Numeros 32 - Chol: I T’an Dios

Rubén yic'ot Gad mi' yajñelob ti' pasibal q'uin ya' ti Jordán

¹ Wen cabʌl jax i wacax i yalobilob Rubén yic'ot i yalobilob Gad. Jini cha'an tsa' caji i ña'tañob majlel ya' ti' lum Jazer yic'ot ti Galaad, come tsi' q'ueleyob uts'atax mi' colel wacax ya'i.

² Jini cha'an tsa' c'otiyob ba'an Moisés yic'ot ba'an jini motomaj Eleazar ti' tojlel jini ñuco' bʌ i ye'tel.

^3-4 Tsi' yʌlʌyob: Anix lac cha'an cabʌl tejclum tsa' bʌ i yʌq'ueyonla lac Yum: Atarot, Dibón, Jazer, Nimra, Hesbón, Eleale, Sebam, Nebo yic'ot Beón. Lac Yum tsi' laj ac'ʌ ti' wenta israelob che' bʌ tsa' loq'uiyonla ti guerra. Wen uts'atax ili lum cha'an mic p'ol lojon wacax. Tsa'ix wen p'ojli lojon c wacax. Joñon lojon yic'ot pejtelel i yalobilob Rubén, yic'ot i yalobilob Gad a winicon lojon.

⁵ Jini cha'an mi uts'at ma' q'uelon lojon, aq'ueñon lojon ili lum wʌ' ba' añon lojon. Mach ma' wersa pʌyon lojon majlel ti junwejl Jordán ja', che'ob.

^6-7 Moisés tsi' subeyob i yalobilob Rubén yic'ot i yalobilob Gad: ¿I bajñelob ba mi' majlelob la' pi'ʌlob ti guerra che' mi la' cʌytʌl ilayi?

⁸ Come che'ʌch tsi' meleyob la' ñojte'elob, che' bʌ tsac chocoyob loq'uel ti Cades Barnea cha'an mi' majlel i tsajiñob jini lum.

⁹ Tsa' letsiyob majlel ti' bijlel Escol c'ʌlʌl ba' tsa' mejli i wen q'uelob jini lum. Pero ti wi'il tsa' caji i socbeñob i pensar israelob. Tsi' subeyob cha'an mach mejlicob ti ochel ti jini lum ba' mi caj i yʌq'ueñob lac Yum.

^10-11 Jini cha'an lac Yum Dios tsa' wen mich'a. Tsi' yʌlʌ: “Ma'anic mi caj i wis q'uelob jini lum mi juntiquilic ti pejtelel jini winicob tsa' bʌ loq'uiyob ti Egipto año' bʌ jujunc'al i jabilelob yic'ot jini ñumen taquix bʌ ti junc'al. Mach ochiquetla ya' ti jini lum tsa' bʌ cʌq'ueyob la' ñojte'elob, Abraham, Isaac, yic'ot Jacob, come an la' mul cha'an ma'anic tsa' la' tsajcayon ti pejtelel la' pusic'al.

¹² Cojach jini Caleb i yalobil Jefone jini cenezeo yic'ot Josué (i yalobil Nun), tsi' tsajcayon ti pejtelel i pusic'al”, che'en.

¹³ Jini cha'an lac Yum tsi' mich'le jini israelob. Cha'c'al jab tsi' yʌc'ʌyob ti joy xʌmbal ti colem bʌ i tiquiñal pañimil, jinto tsa' laj jiliyob jini winicob tsa' bʌ i ñusʌbeyob i t'an lac Yum Dios.

¹⁴ Wʌ'ix añetla i yalobilet bʌ la. I q'uexoletla. Lajal la' mul. Junlajal xjontoliletla. La' womix la' wutsi p'olben i mich'ajel lac Yum ti' tojlel israelob.

¹⁵ Mi mux la' cha' cʌy la' tsajcan lac Yum, mi caj i cha' cʌy jini israelob ti colem bʌ i tiquiñal pañimil. Mi caj i laj jisañob cha'an ti' caj la' mul. Che' tsi' yʌlʌ Moisés.

^16-17 Pero jini winicob tsi' jac'beyob ti uts bʌ t'an: Mux c mel lojon corral tac cha'an c tiñʌme' lojon yic'ot tejclum tac ba' mi' cajelob ti chumtʌl calobil lojon. Pero joñon lojon muq'uix c chajpan lojon c bʌ cha'an mic majlel lojon ti guerra ti' tojel i wut pejtelel israelob. Mux c tem sʌclʌben lojon i lumil i chumlibob.

¹⁸ Jinto che' bʌ tsa'ix i tajayob ba' mi' chumtʌlob pejtelel israelob, muq'uix c cha' sujtel lojon ti cotot.

¹⁹ Che' ma' wʌq'ueñon lojon ili lum woli bʌ j c'ajtin lojon, che' jini mach comix lojon yambʌ lum ya' ti junwejl Jordán ba' mi caj i ch'ʌmob c pi'ʌlob lojon, che'ob.

²⁰ Moisés tsi' subeyob: Mi muc'ʌch la' mel che' bajche' woli la' wʌl, uts'atʌch. Chajpan la' bʌ ti guerra ti' tojlel lac Yum.

²¹ Cucula ti junwejl Jordán yic'ot pejtelel la' pi'ʌlob chajpʌbilo' bʌ cha'an guerra. Coltan la' pi'ʌlob ti Israel jinto mi' jisan la' contrajob jini lac Yum.

²² Che' bʌ tsa'ix i ch'ʌmʌ jini lum lac Yum Dios, che' jini librejix mi caj la' wajñel ti' tojlel lac Yum yic'ot ti' tojlel israelob. Uts'at mi la' sujtel. Che' jini la' cha'añʌch mi' cʌytʌl ili lum am bʌ ti' tojel Jordán ba' mi' pasel q'uin.

²³ Pero mi mach che'ic tsa' la' mel, jiñʌch la' mul ti' contra lac Yum. Yom mi la' ña'tan che' jini, jini la' mul wersa mi caj i yʌq'uetla ti wocol.

²⁴ Yom mi la' mel che' bajche' tsa' la' wʌlʌ. Chajpʌbenla i yotot la' walobilob, yic'ot corral tac cha'an la' tiñʌme'. Che' jini cucula la' wic'ot la' pi'ʌlob. Melela che' bajche' tsa' la' subu. Che' tsi' yʌlʌ Moisés.

²⁵ I yalobilob Rubén yic'ot i yalobilob Gad tsi' subeyob Moisés: A winicon lojon. Ts'ʌcʌl mi caj c mel lojon che' bajche' tsa' wʌlʌ.

²⁶ Wʌ' mi caj i cʌytʌl calobil lojon, yic'ot quijñam lojon, yic'ot c wacax lojon yic'ot c tiñʌme' lojon, wʌ' ti Galaad.

²⁷ Joñon lojon mi caj c chajpan lojon c bʌ cha'an mic majlel lojon ti guerra. Mi caj j c'axel lojon ti junwejl ja' ti' tojlel lac Yum Dios che' bajche' tsa' wʌlʌ, che'ob.

²⁸ Jini cha'an Moisés tsi' pejca jini motomaj Eleazar, yic'ot Josué (i yalobil Nun), yic'ot jini tatʌlob che' bajche' jaymojt i p'olbal israelob. Tsi' subeyob:

²⁹ I yalobilob Rubén yic'ot i yalobilob Gad muc' abi i majlelob la' wic'otob ti guerra ti junwejl Jordán. Mi che'ʌch tsa' caji i melob, la' wocolic la' i ch'ʌmob jini lum wʌ' ba' mi' pasel q'uin. Aq'ueñob i lum Galaad cha'an mi' ch'ʌmob.

³⁰ Pero mi ma'anic tsa' c'axiyob majlel ya' ti junwejl ja' la' wic'ot, che' jini wersa mi caj i tem t'oxbeñetla jini lum la' wic'ot ti Canaán, che'en Moisés.

³¹ I yalobilob Gad yic'ot i yalobilob Rubén tsi' jac'ʌyob: Ts'ʌcʌl mi caj c mel lojon pejtelel mu' bʌ i subeñon lojon lac Yum.

³² Muc'ʌch caj c chajpan lojon c bʌ cha'an guerra cha'an mij c'axel lojon ti Canaán temel quic'otetla. Pero ñaxan yom mic ch'ʌm lojon c lum ila ti' tojel Jordán ba' mi' pasel q'uin, che'ob.

³³ Jini cha'an Moisés tsi' yʌq'ueyob i lum i p'olbal Rubén, yic'ot i p'olbal Gad, yic'ot ojlil i p'olbal Manasés i yalobil bʌ José. Tsa' aq'uentiyob jini lum tsa' bʌ chilbentiyob Sehón i yum amorreojob, yic'ot Og jini yumʌl ti Basán. Tsi yʌq'ueyob ja'el pejtelel i tejclum tac wa'chocobil bʌ i cha'añob ti yambʌ ora.

^34-36 I yalobilob Gad tsi' meleyob jini tejlcum tac: Dibón, Atarot, Aroer, Atarot Sofán, Jazer, Jogbeha, Betnimra, Betarán, jiñʌch ñuc bʌ tejclum tac ts'ajquibil bʌ. Tsi' meleyob ja'el i buc'ujibob i tiñʌme'ob.

^37-38 I yalobilob Rubén tsi' meleyob jini tejclum tac: Hesbón, Eleale, Quiriataim, Nebo, Baalmeón yic'ot Sibma. Tsa' cajiyob ti chumtʌl ya'i. (Jini israelob tsi' cha' q'uextʌbeyob lamital i c'aba' tac.)

³⁹ I yalobilob Maquir yic'ot i yalobilob Manasés tsa' majliyob ti Galaad. Tsi' wersa chilbeyob i lum jini amorreojob ya' ba' chumulob.

⁴⁰ Moisés tsi' yʌq'ueyob i lum Galaad pejtelel i yalobilob Maquir i p'olbal bʌ Manasés. Jini cha'an ya' tsa' cajiyob ti chumtʌl.

⁴¹ Jini Jair, i yalobil Manasés, tsi' ch'ʌmʌ cabʌl xchumtʌl tac ti Galaad. Tsi' yotsʌbe i c'aba' Havot Jair.

⁴² Che' ja'el Noba yic'ot i soldadojob tsi' ch'ʌmʌ jini Kenat yic'ot xchumtʌl tac. Tsi' yotsʌbe i c'aba' Noba i q'uexolʌch jini xchumtʌl.