Oseas 11 - Chol: I T’an Dios

Lac Yum tsi' cha' p'unta i tejclum

¹ Che' maxto anic i jabilel yilal jini calobil Israel, tsac wen c'uxbi. Tsac pʌyʌ loq'uel ti Egipto.

² Pero che' bʌ tsac pʌyʌyob, tsi' tʌts'ʌyob i bʌ tic tojlel. Tsa' utsi ñusʌbeyon c t'an. Tsi' yʌq'ueyob i majtan jini dios Baal. Tsi' pulbeyob pom jini dioste' tac.

³ Joñon tsac chucbeyob i c'ʌb che' bʌ tsa' cajiyob ti xʌmbal, pero maxto yujilobic mi tsaj cosayob joñon. Mach yomobic i cʌñon.

⁴ Tsac pʌyʌyob ti' yutslel c pusic'al che' bajche' ma' pʌy a wacax mu' bʌ a c'uxbin. Ma' jitben i lazo cha'an mi' cha'len buc'bal. Che' tsaj c'uchchoco c bʌ cha'an mij coltan jini israelob. Joñon tsac we'sayob.

⁵ Pero mi caj i cha' sujtelob ti Egipto yic'ot ti Asiria, come mach yomobix sujtel ba' añon.

⁶ Mi caj i yutsi p'ojlel guerra ya' baqui chumulob. I contrajob mi caj i wersa ochelob ti ts'ajquibil bʌ i tejclum.

⁷ C cha'año' bʌ tsi' junyajlel cʌyʌyoñob. Anquese jini x'alt'añob mi' subeñob cha'an mi' pejcañob Dios am bʌ ti Chan, pero mach yomobic.

⁸ ¿Bajche' mi mejlel j cʌyet, Efraín? ¿Mejl ba c choquet, Israel? Mach comic j cʌyet che' bajche' Adma yic'ot Zeboim, come wolic wen mel c pusic'al. Com j coltañet.

⁹ Anquese cabʌl c mich'ajel, ma'anic mi caj c cha' jisañet, Efraín. Come joñon Dioson. Mach lajalonic bajche' winicob. Joñoñʌch jini Ch'ujul Bʌ ti la' tojlel. Mach cha'anic jisaya tsa' tiliyon.

¹⁰ Mi caj i ñopon. Joñon mi caj c cha'len oñel che' bajche' bajlum. Tsiltsilñayob ti bʌq'uen mi caj i tilelob calobilob loq'uemo' bʌ ti' bʌjlibal q'uin.

¹¹ Mi caj i tilelob jini año' bʌ ti Egipto che' bajche' xwejlel mut ñajt bʌ mi' cha'len wejlel. Che' bajche' x'ujcuts mi caj i tilelob, loq'uemo' bʌ ti Asiria. Joñon mi caj c cha' pʌyob tilel ti' lumal. Jiñʌch c t'an mu' bʌ cʌc', che'en lac Yum.

¹² Xlotob jini israelob, cha'p'ejl jax i pusic'al, pero mi' chʌn bʌc'ñañoñob jini año' bʌ ti Judá. Chʌn xuc'ul mi' yajñelob yic'ot jini Ch'ujul Bʌ.