Oseas 13 - Chol: I T’an Dios

Mi caj i lu' jisʌntel Israel

¹ Ti wajali tsi' cha'le yumʌl Efraín ti' tojlel israelob. Tsi' cha'leyob bʌq'uen winicob, come p'ʌtʌl Efraín. Pero tsi' cha'le mulil che' bʌ tsi' ch'ujutesa Baal. Jini cha'an tsa' chʌmi.

² Wʌle woli' yutsi cha'leñob mulil. Mi' yulmesañob taq'uin cha'an mi' melob i yejtal tac dios che' bajche' mi' bajñel ña'tañob, come i melbal jach winicob. Mi' yʌq'ueñob i majtan tac. Winicob mi' ts'ujts'uñob wacax.

³ Jini cha'an mi caj i jilelob che' bajche' tocal ti sʌc'ajel, yic'ot ye'eb, ora jach bʌ mi' jilel. Lajalob bajche' i sujl trigo mu' bʌ i wejluyel majlel ti p'ʌtʌl bʌ ic' che' woli' jajts'el trigo. Lajalob bajche' i yonlel buts' mu' bʌ i sʌc jilel ti ic'.

⁴ Joñon jach a Dioson, a Yumon, c'ʌlʌl che' bʌ tsac pʌyʌyet loq'uel ti Egipto. Ma'anic yambʌ Dios. Ma'anic yambʌ xColtaya, joñon jach.

⁵ Ya' tsaj cʌnta winicob x'ixicob ti colem bʌ i tiquiñal pañimil ba' ma'anic ja'.

⁶ Che' ñajobix, che' bʌ tsa' ujtiyob ti we'el, chan tsi' meleyob i bʌ. Tsa' ñajʌyiyon i cha'añob.

⁷ Jini cha'an mi caj c tilel ba' añob che' bajche' bajlum, che' bajche' mate'el ts'i' mu' bʌ i cha'len chijtaya ti' ti' bij.

⁸ Mi caj c bic'ti c'uxob che' bajche' ña' bajlum che' tsa'ix chilbenti i yal. Che' bajche' jontol bʌ bʌte'el mi caj c jisañob.

⁹ Che' mic jisañet, ¿majqui mi mejlel i coltañet?

¹⁰ ¿Bacan tsiquil a rey che' a wom a coltʌntel? ¿Bacan tsiquil jini año' bʌ i ye'tel ti a tojlel? Tsa'ix a c'ajtibeyon rey. La' i coltañet.

¹¹ Tsa cʌq'ueyet rey tic mich'lel. Tic mich'lel mi caj c cha' loc'san ti' ye'tel.

¹² Wen c'ajal c cha'an pejtel i mul Efraín. Mi caj i toj.

¹³ Che' bʌ tsa' tili wocol ti' tojlel Efraín che' bajche' i bajq'uel x'ixic, tonto tsi' mele i bʌ. Mach yomic loq'uel ti wocol cha'an mi' ch'ʌm i cuxtʌlel. Jini cha'an mi caj i chʌmel.

¹⁴ ¿Yom ba mij coltañob cha'an ma'anic mi' tojob i mul ti' yajñib chʌmeño' bʌ? Ma'anic mi caj c loc'sañob ba' woliyob ti chʌmel. La' i cha'leñob bʌq'uen che' colel i chʌmel. La' i ña'tañob mux caj i mujquelob ti mucoñibʌl. Ma'anic mij q'uex c t'an, che'en lac Yum.

¹⁵ Tsa' wen p'ojli i yalobilob Efraín yic'ot i chubʌ'an, pero lac Yum mi caj i choc tilel ic' loq'uem bʌ ti colem bʌ i tiquiñal pañimil cha'an mi' tiquin i lumal. Mi caj i laj tiquin pa' yic'ot i loq'uib ja'. Che' jini mi caj i chʌmelob cha'an tiquin ti'. Mi caj i tiquin pejtel i pʌc'ʌb.

¹⁶ Mi caj i jisʌntelob jini año' bʌ ti Samaria cha'an tsi' wersa ñusʌbeyob i t'an Dios. I contrajob mi caj i tsʌnsañob. Mi caj i pajq'uiñob jini alʌlob. Mi caj i tsepob loq'uel i yalobilob x'ixicob che' cʌntʌbilob to.