Oseas 4 - Chol: I T’an Dios

Lac Yum tsi' pejcayob jini israelob

¹ Israelob, yom mi la' ñich'tʌben i t'an lac Yum. Lac Yum woli' tsictesʌbeñet la' mul: Ma'anic i xuc'tilel la' pusic'al. Ma'anic la' wutslel. Ma'anic mi la' cʌn Dios.

² La' wujil p'ajoñel, yic'ot lot, yic'ot tsʌnsa, yic'ot xujch', yic'ot la' ts'i'lel, yic'ot leto. Cabʌl mi la' cha'len tsʌnsa.

³ Jini cha'an ch'ijiyem la' lumal yic'ot pejtel jini ya' bʌ chumulob. Ma'anix mi' yʌc' i wut la' lum. Wolix ti jilel jini bʌte'el tac am bʌ ti mate'el yic'ot te'lemut tac, yic'ot i chʌñil tac colem ja'.

⁴ Woliyetla ti wocol, pero mach cha'anic i mul yaño' bʌ, come junlajal an la' mul. Che' bajche' mi' melob motomajob, che'ʌch ja'el mi' melob winicob x'ixicob. Pero ñumen an i mul jini motomajob.

⁵ Junlajal an la' mul, motomajob yic'ot x'alt'añob. Ñʌmʌletla ti mulil. Mach la' wujilic quisin. Jini cha'an mi caj c jisan Israel.

⁶ Woli' laj jilelob c cha'año' bʌ cha'an ma'anic mi' cʌñoñob, cha'an mach la' womic la' cʌñon. Jini cha'an mach comix mi la' chʌn mel la' we'tel ti motomaj ja'el, come tsa' ñajʌyi la' cha'an c mandar. Jini cha'an mi caj la' ñajʌyel c cha'an. Ma'anix mi caj c chʌn p'untan la' walobilob.

⁷ Che' bajche' jaytiquilob jini motomajob, che'ʌch tsa' utsi p'ojli i mul tij contra. Tsi' cʌyʌ i subeñoñob c ñuclel cha'an mi' ch'ujutesañob dioste' tac. Quisintic jax mi' melob.

⁸ Tijicñayob jini motomajob che' cabʌl i mul c tejclumob. Mi' mulañob mulil.

⁹ Junlajalob winicob yic'ot motomajob. Cabʌl i mul. Jini cha'an mi caj cʌq'ueñob i toj. Mi caj c sutq'uibeñob i jontolil, che'en lac Yum.

¹⁰ Mi caj i cha'leñob we'el, pero ma'anic mi caj i ñaj'añob. Mi caj i cha'leñob ts'i'lel, pero ma'anic mi caj i p'ojlelob i yalobilob, come tsi' cʌyʌyoñob cha'an mi' ch'ujutesañob dioste' tac.

^11-12 I wo'lel ti lembal yic'ot i ts'i'lel mi' sʌtbeñob i pensar. Mi' lon c'ajtiñob i coltʌntel ti' tojlel dioste'. Mi' c'ajtiñob i toj'esʌntel ti te'. Tsa'ix sujtiyob ti tonto, come tsi' cʌyʌyoñob. Woli' ch'ujutesañob yambʌ dios mach bʌ diosic.

¹³ Mi' tsʌnsʌbeñob i majtan. Mi' pulbeñob pom ya' ti' chañelal wits, yic'ot ti bujtʌl, yic'ot ti yebal te'. Jini cha'an woli' cha'leñob ts'i'lel jini xch'oc bʌ la' walobilob.

¹⁴ Ma'anic mi caj cʌq'ueñob i toj i mul jini xch'oc bʌ la' walobilob yic'ot la' wʌ'lib, come junlajaletla. Mi la' cha'len ts'i'lel yic'ot ts'i'lel bʌ x'ixicob ya' ti Templo. Tontojetla. Jini cha'an junyajlel sajtemetla, come mach la' womic la' jac'beñon.

¹⁵ Anquese mi la' cha'len ts'i'lel, israelob, mach che'ic yom mi' melob jini año' bʌ ti Judá. Mach yomic mi la' majlel la' ch'ujutesañon ti Gilgal mi ti Betel che' bajche' mi' melob yaño' bʌ, come cha'chajp i pusic'al, come mi' lon c'ʌñob j c'aba' che' mi' pejcañob dioste'.

¹⁶ Pejtelel jini israelob tsi' ñusayob c mandar che' bajche' jontol bʌ ña' wacax mach bʌ yomic i q'uel i yum. Mach yomobic mij cʌntañob che' bajche' mi' cʌntʌntel alʌ tat tiñʌme'.

¹⁷ Come jini israelob cabʌl mi' c'uxbiñob dioste'. Tʌts'ʌ la' bʌ.

¹⁸ Che' mi' yujtelob ti lemoñel, mi' majlel i melob i ts'i'lel. Mi' mulañob jini quisintic jax bʌ. Mi' ts'a'leñob chuqui tac uts'at.

¹⁹ Jini cha'an talob i contrajob che' bajche' p'ʌtʌl bʌ ic' cha'an mi' wejlañob majlel. Quisintic jax mi caj i chʌmelob cha'an woli' tsʌnsʌbeñob i majtan jini dioste' tac.