Numeros 26 - Chol: I T’an Dios

Tsi' tsiquiyob israelob che' ya' añob ti Moab

¹ Che' lajmenix jini bʌbʌq'uen bʌ chʌmel, lac Yum tsa' caji i pejcan Moisés yic'ot Eleazar, i yalobil jini motomaj Aarón:

² Yom mi la' chuc ti jun pejtelel israelob añobix bʌ junc'al i jabilel yic'ot ñumen tacobix bʌ, che'ʌch bajche' jaytiquil añob ti mojt ti mojt mu' bʌ i mejlelob ti loq'uel ti guerra, che'en.

^3-4 Moisés yic'ot Eleazar tsi' chocbeyob t'an i pi'ʌlob año' bʌ ti joctʌl i cha'an bʌ Moab, ya' ti' t'ejl jini Jordán ti' tojel Jericó. Tsi' subeyob: Chucula ti jun pejtelel winicob añobix bʌ junc'al i jabilel yic'ot ñumen tacobix bʌ. Che'ʌch tsi' mele Moisés bajche' tsi' yʌc'ʌ i mandar lac Yum che' bʌ loq'uemobix israelob ti' lumal Egipto. Che'ʌch tsi' meleyob.

^5-11 I cha'año' bʌ Rubén: 43,700. Rubén jiñʌch ascuñʌl bʌ i yalobil Israel. I p'olbal Rubén: Enoc yic'ot i pi'ʌlob, Falú yic'ot i pi'ʌlob, Hezrón yic'ot i pi'ʌlob, Carmi yic'ot i pi'ʌlob. I yalobil Falú: Eliab. I yalobil Eliab: Nemuel, Datán yic'ot Abiram. Jini Datán yic'ot Abiram jiñobʌch tsa' bʌ i temeyob i t'an yic'ot Coré che' bʌ tsi' wa'chocoyob i bʌ ti' tojlel israelob che' bʌ tsi' contrajiyob Moisés. Tsi' ñusʌbeyob i t'an lac Yum. Jini lum tsi' cawa i bʌ. Tsi' mujlayob temel yic'ot Coré. Tsa' jiliyob ti c'ajc lujunc'al yic'ot lujuntiquil i yuxc'al (250) winicob cha'an ti' caj woli' socob i pi'ʌlob. Lac Yum tsi' mele jini cha'an mi' bʌc'ñañob pejtelel israelob. Pero i yalobilob jini Coré ma'anic tsa' chʌmiyob.

^12-14 I cha'año' bʌ Simeón: 22,200. I p'olbal bʌ Simeón: Nemuel yic'ot i pi'ʌlob, Jamín yic'ot i pi'ʌlob, Jaquin yic'ot i pi'ʌlob, Zera yic'ot i pi'ʌlob, Saúl yic'ot i pi'ʌlob.

^15-18 I cha'año' bʌ Gad: 40,500. I p'olbal Gad: Zefón yic'ot i pi'ʌlob, Hagui yic'ot i pi'ʌlob, Suni yic'ot i pi'ʌlob, Ozni yic'ot i pi'ʌlob, Eri yic'ot i pi'ʌlob, Arod yic'ot i pi'ʌlob, Areli yic'ot i pi'ʌlob.

^19-22 I cha'año' bʌ Judá: 76,500. I p'olbal Judá: Ma'anic tsa' ochiyob Er yic'ot Onán tsa' bʌ chʌmiyob ti Canaán. Sela yic'ot i pi'ʌlob, Fares yic'ot i pi'ʌlob, Zera yic'ot i pi'ʌlob. Tsa' ochiyob ti censo ja'el i yalobilob Fares: Hesrón yic'ot i pi'ʌlob, Hamul yic'ot i pi'ʌlob.

^23-25 I cha'año' bʌ Isacar: 64,300. I p'olbalob Isacar: Tola yic'ot i pi'ʌlob, Fúa yic'ot i pi'ʌlob, Jasub yic'ot i pi'ʌlob, Simrón yic'ot i pi'ʌlob.

^26-27 I cha'año' bʌ Zabulón: 60,500. I p'olbalob Zabulón: Sered yic'ot i pi'ʌlob, Elón yic'ot i pi'ʌlob, Jahleel yic'ot i pi'ʌlob.

^28-37 I cha'año' bʌ José: Año' bʌ ti Efraín, 32,500. I p'olbalo bʌ Manasés ti' pejtelel añob 52,700: Maquir yic'ot i pi'ʌlob. I yalobilob Maquir: Galaad yic'ot i pi'ʌlob. I yalobilob Galaad: Jezer yic'ot i pi'ʌlob, Helec yic'ot i pi'ʌlob, Asriel yic'ot i pi'ʌlob, Siquem yic'ot i pi'ʌlob, Semida yic'ot i pi'ʌlob, Hefer yic'ot i pi'ʌlob. Ma'anic ch'iton bʌ i yalobil. Zelofehad, jini jach xch'oc bʌ i yalobilob. Jiñobʌch Maala, Noa, Hogla, Milca yic'ot Tirsa). I p'olbalob Efraín ti' pejtelelob añob 32,500: Sutela yic'ot i pi'ʌlob (juntiquil i yalobil Sutela, i c'aba' Erán), Bequer yic'ot i pi'ʌlob, Tahán yic'ot i pi'ʌlob.

^38-41 I cha'año' bʌ Benjamín: 45,600. I p'olbal Benjamín: Bela yic'ot i pi'ʌlob, Asbel yic'ot i pi'ʌlob, Ahiram yic'ot i pi'ʌlob, Sufám yic'ot i pi'ʌlob, Hufam yic'ot i pi'ʌlob. I yalobilob Bela: Ard yic'ot Naamán yic'ot i pi'ʌlob.

^42-43 I cha'año' bʌ Dan: 64,400. I p'olbal jiñʌch Súham yic'ot i pi'ʌlob.

^44-47 I cha'año' bʌ Aser: 53,400. I p'olbal Aser: Imna yic'ot i pi'ʌlob, Isúi yic'ot i pi'ʌlob, Bería yic'ot i pi'ʌlob. I yalobilob Bería: Heber yic'ot i pi'ʌlob, Malquiel yic'ot i pi'ʌlob. An xch'oc bʌ i yalobil Aser i c'aba' Sera.

^48-50 I cha'año' bʌ Neftalí: 45,400. I p'olbal Neftalí: Jahzeel yic'ot i pi'ʌlob, Guni yic'ot i pi'ʌlob, Jezer yic'ot i pi'ʌlob, Silem yic'ot i pi'ʌlob.

⁵¹ Pejtelel ili winicob ti Israel jiñobʌch mu' bʌ i mejlel ti loq'uelob ti guerra jiñobʌch: 601,730.

T'an cha'an mi' t'oxbeñob i bʌ jini lum

^52-53 Lac Yum tsi' sube Moisés cha'an mi' t'oxbeñob i lum pejtelel ili winicob che'ʌch bajche' jaytiquilob ti jujunmojt mi' yʌq'uentelob i lum.

⁵⁴ Tsi' yʌlʌ: Jini ñumen cabʌlo' bʌ, yom ñuc ma' wʌq'ueñob jini lum. Jini ts'ita'ob jach bʌ, i p'isol jach mi' tajob ja'el.

^55-56 La' i cha'leñob yajcaya ti alas cha'an mi' tsictiyel bajche' mi caj i t'oxbentelob jini lum ti mojt ti mojt jini israelob. Jini ñuc bʌ xchumtʌl tac, mi caj i yajcañob ñuc bʌ lum. Jini ch'och'oc bʌ xchumtʌlob, mi caj i yajcañob ch'och'oc bʌ lum.

I censojlel i p'olbalob Leví

⁵⁷ Jiñobʌch i p'olbalob Leví tsa' bʌ ochiyob ti censo: Gersón yic'ot i pi'ʌlob, Coat yic'ot i pi'ʌlob, Merari yic'ot i pi'ʌlob.

⁵⁸ Jiñobʌch xchumtʌl tac i cha'año' bʌ Leví: libnob, hebronob, mahlob, musob, coreijob, Amram i yalobilʌch Coat.

⁵⁹ Amram tsi' pʌyʌ i yijñam i c'aba' Jocabed, xch'oc bʌ i yalobil Leví, tsa' bʌ i yila pañimil ti Egipto. Tsi' yʌc'ʌ ti pañimil Aarón yic'ot Moisés yic'ot i chich i c'aba' Miriam.

⁶⁰ Jiñobʌch i yalobilob Aarón: Nadab yic'ot Abiú, yic'ot Eleazar, yic'ot Itamar.

⁶¹ Pero tsa' chʌmiyob Nadab yic'ot Abiú che' bʌ tsi' yotsayob ti Tabernáculo ti' tojel lac Yum jini c'ajc mach bʌ ch'ujulic, tic'bil bʌ i cha'an.

⁶² Ti pejtelel jini levíjob tsa' bʌ tsijquiyob yic'ot ch'iton bʌ i yalobilob anix bʌ jujump'ejl uw yic'ot jini ñumen taquix bʌ, jiñobʌch 23,000. Pero ma'anic tsa' ch'ʌjmiyob ti tsic ti' tojlel israelob, come ma'anic tsa' aq'uentiyob i lum jini levíjob che' bʌ tsa' t'oxbentiyob i pi'ʌlob ti mojt ti mojt.

Caleb yic'ot Josué ma'anic tsa' chʌmiyob

⁶³ Ti' pejtelelob tsa' tsijquiyob cha'an Moisés yic'ot jini motomaj Eleazar che' tempʌbilob israelob ya' ti joctʌl i cha'an bʌ Moab ti' t'ejl jini Jordán, ti' tojel Jericó.

^64-65 Ti pejtelel ili winicob ma'anix mi juntiquilic tsa' bʌ ochi ti tsic ya' ti colem bʌ i tiquiñal pañimil i c'aba' Sinaí che' bʌ tsi' cha'leyob censo Moisés yic'ot Aarón, come lac Yum tsi' subeyob cha'an mi caj i laj chʌmelob ya' ti colem bʌ i tiquiñal pañimil. Jini cha'an ma'anix tsa' cʌle mi juntiquilic. Cojach tsa' cʌle Caleb i yalobil Jefone, yic'ot Josué i yalobil Nun.