Oseas 14 - Chol: I T’an Dios

Yom mi' cha' sutq'uiñob i bʌ ba'an lac Yum

¹ Awocolic, israelob, sutq'uin la' bʌ ba'an lac Yum, i Dios israelob, come ti' caj la' mul tsa' la' taja wocol.

² Yom mi la' c'ajtiben lac Yum ti wocol t'an: Lu' loc'sʌbeñon lojon c sojquemal. Pʌsbeñon lojon i yutslel a pusic'al. Yom uts'at ma' q'uelon lojon. Che' jini mi caj c sub lojon a ñuclel.

³ Come mach mejlic i coltañon lojon jini asiriajob. Ma'anix c p'ʌtʌlel lojon ti guerra. Mach chʌn ñuquix tic pusic'al lojon jini dioste' tac tsa' bʌ c mele lojon. Ma'anix mi caj c chʌn pejcañob ti dios. Ya' jach ti a tojlel, c Yum, mi' tajob i coltʌntel jini meba' alʌlob. Che' yom mi la' suben lac Yum ti oración.

⁴ Mi caj i yʌl: Joñon mi caj j coltañob. Mi caj cʌq'ueñob i p'ʌtʌlel cha'an xuc'ul mi' yajñelob quic'ot. Mi caj j c'uxbiñob ti' yutslel c pusic'al, come tsa'ix lajmi c mich'ajel ti' tojlelob.

⁵ Lajalon bajche' ye'eb ti tojlel jini israelob. Mi caj i cha' tajob i t'ojlʌwib che' bajche' lirio. Wen cʌyʌl i wi' ti lum che' bajche' i wi' ch'ujte' ti Líbano.

⁶ Mi caj i p'ojlelob che' bajche' i c'ʌb te'. Uts'atax mi caj i q'uejlel che' bajche' olivote'. Ñajt tsiquil i xojocñʌyel che' bajche' i yujts'il Líbano.

⁷ Mi caj i cha' tilelob israelob cha'an ñʌch'ʌl mi' yajñelob ti' yʌxñʌlel c tocal. Mi caj i cha' cuxtʌyelob che' bajche' mulbil bʌ pʌc'ʌbʌl. Mi' cajelob ti nich che' bajche' jini ts'usub. Mi caj i sujtel i yujts'il che' bajche' jini vino ya' ti Líbano.

⁸ Tsajaletme, Efraín, machme a ñochtan jini dioste' tac. Añet tic wenta. Cuxulon, cabʌlʌch c p'ʌtʌlel. Wolij q'uelet. Lajalon che' bajche' wen yʌx bʌ te' mu' bʌ i yʌq'ueñetla i wut ti pejtelel ora. Tilem ti joñon pejtel chuqui wen am bʌ a cha'an.

⁹ Jini am bʌ i ña'tibal, la' i ch'ʌmben isujm iliyi. Jini p'ip' bʌ i pusic'al la' i ñich'tan. Come tojʌch pejtelel c bijlel. Jini tojo' bʌ mi' cha'leñob xʌmbal ya'i, pero jini xmulilob mi' yajlelob. Che' tsi' yʌlʌ lac Yum.