Oseas 1 - Chol: I T’an Dios

Mach xuc'ulic i yijñam Oseas

¹ Lac Yum tsi' pejca Oseas (i yalobil Beeri) che' woliyob ti yumʌntel ti Judá jini reyob Uzías yic'ot Jotam yic'ot Acaz yic'ot Ezequías. Ti jim bʌ ora woli ti yumʌntel jini rey Jeroboam (i yalobil Joás) ya' ti Israel.

² Jiñʌch ñaxan bʌ t'an tsa' bʌ subenti Oseas cha'an lac Yum: Yom ma' pʌy cha'an a wijñam juntiquil x'ixic mu' bʌ caj i cʌyet cha'an i ts'i'lel. Che' jini mi caj i yʌq'ueñet a majan alobil cha'an i ts'i'lel. Che'i mi caj c tsictesan i ts'i'lel c winicob x'ixicob. Woli' cʌyoñob. Woli' ch'ujutesañob dioste' tac, che'en.

³ Oseas tsa' majli i pʌy jini x'ixic i c'aba' Gomer (i yalobil Diblaim). Tsa' caji' cʌntan i yalobil. Tsi' yʌc'ʌ ti pañimil ch'iton bʌ i yalobil.

^4-5 Lac Yum tsi' sube Oseas: Yom ma' wotsʌben i c'aba' ti Jezreel, come ya' ti joctʌl i c'aba' Jezreel mi caj cʌq'ueñob i toj i mul i p'olbal jini rey Jehú cha'an tsi' cha'le tsʌnsa Jehú ya' ti Jezreel. Mi caj c jisʌben i yumʌntel Israel ya' ti Jezreel. Mach jalix mi' caj ti ujtel, che'en.

⁶ Gomer (i yijñam Oseas) tsi' cha' cʌnta yambʌ i yalobil. Lac Yum tsi' sube jini x'alt'an: Yom ma' wotsʌben i c'aba' jini xch'oc Loruhama (mi' yʌl ti lac t'an: “Ma'anix i p'untʌntel”), come ma'anix mi caj c chʌn p'untan israelob. Ma'anix mic chʌn ñusʌbeñob i mul.

⁷ Pero mi caj c p'untan jini año' bʌ ti Judá. Tic bajñel p'ʌtʌlel mi caj j coltañob loq'uel ti' c'ʌb i contrajob. Ma'anic mi caj j c'ʌn soldadojob mi e'tijibʌl cha'an guerra cha'an mij coltañob. Che' tsi' yʌlʌ lac Yum.

⁸ Che' cʌybilix i chu' jini alʌl Loruhama, tsa' cha' caji i cʌntan i yalobil Gomer (i yijñam Oseas). Tsi' q'uele pañimil alʌ ch'iton.

⁹ Lac Yum tsi' sube Oseas: Yom ma' wotsʌben i c'aba' Loammi (mi' yʌl ti lac t'an: “Mach c cha'añetic”), come jatetla mach c pi'ʌleticla, mach la' Diosonic.

¹⁰ Pero tal i yorajlel che' mi caj i p'ojlelob israelob che' bajche' i yonlel i ji'il colem ñajb mach bʌ mejlic ti tsicol. Ti jim bʌ ora ma'anix mi caj c chʌn subeñob: “Mach c cha'añeticla”. Mi caj c pejcañob ti calobil: “I yalobilet bʌ la jini cuxul bʌ Dios”. Che' mi caj c subeñob.

¹¹ Jini año' bʌ ti Judá yic'ot Israel mi caj i tem ajñelob ti junmojt jach. Mi caj i tem yumañob juntiquil yumʌl. Mi caj i cha' loq'uelob ba' cʌchʌlob. Wen tijicña jini q'uin che' temel mi' sujtelob ti' lumal. Dios mi caj i cha' otsañob ti jini wen bʌ lum tsa' bʌ i yʌq'ueyob, che'en.