Numeros 5 - Chol: I T’an Dios

Mi' chojquel loq'uel chuqui bibi'

^1-2 Lac Yum tsi' sube Moisés: Subeñob pejtelel jini israelob cha'an mi' chocob loq'uel pejtelel año' bʌ leco bʌ i tsoy, yic'ot pejtelel mach bʌ anic mi' tijq'uel i q'uel i c'amʌjel, yic'ot pejtelel tsa' bʌ i tʌlʌ xchʌmel.

³ Che'ʌch yom mi la' melob, mi winic mi x'ixic, cha'an ma' chocob loq'uel ya' baqui jijlemetla, cha'an ma'anic mi la' bib'esan jini ajñibʌl baqui mi cajñel quic'otetla.

⁴ Jini cha'an che'ʌch tsa' caji i melob israelob che' bajche' lac Yum tsi' sube Moisés.

I q'uexol jontolil

^5-6 Lac Yum Dios tsi' sube Moisés: Subeñob israelob: Jujuntiquil winic mi x'ixic che' mi' cha'len mulil ti' contra yambʌ, jiñʌch mulil tij contra ja'el. Añʌch ti' bajñel wenta i mul.

⁷ Wersa yom mi' sub i mul tsa' bʌ i mele. Wersa yom mi' toj yic'ot i ñumel. Yom cha'yajl i diezmojlel i ñumel mi' cha' aq'uen i yum che' bajche' tsi' xujch'i.

⁸ Pero mi tsa' chʌmi jini winic tsa' bʌ tic'lʌnti, mi ma'anix lʌc'ʌl bʌ i pi'ʌl, la' aq'uentic jini motomaj i tojol tic wut. La' aq'uentic jini motomaj juncojt i tat tiñʌme' cha'an mi' ñusʌbentel i mul.

^9-10 Pejtelel jini majtañʌl tac yic'ot ch'ujul tac bʌ mu' bʌ i yʌc'ob jini israelob, i cha'añʌch jini motomajob, che'en lac Yum Dios.

Mandar cha'an tsʌytsʌyña bʌ i pusic'al

^11-13 Che' ja'el lac Yum tsi' cha' sube Moisés: Yom ma' suben pejtelel israelob: Mi tsi' taja i ts'i'lel juntiquil x'ixic am bʌ i ñoxi'al, anquese ma'anic majch tsi' q'uele come mucul jach tsi' cha'leyob mulil,

^14-15 mi tsʌytsʌyña i pusic'al i ñoxi'al come mach yujilic mi an i mul o mi ma'anic i mul, la' i pʌy majlel i yijñam ba'an jini motomaj temel yic'ot majtañʌl. Yom uxp'ejl kilo cebada, pero mach yomic che' juch'bil yic'ot aceite, yic'ot che' xʌbʌl ti pom, come jiñʌch majtañʌl mu' bʌ i yʌc' jini tsʌytsʌyña bʌ i pusic'al cha'an mi' yʌc' ti ña'tʌntel jini mulil.

¹⁶ Jini motomaj mi' pʌy jini x'ixic cha'an mi' lʌc'tesan i bʌ ba' añon.

¹⁷ Jini motomaj mi' ch'ʌm jini vaso but'ul bʌ ti ch'ujul bʌ ja'. Mi' ch'ʌm ja'el jini ts'ubejn am bʌ ti lum ti' mal jini Tabernáculo. Mi' yotsan yic'ot jini ja'.

¹⁸ Jini motomaj muq'uix i suben wa'tʌl jini x'ixic tic tojlel. Che' jini mi' ticben i jol jini x'ixic. Mi' yʌq'uen i chuc jini cebada mu' bʌ i yʌc' ti ña'tʌntel i mul che' tsʌytsʌyña i pusic'al i ñoxi'al. Jini motomaj yom chucbil i cha'an jini vaso but'ul bʌ ti ch'aj bʌ ja' mu' bʌ i yʌc' ti wocol jini am bʌ i mul.

¹⁹ Jini motomaj mi caj i suben jini x'ixic: “Mi isujm ma'anic majch tsa' tots'le a wic'ot, mi ma'anic tsa' mele a ts'i'lel, coltʌbiletix wʌle che' ma' jap ili ch'aj bʌ ja' mu' bʌ i yʌc' ti ña'tʌntel a mul.

²⁰ Pero mi tsa' loq'uiyet ti' tojlel a ñoxi'al, mi tsa' mele a ts'i'lel, mi tsa' pi'le yambʌ winic, yom ma' sub a bʌ wʌle ti' tojlel Dios.

^21-22 Mi ma'anic ma' sub a bʌ, la' i yʌq'ueñet lac Yum a wocol cha'an mi' q'uelob pejtelel a pi'ʌlob. Muq'uix i yʌq'ueñet lac Yum i c'unlel a bʌc'tal. Muq'uix i yoc'mʌl a ya'. Muq'uix i sijt'el i mal a ñʌc'”. Che'ʌch mi caj i yʌl jini motomaj. Jini x'ixic wersa mi' yʌl: “Che'ʌch yom”, che'en.

²³ Jini motomaj yom mi' ts'ijban ti jun pejtel ili wocol mu' bʌ caj i yujtel. Muq'uix i poc loq'uel jini t'an yic'ot jini ch'aj bʌ ja'.

²⁴ Muq'uix i yʌq'uentel i jap jini ch'aj bʌ ja' mu' bʌ i yʌc' ti wocol jini x'ixic. Jini ja' mi caj i jajpel cha'an mi' yʌq'uen cabʌl wocol.

²⁵ Jini motomaj mi caj i ch'ʌmben jini majtañʌl chucbil bʌ ti' c'ʌb jini x'ixic. Mi caj i jʌmts'un tic tojlel. Mi caj i yʌc' ya' ti pulʌntib.

²⁶ Mi caj i jop junmujch' jini majtañʌl woli bʌ i yʌc' jini x'ixic cha'an mi' yʌc' ti pulel ya' ti pulʌntib. Ti wi'il muq'uix i yʌq'uen i jap jini ja' jini x'ixic.

²⁷ Mi isujmʌch tsi' mucu mele i mul ti' tojlel i ñoxi'al, jini ch'aj bʌ ja' mi caj i yochel ti' mal cha'an mi' yʌq'uen i wocol. Mi caj i sijt'el i mal i ñʌc'. Mi caj i laj c'un'an i bʌc'tal. Jini x'ixic chocbil mi caj i cʌytʌl. Mi caj i ts'a'lentel cha'an i pi'ʌlob.

²⁸ Pero mi ma'anic tsi' cha'le mulil jini x'ixic, mi sʌcʌch, ma'anic chuqui mi caj i tumben. Libre mi' cʌytʌl cha'an pejtelel wocol. Uts'at mi caj i cʌntan i yalobilob.

²⁹ Jiñʌch ili mandar cha'an mulil che' tsʌytsʌyña i pusic'al winic cha'an woli' ña'tan mach xuc'ulic i yijñam, cha'an woli' pejcan yambʌ winic.

³⁰ Mi caj i tsictiyel mi xuc'ul i yijñam, o mi mach xuc'ulic. Mi caj i pʌy tilel i yijñam ba' añon. Jini motomaj mi caj i mel che' bajche' tsac sube ti mandar.

³¹ Jini i ñoxi'al libre an. Jini mulil an ti' wenta i yijñam cha'an mi' toj. Che' tsi yʌlʌ lac Yum.