' bʌ, pero i c'aba' jini xjontolil mi' sʌc jilel ti' yoc'beñal.

⁸ Jini am bʌ i pusic'al mi' jac' mandar, pero jini tonto bʌ mu' bʌ i cha'len to'ol t'an mi caj i yʌjq'uel ti quisin.

⁹ Jini mu' bʌ ti xʌmbal ti' xuc'tʌlel i pusic'al uts'at mi' majlel, pero mi caj i cʌmbentel i mul jini mu' bʌ i xoy i bijlel.

¹⁰ Jini mu' bʌ i puc majlel t'an cha'an mi' tech leto mi' techben i ch'ijyemlel i pusic'al mu' bʌ i ñop. Mi caj i yʌjq'uel ti quisin jini tonto bʌ mu' bʌ i cha'len to'ol t'an.

¹¹ Lajalʌch i yej jini toj bʌ bajche' i loq'uib ja' ba' ch'oyol laj cuxtʌlel, pero jini xjontolil mi' cha'len lot cha'an mi' muc i jontolil.

¹² Mi' tech leto jini mu' bʌ ti ts'a'leya. Mi' lajmesan mulil jini mu' bʌ i cha'len c'uxbiya.

¹³ Yujil cʌntesa jini mu' bʌ i ch'ʌmben isujm, pero jini mach bʌ wenic i pusic'al ma'anic mi' ñop t'an jinto mi' bajbentel ti asiyal.

¹⁴ Jini año' bʌ wen bʌ i ña'tʌbal yujilob ñʌjch'el. Pero jini tonto bʌ mi' laj tsictesan. Mi' p'ojlesan wocol ti pañimil.

¹⁵ Jini rico lajal mi' q'uel i chubʌ'an bajche' wen ts'ajquibil bʌ tejclum. An pobrejob mu' bʌ i jilelob cha'an ma'anic i chubʌ'an.

¹⁶ I ye'tel jini toj bʌ mi caj i ñajt'esan i jabilel. I chobejtʌbal jini xjontolil mi caj i yʌc' ti jilel cha'an i mul.

¹⁷ Jini mu' bʌ i jac' i cʌntesʌntel añʌch ti' bijlel i cuxtʌlel, pero wolix i sajtel jini mach bʌ yomic i jac' i toj'esʌntel.

¹⁸ Jiñʌch xlotiya mu' bʌ i mujcun i mich'lel ti uts bʌ t'an. Tonto jini mu' bʌ i puc majlel u'yaj t'an.

¹⁹ An i mul jini mu' bʌ i p'ojlesan t'an. An cabʌl i pusic'al jini mu' bʌ i cʌntan i yej.

²⁰ Lajalʌch i yac' jini toj bʌ bajche' puro plata, pero i pusic'al jini xjontolil ma'anic chuqui i ye'tel.

²¹ Cabʌl winicob mi' we'sʌntelob cha'an ti' t'an jini toj bʌ, pero jini tontojo' bʌ mi' chʌmelob cha'an ma'anic i ña'tʌbal.

²² Mi' yochel ti rico jini mu' bʌ i taj i yutslel i pusic'al lac Yum. Mach xʌbʌlic ti ch'ijiyem bʌ chu' bʌ mi' yʌq'uentel ti Dios.

²³ Tijicña jini tonto bʌ che' mi' cha'len jontolil. Tijicña jini wen bʌ i pusic'al che' mi' ch'ʌmben isujm.

²⁴ Chuqui tac mi' bʌc'ñan xjontolil mi cajel i taj, pero jini tojo' bʌ mi caj i yʌq'uentelob chuqui tac yomob i taj.

²⁵ Lajal xjontolil che' bajche' sutujt ic' mu' bʌ ti ñumel majlel. Poj jumuc' jach an. An cabʌl i wi' jini toj bʌ. Ma'anic mi' bojquel ti pejtelel ora.

²⁶ Che' bajche' vinagre ti la quej, che' bajche' buts' ti lac wut, che' lajal jini ts'u' bʌ ti' tojlel i yum mu' bʌ i choc majlel ti' ye'tel.

²⁷ Mi' ñajt'esʌntel i jabilel jini mu' bʌ i bʌc'ñan lac Yum. Mi' com'esʌntel i jabilel jini xjontolil.

²⁸ Jini toj bʌ mi caj i taj chuqui tac tijicña woli bʌ i pijtan. Jini xjontolil mi caj i lon pijtan chuqui yom i pusic'al. Mi' cajel ti jilel.

²⁹ Jini toj bʌ mu' bʌ i cha'len xʌmbal ti' bijlel lac Yum woli' cʌntʌntel. Jini xjontolil mach bʌ anic ti' bijlel lac Yum mi' caj ti jilel.

³⁰ Xuc'ul mi' caj ti chumtʌl jini toj bʌ ti pejtelel ora, pero jini jontolo' bʌ ma'anic mi caj i chʌn ajñelob ti lum.

³¹ Cha'an ti' t'an jini toj bʌ mi lac taj lac ña'tʌbal, pero che jach mi' jilel i t'an xlot.

³² Jini tojo' bʌ wen yujilob i jac'ol t'an, pero sojquem i t'an jini jontolo' bʌ.