Oseas 7 - Chol: I T’an Dios

I mul xñusa t'añob

¹ Com j coltan Judá yic'ot Israel, pero cabʌlobix i mul. Jini chumulo' bʌ ti Samaria mi' cha'leñob lot yic'ot xujch'. Mi' chilbeñob i chubʌ'an i pi'ʌlob.

² Ma'anic mi' ña'tañob mi wolij q'uelob. Laj tsiquil i jontolil ti' tojel c wut.

³ Mi' ñuq'uesʌbeñob i pusic'al jini rey yic'ot i jontolil. Jini yumʌlob mi' mulañob lot.

⁴ Junlajal an i ts'i'lel ti pejtelelob. Che' bajche' horno mach bʌ yujilic tsʌñ'an che' woli to i melob pan, che' ja'el i ts'i'lel. Mach yujilic lajmel.

⁵ Che' ti' q'uinilel jini rey, jini yumʌlob mi' yʌc'añob yic'ot jini rey. Tonto mi' sujtelob. Mi' temob i t'an yic'ot jini mu' bʌ i wajleñob.

⁶ Ti pejtelel ac'ʌlel mi' xic'ob i bʌ ti lotiya. Che' ti sʌc'an wolix ti lejmel i mich'lel che' bajche' c'ajc.

⁷ Mi' tsʌnsañob pejtel i yumob. Ti jujuntiquil tsa' yajliyob. Ma'anic majqui tsi' c'ajtibeyon i coltʌntel mi juntiquilic.

⁸ Jini israelob mi' xʌbob i bʌ yic'ot sajtemo' bʌ mach bʌ anic mi' cʌñoñob. Leco mij q'uelob che' bajche' sʌc wutiyem bʌ waj.

⁹ Tsa'ix jili i p'ʌtʌlel Israel cha'an woli' ch'ujutesan yambʌ dios, pero ma'anic mi' ña'tan mi c'unix. Lajalʌch bajche' ñoxix bʌ winic mach bʌ yujilic che' sʌquix i jol.

¹⁰ Wen tsiquil i mul che' chan mi' mel i bʌ, pero ma'anic mi' p'is ti' wenta cha'an mi' cha' sutq'uin i bʌ tic tojlel. Ma'anic majqui mi' sʌclañon.

¹¹ Lajalʌch Efraín bajche' x'ujcuts mach bʌ yujilic baqui mi' majlel. Mi' lon pejcan jini año' bʌ ti Egipto. Mi' lon majlel ba'an jini asiriajob.

¹² Pero baqui jach mi' majlelob mic yʌcob che' bajche' te'lemut. Mi caj i yajlelob ti' caj i mul. Mi caj cʌq'ueñob i toj che' bajche' c'amel an i jontolil.

¹³ Obolob i bʌ cha'an tsi' cʌyʌyoñob. Jini cha'an wersa mi caj i jisʌntelob, come tsa'ix i ñusʌbeyoñob c mandar. Ti pejtelel c pusic'al com coltañob, pero ma'anic tsi' ñopoyob come tsʌtsob i pusic'al.

¹⁴ Che' cañal i wut ti' wʌyib cha'an tsic pusic'al, ma'anic mi' c'ajtibeñoñob i coltʌntel. Mi' lon ch'ujutesañob yambʌ dios. Mi' lon c'ajtiñob ixim yic'ot vino yic'ot pejtel chuqui yom ti pañimil. Mi' tsepob i bʌ. Mi' ñusañob c t'an.

¹⁵ Joñon tsaj cosayob, tsa cʌq'ueyob i p'ʌtʌlel, pero wʌle mi' contrajiñoñob.

¹⁶ Mi' c'ajtiñob i coltʌntel ti pejtelel pañimil, pero mach ya'ic ti panchan ti' tojlel jini C'ax Ñuc bʌ Dios. Lajalob bajche' rocol bʌ i te'el jalʌjb mach bʌ anic mi' wen c'otel. Mi caj cʌc' i yumob ti' c'ʌbob i contrajob cha'an mi' tsʌnsañob ti' caj i mul cha'an tsi' ts'a'leyoñob. Jini año' bʌ ti Egipto mi caj i tse'tañob.