Oseas 8 - Chol: I T’an Dios

I tic'ol israelob cha'an i ch'ujutesʌntel dioste'

¹ Wusu jini trompeta, come talob a contrajob che' bajche' xta'jol. Talob i jisan c cha'año' bʌ cha'an tsi' jemeyob jini trato bʌ c t'an. Tsi' wersa ñusayob c mandar.

² Wolix i pejcañoñob jini israelob: “C Dios lojon, coltañon lojon, come j cʌñʌyet lojon”, che'ob.

³ Pero tsi' junyajlel ñusayob chuqui tac wen. Jini cha'an ma'anix i coltʌntel. Mi caj i puts'elob ti' tojel i wut i contrajob.

⁴ Tsi' wa'chocoyob i reyob mach bʌ anic tsac yajca. Tsi' meleyob i dios tac ti oro yic'ot ti plata. Jini cha'an ma'anix mi caj j coltañob.

⁵ Ts'a' mij q'uel jini dios alʌ tat wacax mu' bʌ i ch'ujutesañob ti Samaria. Jini cha'an i contrajon. Cʌlʌx jax c mich'ajel. ¿Jala to ba mi caj i cʌyob i mul?

⁶ Come mach Diosic jini alʌ tat wacax tsa' bʌ i meleyob. I melbal jach winic. Jini cha'an wersa mi caj i bic'ti tojp'el jini dios alʌ tat wacax am bʌ ti Samaria.

⁷ Woliyob ti pac' ti ic', pero tal jini sutujt ic' cha'an mi' jisañob. To'ol pots' i te'el ixim. Ma'anic chuqui mi caj i c'ajob. Mi tsa' loq'ui ts'ita' i wut, yambʌ mi caj i c'ux.

⁸ Jisʌbilix Israel che' bajche' tojp'emix bʌ ch'ejew. Ma'anix i c'ʌjñibal.

⁹ Tsajñi i c'ajtin i coltʌntel ti Asiria che' bajche' burro mach bʌ anic i yum, mu' bʌ i bajñel yajcan i bijlel. Woli' yʌq'uen cabʌl i majtan Asiria cha'an mi' tajben i yutslel i pusic'al.

¹⁰ Anquese mi' lon aq'uen i majtan cabʌl tejclum tac, ma'anic i coltʌntel. Cʌchʌl mi caj c pʌy majlel. Ma'anix mi caj i bajñel wa'chocoñob i yumob cha'an mi yʌq'ueñob i tojoñel.

¹¹ Efraín tsi' p'ojlesa pulʌntib cha'an mi' yesman mulil, mach cha'anic mi' ch'ujutesañon.

¹² Tsa'ic c p'ojlesʌbe c mandar, mach i jac'ʌyic. “La' i jac'ob yaño' bʌ”, lon che'ob.

¹³ Jini israelob mi' yʌq'ueñoñob cotol bʌ c majtan. Mi' c'uxob jini we'elʌl, pero mach tijicñayic mij q'uel. Mach ñajʌyic c cha'an i mul. Mi caj c melob. Mi caj cʌq'ueñob i toj i mul. Mi caj i cha' majlelob ti majtan e'tel ti Egipto.

¹⁴ Tsa' ñajʌyiyon ti' pusic'al israelob. Tsi' meleyob colem otot. Judá ja'el tsi' mele cabʌl tejclum tac joyol bʌ ti ts'ajc ba' mi' lon ñopob i coltañob i bʌ. Pero ma'anix mi' chʌn ña'tañon jini israelob yic'ot judíojob. Mi caj c laj jisañob ti c'ajc. Che' tsi' yʌlʌ lac Yum.