Oseas 9 - Chol: I T’an Dios

Mi caj i tojob i mul jini israelob

¹ Mach yomix tijicñayetla, israelob, che' bajche' yambʌ tejclumob, come tsa'ix la' cʌyʌ la' Dios. Wolix la' ch'ujutesan dioste' tac ti jujump'ejl patio ba' mi' jajts'el trigo.

² Jini cha'an ma'anic mi caj i jastiyel la' cha'an jini trigo yic'ot i ya'lel ts'usub.

³ Ma'anic mi caj la' cʌytʌl ti' lumal lac Yum. Wersa mi caj la' pʌjyel majlel ti Egipto yic'ot ti Asiria. Ya'i mi caj la' c'ux i colojbal i bʌl i ñʌc' yaño' bʌ.

⁴ Ya'i mach chʌn mejlix la' wʌq'uen i majtan la' Yum. Ma'anic mi caj i mulan i majtan mu' bʌ la' wʌq'uen ya'i. Come bibi' ti' wut che' bajche' we'elʌl ti' yotlel ch'ujlelʌl. Bibi'ob pejtel mu' bʌ i c'uxob. Mi mejlel i c'uxob come i bʌlʌch i ñʌc', pero mach mejlic i yʌq'ueñob Dios.

^5-6 ¿Chuqui mi caj la' mel che' ti' yorajlel q'uiñijel? Mach mejlix la' cha'len ñuc bʌ q'uiñijel cha'an mi' la' ch'ujutesan la' Yum, come mi caj la' cʌjchel majlel ti Asiria. Jini año' bʌ ti Egipto mi caj i chilbeñetla la' chubʌ'an mu' bʌ i cʌytʌl. Mi caj la' chʌmel ti ñajt bʌ pañimil. Mi caj la' mujquel ya' ti Menfis am bʌ ti Egipto. Mi caj i pim'an la' lumal.

⁷ Tsa'ix c'oti i yorajlel tojmulil. Jiñʌch i yorajlel mi' q'uextʌbentel i mul Israel. Mi' yʌlob: Tontojob jini x'alt'añob. Sojquem i jol i winic Dios, che'ob, come cabʌl jax i mul. Cabʌl mi' ts'a'leñob jini mu' bʌ i c'uxbiñob Dios.

⁸ Wa'chocobil ti Dios jini x'alt'an cha'an mi' cʌntañet Efraín, pero baqui jach mi' ñumel ma' mʌctan. Mi' p'ajtʌl cha'an i pi'ʌlob ti' yotot Dios.

⁹ Leco jax bajche' mi' melob che' bajche' tsi' meleyob ti Gabaa. Ma'anic mi' ñajʌyel i cha'an Dios. Mach jalix mi caj i yʌq'ueñob i toj i mul.

¹⁰ Mic ña'tan bajche' añet Israel che' uts'at to a pusic'al. Tsa' c'uxbiyon. Wen tijicñayon che' bʌ tsac ñaxan tajayet, che' bʌ tsac pʌyʌyet ñumel ti colem bʌ i tiquiñal pañimil. Lajalet tic wut che' bajche' ñaxan bʌ i wut ts'usub ti jochol bʌ lum. Wen tijicñayon che' bʌ tsac taja a tatob, pero tsi' cʌyʌyoñob cha'an mi' tsʌcleñob jini Baalpeor, cha'an quisintic jax mi' melob. Jini cha'an leco tsa' sujtiyob che' bajche' jini diosob tsa' bʌ i c'uxbiyob.

¹¹ Wolix i sʌc jilel i ñuclel israelob che' bajche' mi' majlel te'lemut. To'ol wa'alob jach la' wijñam. Che' an majch mi' cʌntan alʌl chʌmenix mi' tilel ti pañimil. Jini x'ixicob mi' ñusañob i yalobilob.

¹² Anquese mi la' cosan la' walobilob, lolom jach, come joñon mi caj c pʌyob majlel. Che' jini obol la' bʌ che' mij cʌyetla.

¹³ Tsaj q'uele jini ch'iton winicob ti Israel. Joy mʌctʌbilob ti guerra. I tatob mi' wersa pʌyob majlel ba' mi' tsʌnsʌntelob.

¹⁴ ¿Chuqui mi caj a wʌq'ueñob, c Yum? C Yum, aq'ueñob i toj i mul che' bajche' an i melbalob. Yom ma' tic'ob cha'an ma'anix mi' chʌn tilel i yalobilob, cha'an ma'anix mi' julel i ya'lel i chu'.

¹⁵ Leco jax chuqui tsi' meleyob ti Gilgal. Ya' tsa' tejchi i jontolil. Ya' tsa' caji c ts'a'leñob. Mi caj c chocob loq'uel tic lumal cha'an i mul. Ma'anix mic chʌn c'uxbiñob, come i yumob tsi' ñusayob c t'an.

¹⁶ Jini cha'an mi caj i tojob i mul jini año' bʌ ti Efraín. Lajalʌch Israel bajche' te' tsa' bʌ tiqui i wut. Mach mejlix i yʌc' i wut. Mi tsi' yʌc'ʌ alʌl ti pañimil, mi caj c tsʌnsan, anquese c'ux mi' yubin.

¹⁷ Che' jini Dios mi caj i chocob, come ma'anic tsi' ñich'tʌbeyob i t'an. Pam pujquemob mi caj i yajñelob ti pañimil.