Numeros 23 - Chol: I T’an Dios

¹ Che' jini Balaam tsi' sube jini rey: Melbeñon wucp'ejl pulʌntib ilayi. Yom ja'el ma' chajpʌbeñon wuccojt alʌ tat wacax, yic'ot wuccojt tat tiñʌme'.

² Balac tsa' caji i mel che' bajche' tsi' sube Balaam. Temel tsi' yʌc'ʌyob jujuncojt alʌ tat wacax yic'ot jujuncojt tat tiñʌme' ti jujump'ejl pulʌntib.

³ Balaam tsa' caji i suben: Wa'i to ti' t'ejl jini majtañʌl woli bʌ a wʌq'uen lac Yum jinto mic cha' tilel, come an ba' mic majlel. Tic'ʌl mux i tilel i tajon lac Yum. Che' jini mic cha' tsictesʌbeñet chuqui mi' subeñon, che'en. Tsa' majli Balaam.

⁴ Lac Yum tsa' tili i taj. Balaam tsi' sube lac Yum: Wucp'ejl pulʌntib tsac tsol wa'chocobeyet. Ti jujump'ejl pulʌntib tsac pulu alʌ tat wacax yic'ot tat tiñʌme', che'en.

⁵ Lac Yum tsi' sube: Cha' cucux ba'an jini rey Balac. Yom ma' suben ili t'an mu' bʌ c subeñet, che'en.

⁶ Balaam tsa' cha' majli ba'an Balac, ba' añob jini ñuc taco' bʌ i ye'tel ti Moab. Wa'alob ti' t'ejl pulʌntib ba' tsi' puluyob majtañʌl.

⁷ Tsa' caji ti t'an Balaam: C'ʌlʌl ti Aram tsi' choco majlel winicob Balac cha'an mi' pʌyon tilel. Jiñʌch rey ti Moab, chumul bʌ ti wits ti' tojel i pasibal q'uin. Tsi' subeyon: Yom ma' tilel cha'an ma' p'aj i p'olbalob Jacob cha'an ma' p'aj jini israelob, che'en.

⁸ ¿Bajche' mi caj c lon mich'len jini winicob che' mach mich'ic Dios? ¿Bajche' mi caj c lon a'leñob winicob che' ma'anic woli' yʌ'leñob lac Yum?

⁹ Come ya' ti' pam jini chan bʌ xajlel tsac ñajti q'ueleyob. Wʌ' ti chan bʌ wits wen tsiquilob. Ili winicob i bajñel chumulob. Ma'anic mi' xʌbob i bʌ yic'ot yan tac bʌ winicob.

¹⁰ ¿Majqui mi mejlel i tsicben i p'olbal Jacob? Lajalob bajche' i ts'ubeñal lum mach bʌ mejlic ti tsicol. Che' bajche' mi' chʌmelob jini tojo' bʌ, la' chʌmicon. Tijicñayon che' muq'uic c jilel che' bajche'ob. Che' tsi' yʌlʌ Balaam.

¹¹ Che' jini Balac tsi' sube: ¿Chuqui jini tsa' bʌ ujti a mel tic tojlel? Come tsac pʌyʌyet tilel cha'an ma' wʌ'len j contrajob, pero tsa'ix a wʌq'ueyob i yutslel a t'an, che'en.

¹² Balaam tsi' jac'ʌ: Tic'bilon ti isujm. Jini jach mi cʌl jini t'an mu' bʌ i subeñon lac Yum, che'en.

¹³ Balac tsi' sube: Conla ti yambʌ ajñibʌl ba' mi caj a q'uel lamital jini israelob, ba' mach laj tsiquilobic. Awocolic, aq'ueñob wocol jini lʌc'ʌl bʌ jomolob ti a tojlel, che'en.

¹⁴ Che' jini Balac tsi' pʌyʌ majlel Balaam ya' ti' jamil xq'uelojelob. Tsa' letsiyob ya' ti chan bʌ wits i c'aba' Pisga. Ya' ti' pam wits Balac tsi' yʌc'ʌ ti melol wucp'ejl pulʌntib. Tsi' yʌc'ʌ jujuncojt alʌ tat wacax yic'ot tat tiñʌme' ti jujump'ejl jini pulʌntib.

¹⁵ Che' jini Balaam tsi' sube Balac: Wa'i to ti' tojel ili pulʌntib ba' wola' wʌc' majtañʌl, come mu' to c majlel cubin chuqui mi' yʌl lac Yum, che'en.

¹⁶ Lac Yum tsa' tili i taj Balaam. Tsi' sube chuqui yom mi' yʌl. Tsi sube: Cha' cucux ba'an Balac cha'an ma' suben chuqui mic subeñet, che'en.

¹⁷ Balaam tsa' c'oti i taj Balac yic'ot jini año' bʌ i ye'tel ti Moab. Ya'to wa'alob ba' p'ulul jini majtañʌl. Balac tsi' c'ajtibe: ¿Chuqui tsi' yʌlʌ lac Yum? che'en.

¹⁸ Che' jini Balaam tsa' caji ti t'an: Tejchen ti ora, Balac, i yalobilet bʌ Zipor cha'an ma' ñich'tʌbeñon c t'an.

¹⁹ mach lajalic Dios bajche' winicob yujilo' bʌ lot. Mach lajalic bajche' jini cha'chajp jax bʌ i pusic'al mu' bʌ i q'uextan i t'an. Che' mi' yʌc' i t'an, ¿mach ba anic mi' ts'ʌctesan? Che' tsa'ix i subu chuqui mi caj i cha'len, ¿mach ba anic mi' mel?

²⁰ Awilan tsi' yʌq'ueyon tic wenta cha'an mi cʌq'ueñob i yutslel c t'an jini israelob. Come lac Yum tsa'ix i yʌq'ueyon i yutslel i t'an. Mach mejlic j q'uextan.

²¹ Come ma'anic mi' tajbeñob i mul i p'olbalob Jacob ti' tojlel lac Yum. Ma'anic mi' q'uelbeñob i jontolil jini israelob. Come ya' añob yic'otob lac Yum Dios cha'an mi' yumañob.

²² Dios tsi' pʌyʌyob loq'uel ti Egipto. Jini cha'an p'ʌtʌlob che' bajche' bajlum.

²³ Ma'anic xwujtob mu' bʌ mejlel i contrajiñob Jacob. Ma'anic jini payxo x'alt'añob mu' bʌ mejlel i p'ajob. Mux caj i tsictiyel, Dios mi' contrajin xjontolilob ti ñuc bʌ i p'ʌtʌlel.

²⁴ Melel jini israelob mi caj i tejchelob che' bajche' i ña' bajlum mach bʌ anic mi' c'aj i yo jinto mi' c'ux i we'el, jinto mi' japben i ch'ich'el jini tsʌnsʌbil bʌ. Che' tsi' yʌlʌ Balaam.

²⁵ Balac tsi' jac'ʌ: Mi ma'anic mi caj a p'ajob, yom ma' ñʌjch'el. Mach a wʌq'ueñob i yutslel a t'an, che'en.

²⁶ Balaam tsi' sube: ¿Mach ba anic tsac subeyet wersa mi caj c sub jini t'an mu' bʌ i subeñon c Yum? che'en.

²⁷ Balac tsi' sube ti wocol t'an: Conla ti yambʌ ajñibʌl mu' bʌ caj c pʌsbeñet. Tic'ʌl mi ya'i Dios mi caj i jac' chuqui com cha'an mi' yʌq'ueñet a p'ʌtʌlel ti p'ajoñel, che'en.

²⁸ Jini cha'an Balac tsi' pʌyʌ majlel Balaam ti' pam chan bʌ wits i c'aba' Peor, am bʌ ti' tojel jini colem bʌ i tiquiñal pañimil.

²⁹ Balaam tsi' cha' sube: Yom ma' mel yambʌ wucp'ejl pulʌntib. Chajpan ja'el wuccojt alʌ tat wacax, yic'ot wuccojt tat tiñʌme', che'en.

³⁰ Jini cha'an Balac tsi' mele che' bajche' tsi' sube Balaam. Tsi' yʌc'ʌ juncojt alʌ tat wacax yic'ot juncojt tat tiñʌme' ti jujump'ejl pulʌntib.