Proverbios 1 - Chol: I T’an Dios

Cabʌl i c'ʌjñibal ili t'an

¹ Jiñʌch i subal Salomón i yalobil David, i rey jini israelob:

² Cha'an mi' yʌq'ueñonla wen bʌ lac ña'tʌbal yic'ot laj cʌntesʌntel, cha'an mi lac ch'ʌmben isujm toj bʌ t'an,

³ cha'an mi lac ñop bajche' yom mi lac mel, cha'an mi' toj'an lac pusic'al yic'ot lac t'an yic'ot lac melbal.

⁴ La' i yubiñob jini maxto bʌ cʌntesʌbilobic cha'an mi' julelob i pusic'al. La' i p'isob ti' wenta jini ch'iton winicob cha'an mi' cʌntañob i bʌ.

⁵ Ubinla jini t'an pejteletla anix bʌ la' pusic'al. Che' jini mux i yutsi p'ojlel la' ña'tʌbal. Jini weño' bʌ i ña'tʌbal mi caj i yotsañob ti' pusic'al i cʌntesʌntel

⁶ cha'an mi' ch'ʌmbeñob isujm ili t'an yic'ot lajiya tac, i subal jini año' bʌ i pusic'al yic'ot i sujmlel mucul tac bʌ ti pañimil.

⁷ Jiñʌch i cajibal lac ña'tʌbal che' mi lac bʌc'ñan lac Yum. Jini tontojo' bʌ ts'a' mi' yubiñob i cʌntesʌntel yic'ot i tic'ol.

Mach a ñop jontolil

⁸ Calobil, ch'ujbiben i cʌntesa a tat. Mach a cʌy a jac'ben i mandar a ña'.

⁹ Come a t'ojlʌwib yilal mi tsa' jac'beyob, come jiñʌch i ch'ʌjlil a jol yic'ot a wuj yilal.

¹⁰ Calobil, mi yomob i pʌyet ti mulil xmulilob, mach ma' jac'beñob.

¹¹ Cʌntan a bʌ che' mi subeñetob: Conla. La' lac chijtan jini mu' bʌ caj lac tsʌnsan.

¹² La' lac bʌc' tsʌnsan ti mucul jach. Mi caj i lon ña'tañob i pi'ʌlob yilol jach tsa' chʌmiyob che' c'oc'ob to.

¹³ Mux lac chilbeñob pejtel letsem tac bʌ i tojol. Mux lac but' la cotot ti lac xujch'.

¹⁴ Conla. Yom ajniquet quic'ot lojon. Lac tem cha'an jach chuqui mi lac taj, che'ob.

¹⁵ Calobil, mach ma' pi'leñob majlel. Mach ma' ñop a mel che' bajche' mi' melob.

¹⁶ P'ip'atax i pusic'al ti jontolil. Ora jach yomob tsʌnsa.

¹⁷ Lolom jach mi la cʌc' yac ba' mi' q'uejlel. Mach chujquic te'lemut mi tsi' q'uele.

¹⁸ Pero jini mu' bʌ i ñopob tsʌnsa mi' yʌc'ob i bʌ ti tsʌnsʌntel. Mi' yʌc' i bʌ ti chujquel jini mu' bʌ i ña'tan i chuc i pi'ʌlob.

¹⁹ Junlajal mi' jilelob pejtel yujilo' bʌ xujch'. Cha'an ti' caj i xujch'ob mi' chʌmelob.

²⁰ Jini mach bʌ anic i p'isol i ña'tʌbal mi' cha'len t'an ti calle tac. Mi' yubibentel i t'an ti bij.

²¹ Mi' cha'len t'an ti choñoñibʌl yic'ot ti melobʌjʌl. Ya' ti' ti' tejclum mi' yubintel i t'an:

²² Jatetla maxto bʌ anic la' pusic'al, ¿jayp'ejl to q'uin chʌn alʌlet to la? Jatetla mu' bʌ la' cha'len wajleya, ¿jayp'ejl to q'uin chʌn tijicñayetla ti wajleya? Jatetla tontojet bʌ la, ¿jayp'ejl to q'uin mi caj la' ts'a'len la' cʌntesʌntel?

²³ Sutq'uin la' bʌ cha'an mi la' ñop c t'an cha'an mi la' jac' la' tic'ol. La' wilan, mi caj cʌq'ueñetla quEspíritu. Mi caj cʌq'ueñetla la' cʌn c t'an.

²⁴ Anix ora wolic chʌn pʌyetla tilel pero tsa' la' ñusʌbeyon c t'an. Tsac pejcayetla ti wocol t'an pero ma'anic majch tsi' p'isi ti' wenta.

²⁵ Tsa' la' ñusa pejtel j cʌntesʌbal. Ma'anic tsa' la' jac'ʌ la' tic'ol che' bʌ tsac tiq'uiyetla.

²⁶ Jini cha'an joñon ja'el mi caj c cha'len tse'ñal che' ti' yorajlel la' wocol. Mi caj c wajleñetla che' woliyetla ti bʌq'uen. Che' bajche' mi' bʌc' tejchel p'ʌtʌl bʌ ic', che' ja'el mi caj i tajetla wocol.

²⁷ Che' bajche' sutujt ic', mi caj i tilel la' jisʌntel. Mi caj i tejchel la' ch'ijiyemlel yic'ot cabʌl la' wocol.

²⁸ Ti jim bʌ ora mi caj i pejcañoñob, pero ma'anic mi caj c jac'beñob. Mi caj i wersa sʌclañoñob. Mach i tajayoñobic.

²⁹ Come tsi' ts'a'leyob j cʌntesʌbal. Ma'anic tsi' yʌc'ʌyob ti' pusic'al cha'an mi' bʌc'ñañob i Yum.

³⁰ Ma'anic tsi' jac'ʌyob c t'an. Tsi' ñusayob i tic'ol che' bʌ tsac tiq'uiyob.

³¹ Jini cha'an mux i yʌq'uentelob i chobejtʌbal cha'an i melbalob. Mux i junyajlel cʌytʌlob yic'ot i jontolil.

³² Come i sajtemal jini tontojo' bʌ mi caj i tsʌnsañob. Jini lon xuc'ulo' bʌ i pusic'al cha'an i chubʌ'an mi caj i jilelob.

³³ Pero jini mu' bʌ i ch'ujbibeñon c t'an ma'anic chuqui mi caj i bʌc'ñan. Mach talic i wocol. Mach yujilic bʌq'uen. Che'ʌch mi' cha'len t'an jini am bʌ i ña'tʌbal mach bʌ anic i p'isol.