Oseas 5 - Chol: I T’an Dios

I wocol Israel

¹ Ñich'tanla jini t'an, motomajob yic'ot yumʌlob ti Israel, yic'ot jini rey yic'ot i pi'ʌlob. Ti pejteletla mi caj la' toj la' mul, come tsa' la' soco winicob x'ixicob ya' ti Mizpa yic'ot ti Tabor. Tsa' la' cʌntesayob lot cha'an mi' ch'ujutesañob dioste' tac.

² Tsa'ix la' piqui tam bʌ ch'en ba' mi' yajlelob winicob ya' ti Acacia. Jini cha'an mi caj cʌq'ueñetla castigo ti pejteletla.

³ Israel (mu' bʌ i pejcʌntel ti Efraín) cʌmbilix c cha'an la' jontolil. Tsa'ix la' cʌyʌyon che' bajche' mi' cʌy i ñoxi'al jini ts'i'lel bʌ x'ixic. Tsa'ix la' soco la' bʌ ti jontolil.

⁴ Ma'anic mi la' sutq'uin la' bʌ ba' añon, come cʌchbiletla ti mulil. Laj xaxubil la' pusic'al ti la' ts'i'lel. Jini cha'an mach mejlic la' cʌñon, che'en lac Yum.

⁵ Woli' chañ'esan i bʌ Israel. Asibilix cha'an i mul. Judá ja'el woli' yʌsʌyel ti mulil. Temel mi caj i yajlelob.

⁶ Mi caj i tilelob yic'ot tiñʌme' yic'ot wacax cha'an mi' sajcañob lac Yum, pero mach i tajayobic, come tsa'ix ñumi i yorajlel. Tsi' tʌts'ʌ i bʌ lac Yum. Ma'anix woli' coltañob.

⁷ Come tsi' cʌyʌyob lac Yum. Tsi' sʌclayob yambʌ i ñoxi'al. Mach i cha'añobic lac Yum i yalobilob. Jini cha'an mach jalix mi caj i jisʌntelob yic'ot pejtel i chubʌ'an.

⁸ Wusula trompeta. Nijcanla ch'ojyel winicob ya' ti Gabaa, yic'ot ti Ramá, yic'ot ti Betavén. La' i cha'leñob bʌq'uen jini chumulo' bʌ ti Benjamín.

⁹ Tsa'ix c cha'le meloñel. Tsa'ix cʌc'ʌ c t'an. Mach mejlic ti q'uextiyel. Che' ti' yorajlel toj mulil, mi caj i laj jisʌntel i tejclum tac Israel.

¹⁰ Xujch'ob jini año' bʌ i ye'tel ti Judá. Lajalob bajche' winicob mu' bʌ i q'uextañob mojon tac. Tic mich'lel mi caj c jisañob che' bajche' ti but'ja'.

¹¹ Tsa'ix cʌc'ʌ c t'an cha'an mi' jisʌntel Efraín, come wen yujil tic'laya. Mach tojic mi' cha'len meloñel. Mi' yesman jini lolom tac bʌ.

¹² Jini cha'an mi caj c jisan Efraín che' bajche' sulujp mu' bʌ i c'ux pisil. Mi caj c jisʌben i p'ʌtʌlel Judá che' bajche' i joch'il te'.

¹³ Efraín yic'ot Judá tsa' caji' q'uelob i wocol. Tsi' c'ajti i coltʌntel Efraín ya' ti Asiria ba'an jini rey wen yujil bʌ guerra. Pero ma'anic i p'ʌtʌlel cha'an mi' coltan. Mach mejlic i lajmesʌben i chʌmel.

¹⁴ Joñon lajalon bajche' bajlum ti' tojlel Efraín yic'ot Judá. C'ax p'ump'uñob mi caj c jisañob che' bajche' mi' bic'ti c'ux i colojm jini bajlum. Ma'anix majqui mi caj i coltan.

Cha'chajp jax i pusic'al israelob

¹⁵ Jini cha'an joñon mi caj cʌyob. Mi caj c cha' majlel ba' tsa' tiliyon jinto mi' ña'tañob i mul. Che' jini mi caj i cha' sʌclañoñob. Che' cabʌlobix i wocol mi caj i cha' ña'tañoñob.