Oseas 6 - Chol: I T’an Dios

¹ Mi caj i yʌlob: “La'ix la. Conla ti sujtel ba'an lac Yum. Come jiñʌch tsa' bʌ i yʌq'ueyonla wocol. Mi caj i cha' coltañonla. Tsi' contrajiyonla, pero mi caj i cha' p'untañonla.

² Ti cha'p'ejl q'uin mi caj i cha' p'ʌtesañonla. Ti' yuxp'ejlel q'uin mi caj i techonla ch'ojyel cha'an mi la cajñel ti' tojlel.

³ La' laj cʌñe' lac Yum. La' lac cha'len wersa cha'an mi lac chʌn ñop, come cha' tal ba' añonla. Che' bajche' mi' pʌs i sʌclel jini q'uin che' mi' sʌc'an, che'ʌch mi caj i tilel ti lac tojlel. Tal che' bajche' jini ñaxan bʌ ja'al ti' yorajlel pac'”, che'ob.

⁴ Efraín yic'ot Judá, ¿chuqui mi caj c tumbeñetla? Come lajal la' c'uxbiya bajche' tocal ti sʌc'ajel yic'ot jini ye'eb, ora jach bʌ mi' jilel.

⁵ Tsac chocbeyetla tilel x'alt'añob cha'an mic cʌ'leñetla, cha'an mic jisañetla yic'ot c t'an. Tal la' wocol ti ora jach che' bajche' chajc.

⁶ Mach comic mi la' wʌq'ueñon c majtan tac. Com mi la' c'uxbiñon. Com mi la' cʌn Dios.

⁷ Pero lajaletla bajche' Adán tsa' bʌ i ñusʌbeyon c t'an. Tsa'ix la' cʌyʌyon.

⁸ Laj xjontolilob jini año' bʌ ti Galaad. Cabʌl mi' cha'leñob tsʌnsa.

⁹ Mi' muchq'uiñob i bʌ cha'an mi' chijtañob winicob. Che'ʌch mi' melob motomajob ja'el ya' ti' bijlel Siquem. Wen yujilob tsʌnsa yic'ot xujch'.

¹⁰ Leco jax chuqui tsaj q'uele ti Israel, come Efraín tsi' cʌyʌyon. Tsi' ch'ujutesa yambʌ dios. Tsi' cha'le jontolil.

¹¹ Lajal a mul Judá. Jini cha'an mi caj a toj che' ti' yorajlel.