Oseas 3 - Chol: I T’an Dios

Oseas yic'ot jini sts'i'lel bʌ x'ixic

¹ Lac Yum tsi' cha' subeyon: Yom ma' cha' pʌy a wijñam. Yom ma' c'uxbin a wijñam anquese mi' mulan i ts'i'lel. Come mic chʌn c'uxbin israelob anquese mi' ch'ujutesañob dioste' tac. Cabʌl mi' yʌq'ueñob i majtan tac, letsem bʌ i tojol, che'en lac Yum.

² Jini cha'an tsac cha' mʌñʌ jini x'ixic. Tsac tojo yic'ot jo'q'uejl i cha'c'al (25) sʌsʌc taq'uin yic'ot waxʌccujch cebada.

³ Tsac sube: Yomix ma' sujtel ti cotot quic'ot. Mach yomix ma' chʌn mel a ts'i'lel. Mach yomix ma' chʌn jac' a pʌyol ti yambʌ winic. Xuc'ul mi caj j cʌntañet, cho'on.

⁴ Jiñʌch i sujmlel iliyi: Cabʌl ora ma'anic i rey jini israelob. Ma'anic i yumob. Che' jach añob. Ma'anic mi caj i pulbeñon cotol bʌ c majtan. Ma'anic motomaj. Ma'anic majqui mi' cʌntesañob tic bijlel. Ma'anic i dioste' ja'el.

⁵ Che' ñumenix cabʌl ora mi caj i cha' sutq'uiñob i bʌ jini israelob cha'an mi' sʌclañob Dios, i Yum. Mi caj i cha' sutq'uiñob i bʌ cha'an mi' yumañob i Yalobil David, yajcʌbil bʌ ti Dios. Ti jini cojix bʌ q'uin tac mi caj i cha' bʌc'ñañob lac Yum. Mi caj i pijtañob i wenlel ti lac Yum.