Numeros 25 - Chol: I T’an Dios

Jini israelob tsa' majliyob ba'an Baalpeor

¹ Che' ya' to chumulob israelob ti Sitim, jini winicob tsa' caji i melob i ts'i'lel yic'ot x'ixicob año' bʌ ti Moab.

² Come jini año' bʌ ti Moab tsi' pʌyʌyob winicob israelo' bʌ cha'an mi' melob q'uin che' bʌ tsi' pulbeyob i majtan i dioste' tac.

³ Jini israelob tsa' caji i ch'ujutesañob Baalpeor. Jini cha'an lac Yum tsi' mich'le israelob. Tsa' cajiyob ti chʌmel.

⁴ Lac Yum tsi' sube Moisés: Tempan pejtelel winicob ñuc taco' bʌ i ye'tel cha'an ma' jich'ob tic tojlel che' ti q'uiñil. Che' jini mi' caj ti lajmel c mich'ajel ti' tojlel israelob, che'en lac Yum.

⁵ Jini cha'an Moisés tsi' subeyob jini juezob ti Israel: Yom mi la' tsʌnsan pejtelel jini winicob tsa' bʌ i ch'ujutesayob Baalpeor, che'en.

⁶ Juntiquil winic israel bʌ tsi' pʌyʌ tilel x'ixic ch'oyol bʌ ti Madián, che' woli' q'uelob Moisés yic'ot pejtelel israelob che' woliyob ti uq'uel ya' ti' ti' Tabernáculo.

⁷ Che' bʌ tsi' q'uele Finees (i yalobil Eleazar, i yalobil jini motomaj Aarón), tsa' majli i tajob ti ora, chucul i cha'an lanza ti' c'ʌb.

⁸ Tsi' tsʌcle majlel jini winic c'ʌlʌl ti' mal i yotot. Tsi' laj jisayob ti lanza. Tsa' ochi jini lanza ti' pat jini winic. Tsa' c'ʌlʌ ñumi ti' ñʌc' ja'el jini x'ixic. Che' jini tsa' lajmi i mich'ajel Dios. Tsa' tijq'ui ti chʌmel jini israelob.

⁹ Pero tsa' chʌmiyob che' bajche' uxpijc (24,000) winicob.

^10-11 Che' jini lac Yum tsi' sube Moisés: Jini Finees i yalobil Eleazar i yalobil jini motomaj Aarón, tsa'ix i yʌc'ʌ ti lajmel c mich'ajel ti' tojlel israelob, come tsi' ts'a'le jini winic che' bajche' joñon. Tsi' jisa jini tsa' bʌ i ñusʌbeyon c t'an. Jini cha'an ma'anix tsac chʌn jisayob jini israelob tic mich'ajel.

^12-13 Jini cha'an suben: Wolic cha' aq'uen c t'an Finees cha'an mi caj cotsan ti motomaj yic'ot i yalobilob c'ʌlʌl ti pejtelel ora, come tsi' pʌsʌ i bʌxlel cha'añon Dioson bʌ. Tsi' yʌc'ʌ ti tojtʌl i mul israelob, che'en.

¹⁴ I c'aba' jini winic tsa' bʌ tsʌnsʌnti yic'ot jini xch'oc bʌ madián jiñʌch Zimri i yalobil Salu, am bʌ i ye'tel ti junmojt i p'olbal Simeón.

¹⁵ I c'aba' jini xch'oc loq'uem bʌ ti Madián jiñʌch Cozbi, xch'oc bʌ i yalobil Zur, am bʌ i ye'tel ti Madián.

^16-18 Lac Yum tsi' sube Moisés: Yom ma' tech guerra ti' tojlel jini madiañob cha'an ma' jisañob, come mi' soquetla ti mulil. Sojquemobix cabʌl israelob cha'an tsi' ch'ujutesayob Baalpeor. Asibilob cha'an Cozbi, xch'oc bʌ i yalobil jini am bʌ i ye'tel ti Madián. Jiñʌch tsa' bʌ tsʌnsʌnti ya' ti Peor che' bʌ tsa' ñumi jini bʌbʌq'uen bʌ chʌmel, che'en lac Yum.