Oseas 12 - Chol: I T’an Dios

Tsa' tijq'ui Efraín cha'an i lot

¹ Jini israelob woli jach i tempañob ic' yubil. Come tsi' c'ajtiyob i coltʌntel ti Asiria yic'ot ti Egipto. Tsi' tojoyob ti aceite, pero woli jach i ñopob lot. Mi caj i jisʌntelob.

² Lac Yum mi caj i tsictesʌben i mul Judá. Mi caj i yʌq'uen i toj.

³ Come an i mul Jacob c'ʌlʌl che' bʌ tsi' yila pañimil. Tsi' contraji i yʌscun. Che' winiquix tsa' caji i contrajin lac Yum.

⁴ Tsʌts tsi' chucu jini ángel. Tsi' mʌlbe. Tsi' yuc'ta i bʌ. Tsi' wersa c'ajtibe i coltʌntel ti wocol t'an. Dios tsi' pejca ya' ti Betél che' bʌ tsi' tajayob i bʌ.

⁵ Lac Yum jiñʌch i Dios Panchan yic'ot Pañimil. Lac Yum jiñʌch i c'aba'.

⁶ La'la israelob, cha' sutq'uin la' bʌ ba'an Dios. Melela chuqui toj. C'uxbin la' bʌ. Yom mi la' wʌc' ti la' pusic'al chuqui mi caj i yʌq'ueñetla Dios.

⁷ Lajaletla bajche' mañajax bʌ xchoñoñelob. Mi la' wʌsin balanza cha'an mach ts'ʌcʌlic chuqui mi la' chon. Mi la' mulan xujch'.

⁸ Chan mi' mel i bʌ Efraín. Mi' yʌl: Wen chumulonix. Tic bajñelil tsac tempa cabʌl c chubʌ'an, che'en. Pero mach jasʌlic pejtel i chubʌ'an cha'an mi' toj i mul.

⁹ Woli' yʌl lac Yum: Joñon a Yumon, a Dioson c'ʌlʌl che' bʌ tsac loc'sayet ti majtan e'tel ya' ti Egipto. Mi caj c cha' aq'uet ti chumtʌl ti pisil bʌ otot tac che' bajche' ti' q'uiñilel lejchempat.

¹⁰ Tsa'ix c chocbeyet tilel x'alt'añob ti oñiyi c'ʌlʌl wʌle cha'an mi' tsictesʌbeñet a mul. Tsa cʌq'ueyob i q'uel chuqui mi' caj ti ujtel. Tsaj cʌntesayet ti lajiya tac.

¹¹ Pero ñʌmʌletla ti mulil ya' ti Galaad. Lolom jach mi la' cha'len ch'ujutesaya. Ya' ti Gilgal tsa' la' pulbeyob i majtan xibajob. Tsolol tac pulʌntib che' bajche' xajlel ti' t'ejl top'bil bʌ lum.

¹² Jacob tsa' puts'i majlel ti Siria ba' tsa' jal'a ti e'tel. Tsa' ochi ti xcʌnta tiñʌme' cha'an mi' taj i yijñam.

¹³ Tsac choco majlel x'alt'an cha'an mi' loc'san i p'olbal Jacob ya' ti Egipto. Tsi' toj'esayob tilel. Tsi' cʌntayob.

¹⁴ Pero i p'olbal Efraín tsi' techbeyon c mich'ajel. Jini cha'an ma'anic mi caj c ñusʌbeñob i mul. Mi caj cʌc'ob ti chʌmel. Mi caj i tojob i mul, che'en lac Yum.