Numeros 28 - Chol: I T’an Dios

Majtañʌl cha'an jujump'ejl q'uin, jujump'ejl uw, yic'ot i q'uiñilel c'aj o

^1-2 Lac Yum tsi' sube Moisés: Che'ʌch yom ma' subeñob israelob: Ch'ʌmbeñonla tilel c majtan che' ti yorajlel. Jini c majtan mu' bʌ a pulbeñon ti pulʌntib i wentajʌch i bʌl c ñʌc' xojocña bʌ i yujts'il.

³ Jini pulbil bʌ majtañʌl yom bʌ mi la' wʌq'ueñon jiñʌch iliyi: Cha'cojt alʌ tat tiñʌme' mach bʌ i p'ajomalic an jaxto bʌ jump'ejl i jabilel. Ti jujump'ejl q'uin yom cha'cojt alʌ tat tiñʌme',

⁴ juncojt che' ti sʌc'ajel, yambʌ juncojt che' mi' bʌjlel q'uin.

⁵ Che' ma' wʌc' jujunyajl pulbil bʌ c majtan, aq'ueñon ja'el majtañʌl bʌ harina, uxp'ejl litro juch'bil bʌ harina xajc'ubil yic'ot ojlil i cha'p'ejl litro aceite, che'en lac Yum.

⁶ Mach la' cʌy la' wʌq'uen lac Yum i majtan tsa' bʌ i subeyetla ya' ti wits i c'aba' Sinaí, come xojocña mi' yubin jini pulbil bʌ i majtan.

⁷ Ti jini jach bʌ ora yom mi la' wʌq'uen japbil bʌ i majtan, ojlil i cha'p'ejl litro vino yic'ot jujuncojt alʌ tat tiñʌme' cha'an mi la' jeb loq'uel jini vino ya' ti Ch'ujul bʌ Ajñibʌl ti' tojlel lac Yum.

⁸ Mi caj la' tsʌnsan yambʌ juncojt che' wolix ti bʌjlel q'uin. Aq'uenla yic'ot jini majtañʌl bʌ harina ja'el, yic'ot jini japbil bʌ i majtan. Jiñʌch pulbil bʌ i majtan xojocña bʌ mi' yubin.

⁹ Che' ti' yorajlel c'aj o, yom mi la' wʌq'uen cha'cojt alʌ tat tiñʌme' am bʌ jump'ejl i jabilel mach bʌ i p'ajomalic, yic'ot wʌcp'ejl litro majtañʌl bʌ harina xajc'ubil bʌ yic'ot aceite. Yom japbil bʌ majtañʌl ja'el.

¹⁰ Jiñʌch jini majtañʌl yom bʌ mi' yʌjq'uel che' ti yorajlel tac c'aj o. Parte jini mu' bʌ i yʌjq'uel ti jujump'ejl q'uin.

¹¹ Che' ja'el ti' tejchibal tac jujump'ejl uw, yom mi la' wʌq'uen yambʌ pulbil bʌ i majtan. Yom cha'cojt alʌ tat wacax yic'ot juncojt tat tiñʌme', yic'ot wuccojt alʌ tat tiñʌme' am bʌ jujump'ejl i jabilel mach bʌ i p'ajomalic.

¹² Ti jini jach bʌ ora mi caj la' wʌq'uen lac Yum majtañʌl bʌ harina chʌmen juch'bil bʌ, xajc'ubil bʌ yic'ot aceite. Yom bolomp'ejl litro yic'ot jujuncojt alʌ tat wacax. Yom wʌcp'ejl litro temel yic'ot jini tat tiñʌme'.

¹³ Yom uxp'ejl litro yic'ot jujuncojt alʌ tat tiñʌme'. Jiñʌch pulbil bʌ i majtan, xojocña bʌ mi' yubin.

¹⁴ Che' mi la' wʌq'uen jujump'ejl i majtan, yom mi la' wʌq'uen japbil bʌ i majtan ja'el. Jiñʌch uxp'ejl litro vino yic'ot jujuncojt alʌ tat wacax, cha'p'ejl litro vino yic'ot jujuncojt alʌ tat tiñʌme', ojlil i cha'p'ejl litro yic'ot jujuncojt tiñʌme'. Pejtelel jini jiñʌch pulbil bʌ i majtan yom bʌ mi' yʌq'uentel ti jujump'ejl uw. Mach yomic mi la' cʌy la' wʌq'uen.

¹⁵ Che' ja'el ti' tejchibal jujump'ejl uw yom mi la' wʌq'uen juncojt tat chivo cha'an mi' ñusʌbeñetla la' mul. Jiñʌch yambʌ i majtan. Parte jini majtañʌl mu' bʌ la' wʌq'uen ti jujump'ejl q'uin.

Majtañʌl che' mi' cha'leñob q'uiñijel

¹⁶ Lac Yum tsi' yʌlʌ: Mi caj la' mel jini q'uin cha'an Pascua che' ti' chʌnlujump'ejlel tsic che' ti ñaxan bʌ uw. (Jini Pascua jiñʌch i q'uiñilel che' bʌ tsa' ñumi jini ángel ti Egipto, che' bʌ tsi' p'unta jini ascuñʌl bʌ i yalobilob israelob. Ma'anic tsi' tsʌnsayob.)

¹⁷ Che' ti yijc'ʌlal mi caj i tejchel tijicña bʌ q'uiñijel. C'ʌlʌl ti wucp'ejl q'uin mach yomic mi' wis c'uxtʌl jini waj am bʌ i levadurajlel.

¹⁸ Yom ch'ujul mi la' tempan la' bʌ ti jini ñaxan bʌ q'uin. Mach yomic mi la' cha'len e'tel.

¹⁹ Aq'ueñon jini pulbil tac bʌ c majtan jini mu' bʌ a wʌq'ueñon che' ti' tejchibal tac uw: Cha'cojt alʌ tat wacax, yic'ot juncojt tat tiñʌme', yic'ot wuccojt alʌ tat tiñʌme' am bʌ jujump'ejl i jabilel, mach bʌ i p'ajomalic, mach bʌ anic i lojwemal yic'ot i chʌmel.

^20-21 Yom an i ñujp ti ac'ol jini majtañʌl. Jiñʌch majtañʌl bʌ harina wen chʌmen bʌ juch'bil, xajc'ubil bʌ yic'ot aceite. Yom bolomp'ejl litro aceite, yic'ot jujuncojt alʌ tat wacax, wʌcp'ejl litro cha'an i ñujp jini tat tiñʌme', uxp'ejl litro cha'an jujuncojt alʌ tat tiñʌme', wuccojt tiñʌme' che' ti' pejtelel.

²² Yom ja'el juncojt tat chivo cha'an i tojol la' mul.

^23-24 Pejtelel iliyi mi caj la' wʌc' che' ti' yorajlel i q'uiñilel. Che'ʌch mi caj la' wʌc' ti jujump'ejl q'uin c'ʌlʌl mi' joloñel jini q'uin cha'an Pascua. Jiñʌch xojocña bʌ c majtan tac. Parte mi caj la' wʌq'ueñon jini yan tac bʌ c majtan che' bajche' la' tilel mi la' mel ti jujump'ejl q'uin.

²⁵ Che' ti' wucp'ejlel q'uin, yom ch'ujul mi la' tempan la' bʌ. Mach yomic mi la' cha'len e'tel.

²⁶ Mi caj la' cha'len q'uiñijel ja'el che' ti' yorajlel Pentecostés che' mi la' tuc' jini ñaxan bʌ i wut la' pʌc'ʌb cha'an mi la' wʌq'uen la' Yum. Yom ch'ujul mi la' tempan la' bʌ ti la' pejtelel cha'an mi la' mel jini q'uin cha'an c'ajbal. Mach yomic mi la' cha'len e'tel.

²⁷ Mi caj la' wʌq'ueñon pulbil bʌ c majtan xojocña bʌ mi cubin. Yom cha'cojt alʌ tat wacax, yic'ot juncojt tat tiñʌme', yic'ot wuccojt alʌ tat tiñʌme' am bʌ jump'ejl i jabilel.

^28-29 Yom i ñujp ti ac'ol jini majtañʌl. Jiñʌch majtañʌl bʌ harina wen chʌmen bʌ juch'bil, xajc'ubil bʌ yic'ot aceite. Yom bolomp'ejl litro cha'an jujuncojt alʌ tat wacax, wʌcp'ejl litro cha'an jini tat tiñʌme', uxp'ejl litro cha'an jujuncojt tiñʌme', wuccojt alʌ tat tiñʌme' che' ti pejtelel.

³⁰ Che' ja'el yom juncojt tat chivo cha'an i ñusʌntel la' mul.

³¹ Parte yom pejtelel c majtan mu' bʌ la' wʌq'ueñon che' ti' yorajlel i q'uiñilel. Parte jini mu' bʌ la' wʌq'ueñon ti jujump'ejl q'uin. Mach yomic che' an i lojwemal jini alʌc'ʌl tac mu' bʌ la' wʌq'ueñon.