Numeros 21 - Chol: I T’an Dios

Rey Arad tsi' mʌcta israelob

¹ Tsa' caji i yubiñob cananeojob woli' tilelob israelob. Tsi' tempa i winicob jini rey chumul bʌ ti Arad. Tsa' loq'ui i tajob ya' ti bij ba' woli' tilelob israelob, ti jini jach bʌ bij ba' tsa' ñumiyob jini xq'uelojelob. Tsa' caji i contrajiñob. Tsi' cʌchʌ majlel cha'tiquil uxtiquil.

² Jini israelob tsi' pejcayob lac Yum: C Yum, muq'uic a coltañon lojon ti' tojlel jini rey yic'ot ti' tojlel i winicob, mi caj c junyajlel jisan lojon Arad yic'ot pejtelel jini tejclum tac am bʌ ti' joytʌlel, che'ob.

³ Lac Yum tsi' yubibeyob i t'an jini israelob. Tsi' coltayob ti' tojlel jini cananeojob. Tsa' majliyob cha'an mi' laj jisañob yic'ot pejtelel i tejclum tac. Jini cha'an tsi' yotsʌbeyob i c'aba' ti Horma, am bʌ i sujmlel ti lac t'an “laj jisʌbil”.

I yejtal lucum melbil ti c'ʌnc'ʌn taq'uin

⁴ Che' jini tsa' sujtiyob ti wits i c'aba' Hor. Tsa' caji i xʌñob majlel i bijlel jini Chʌchʌc bʌ Ñajb, cha'an wersa tsi' xoyoyob i bijlel ya' ba'an i lumal Edom. Che' jini tsa' cajiyob ti wen lujb'an come wen ñajt jini bij.

⁵ Tsa' cajiyob ti wulwul t'an ti' contra Dios yic'ot ti' contra Moisés: ¿Chucoch tsa' lon pʌyʌyon lojon loq'uel ti Egipto cha'an mic chʌmel lojon ila ti' tiquiñal pañimil? Come ilayi ma'anic baqui mi lac taj waj yic'ot ja'. Tsa'ix c'ojyi j c'ux lojon jini maná, come mach p'ʌtʌlic tic ñʌc' lojon, che'ob.

⁶ Ti' caj jini, lac Yum tsi' choco tilel cabʌl jontol bʌ lucum ti' tojlelob cha'an mi' c'uxob winicob cha'an i mul. Cabʌl tsa' jiliyob cha'an tsi' c'uxuyob jini lucum.

⁷ Tsa' tiliyob winicob ba'an Moisés cha'an mi' subeñob: Isujm tsa'ix c taja lojon c mul. Tsac cha'le lojon t'an ti' contra lac Yum yic'ot ti a contra. Jini cha'an a wocolic c'ajtiben lac Yum cha'an mi' cha' loc'san ili lucum tic tojlel lojon, che'ob. Jini cha'an Moisés tsa' caji i pejcan lac Yum.

⁸ Lac Yum tsi' sube Moisés: Mele i yejtal lucum ti c'ʌnc'ʌn taq'uin. Joc'chocon ti junts'ijt te'. Majqui jach tsa' c'uxle ti lucum, mi tsi' letsa i wut cha'an mi' q'uel jini i yejtal lucum mi' caj ti lajmel. Ma'anic mi' caj ti chʌmel, che'en lac Yum.

⁹ Jini cha'an Moisés tsi' mele i yejtal lucum ti tsucu taq'uin. Tsi' joc'choco ti' ñi' junts'ijt te'. Majqui jach tsa' c'uxle ti lucum tsa' lajmi che' bʌ tsi' can q'uele i yejtal lucum melbil bʌ ti tsucu taq'uin. Cuxul tsa' cʌle.

Jini israelob tsi' joy mʌctayob Moab

¹⁰ Tsa' loq'uiyob israelob ya' ba' chumulob. Tsa' c'otiyob ti poj chumtʌl ya' ti Obot.

¹¹ Che' bʌ tsa' cha' loq'uiyob ti Obot, tsa' poj chumleyob ti Ijeabarim, ya' ti colem bʌ i tiquiñal pañimil am bʌ ti' tojel Moab ya' ba' mi' pasel q'uin.

¹² Che' bʌ tsa' cha' loq'uiyob ya'i, tsa' c'otiyob ti poj chumtʌl ti joctʌl bʌ lum i c'aba' Zered.

¹³ Tsa' cha' loq'uiyob ya'i. Tsa' c'otiyob ti poj chumtʌl ti' junwejlel Arnón, ya' ba'an i tiquiñal pañimil ba' jaxʌl i lum amorreojob. Jini Arnón ja' i cayajoñʌch i lumalob amorreojob yic'ot moabob. An ti yojlil ba' mi' ñup'añob i bʌ i lumal Moab yic'ot i lumal amorreojob.

¹⁴ Che'ʌch mi' yʌjlel ti jini jun am bʌ i c'aba' I Guerra Lac Yum ba' ts'ijbubil chuqui tac tsi' mele ya' ti Chʌchʌc bʌ Ñajb, yic'ot ya' ti joctʌl bʌ lum i c'aba' Arnón,

¹⁵ yic'ot i wejlib ja' mu' bʌ i ñumel majlel c'ʌlʌl ti Ar, jinto mi' c'otel ya' ba' jaxʌl i lumal jini Moab.

¹⁶ Tsa' loq'uiyob ya'i. Tsa' tiliyob ti Beer ba'an i loq'uib ja', come lac Yum tsi' sube Moisés: Tempan jini winicob cha'an mi cʌq'ueñob ja', che'en.

^17-18 Jini cha'an jini israelob tsa' caji i c'ʌyin ili c'ay: La' wʌjlic loq'uel ja'. Cha'lenla c'ay cha'an jini ja'. Jiñʌch ja' tsa' bʌ i top'oyob yumʌlob. Wen melbil jini pozo ti plata tac yic'ot ti ch'ijt te'. Tsi' cha' cʌyʌyob jini colem bʌ i tiquiñal pañimil. Tsi' xʌñʌyob majlel c'ʌlʌl ti Matana.

¹⁹ Che' bʌ tsa' loq'uiyob ti Matana, tsa' majliyob ti Nahaliel. Tsa' loq'uiyob ti Nahaliel, tsa' majliyob ti Bamot.

²⁰ Che' bʌ tsa' loq'uiyob ti Bamot, tsa' c'otiyob ti joctʌl bʌ lum am bʌ ti' lumal Moab ti' yebal jini wits i c'aba' Pisga ba' c'ajan tsiquil jini i tiquiñal pañimil.

Israelob tsi' jisayob Sehón

²¹ Jini israelob tsi' chocoyob majlel winicob ba'an Sehón i rey jini amorreojob. Tsi' subeyob:

²² Ac'ʌyon lojon ti ñumel ti a lumal. Ma'anic mic majlel lojon baqui an la' pʌc'ʌb. Ma'anic mi caj c tuc' lojon la' ts'usub. Ma'anic mi cajel lojon ti uch'el ya' ti la' wa'al. Tojach mi caj c ñumel lojon ti ñoj bij c'ʌlʌl mic ñumel lojon ti' pejtelel la' lumal, che'ob.

²³ Pero jini Sehón ma'anic tsi' yʌc'ʌyob ti c'axel israelob ya' ti' lumal. Tsa jach caji i tempan i winicob cha'an mi' loq'uelob ti' contra israelob ya' ti' tiquiñal pañimil. Tsa' c'oti i tajob ti Jahaza. Ya' tsi' cha'leyob guerra ti' contra israelob.

²⁴ Pero jini israelob tsi' laj jisayob ti espada. Tsa' ochi i laj ch'ʌmbeñob i lum c'ʌlʌl ti Arnón ja' c'ʌlʌl ti Jaboc ja' ba' jaxʌl i lumal amoñob, come wen wits i cayajonlel i lumal.

^25-26 Jini cha'an jini israelob tsi' laj ch'ʌmbeyob i tejclum tac amorreojob. Ya' tsa' cajiyob ti chumtʌl. Tsi' ch'ʌmʌyob ja'el Hesbón, i tejclum jini rey Sehón i yum jini amorreojob tsa'ix bʌ i cha'le guerra ti yambʌ ora ti' contra jini rey am bʌ ti Moab. Che' bʌ tsa' mʌjli i cha'an, tsi' chilbe cabʌl i lum c'ʌlʌl ti colem ja' i c'aba' Arnón.

²⁷ Jini cha'an mi' yʌlob jini xc'ayob: La' ti Hesbón. La' Sehón.

²⁸ Come loq'uem ti Hesbón i tejclum bʌ Sehón, tsa' majli i pule' Ar am bʌ ti Moab. Tsa' c'oti c'ajc c'ʌlʌl ti' chañelal wits ti' tojel Arnón.

²⁹ ¡P'ump'un jax Moab! Jisʌbilob jini año' bʌ ti Quemos. Tsa'ix puts'iyob i yalobilob. Tsa'ix xujch'ibentiyob majlel xch'oc bʌ i yalobilob cha'an majtan e'tel ti' tojlel Sehón i rey amorreojob. Che'ʌch tsi' yʌlʌyob jini tsa' bʌ mʌjliyob i cha'an.

³⁰ Pero joñonla tsa' lac jisayob ti pejtelelob. Tsa' jiliyob año' bʌ ti Hesbón c'ʌlʌl ti Dibón, yic'ot ti Nofa, yic'ot ti Medeba.

Israel tsi' jisa Og ti Basán

³¹ Jini cha'an tsa' chumleyob israelob ti' lum jini amorreojob.

³² Moisés tsi' choco majlel winicob cha'an mi' cʌñob ja'el i lumal Jazer. Che' jini tsi' ch'ʌmʌyob jini lum jini israelob. Tsi' chocoyob loq'uel jini amorreojob ya' bʌ añob.

³³ Tsa' cajiyob ti letsel majlel israelob ti' bijlel Basán. Pero tsa' tili i tajob jini rey Og yic'ot pejtelel i soldadojob chumulo' bʌ ti Basán. Tsa' c'oti i contrajiñob israelob ya' ti Edrei.

³⁴ Lac Yum tsi' sube Moisés: Mach yomic mi la' bʌc'ñañob, come tsa'ix cʌq'ueyetla ti la' wenta winicob x'ixicob yic'ot i lumalob. Yom ma' melbeñob che' bajche' tsa' la' melbe Sehón i rey jini amorreojob chumul bʌ ti Hesbón, che'en lac Yum.

³⁵ Che' jini tsi' laj jisayob yic'ot pejtelel i yalobilob. Ma'anix majch tsa' cʌle. Jini israelob tsi' laj ch'ʌmbeyob i lumal.