Numeros 11 - Chol: I T’an Dios

Xculucap mut tac

¹ Jini winicob tsa' cajiyob ti wʌlwʌl a'leya ti' tojlel lac Yum cha'an mach tijicñayobic. Lac Yum tsi' yubibeyob i t'an. Tsa' wen mich'a. Tsi' choco jubel c'ajc. Tsa' caji i jisañob ya' ti junwejl i lum.

² Jini woliyobix bʌ i yubiñob wocol tsa' caji i pʌyob Moisés ti c'am bʌ t'an cha'an mi' coltañob. Tsa' caji ti oración Moisés. Che' jini tsa' yajpi jini c'ajc.

³ Jini cha'an tsi' yotsʌbeyob i c'aba' jini lum Tabera am bʌ i sujmlel ti lac t'an, “Tsa' Tsujq'ui ti C'ajc”, come i c'ʌc'al lac Yum tsi' puluyob ya'i.

⁴ Jini egiptojob tsa' bʌ i pi'leyob tilel israelob tsa' caji i wo'wo' uc'tañob i chubʌ'an ti Egipto. Jini cha'an tsa' caji i melob i pusic'al ja'el jini israelob. Tsi' yʌlʌyob: ¿Bacan woli laj c'ux we'elʌl? Anic lac cha'an we'elʌl che' bajche' ti Egipto tijicñayonla wʌle.

⁵ Sumuc jax jini chʌy, yic'ot pepino, yic'ot melón, yic'ot cebolla, yic'ot x'axux, yic'ot xwelux tsa' bʌ laj c'uxu che' ya'to añonla ti Egipto, che'ob.

⁶ Wʌle c'uñonixla ti wi'ñal. Ti jujump'ejl q'uin to'o maná woli la cʌq'uentel, che'ob.

⁷ Jini maná che' ya wojwoxtʌl che' bajche' i bʌc' xculanta, che'ʌch yilal bajche' i yetsel te'.

⁸ Pejtelel jini ya' bʌ añob ti jini lum tsa' loq'ui i lotob. Mi' juch'tacob ti ña'atun. Mi' jats'ob ti te' tac. Mi' ch'ʌxob ti p'ejt cha'an mi' melob ti waj. Lajal i sumuclel che' bajche' pan xʌbʌl bʌ ti aceite.

⁹ Che' bʌ tsa' jubi jini ye'eb ti ac'ʌlel, jini maná tsa' jubi tilel ja'el.

¹⁰ Moisés tsi' yubibeyob i yuq'uel winicob yic'ot i pi'ʌlob, ya' ba' wa'alob ti' ti'ob i yotot. Jini cha'an tsa' wen mich'a lac Yum ti' tojlelob. Tsi' mele i pusic'al ja'el Moisés.

¹¹ Moisés tsi' sube lac Yum: A winicon. ¿Chucoch mij cuchbeñob i mul ili tejclumob?

¹² ¿Calobilob ba? ¿I taton ba? ¿Chucoch mic wersa cʌntañob che' bajche' alʌlob, che' lajal bajche' x'ixic mi' mec' majlel i yalobil cha'an mi' tsu'san? Che'ʌch wolic pʌyob majlel ti jini lum ba' mi caj a wʌq'ueñon lojon che' bajche' tsa' wʌn subeyob c ñojte'el lojon.

¹³ ¿Baqui mi caj c taj we'elʌl cha'an mi cʌq'uen pejtelel ili winicob? Come woliyobix ti uq'uel tic tojlel. Woli' yʌlob: “Aq'ueñon lojon we'elʌl cha'an mij c'ux lojon”, che'ob.

¹⁴ Mach cujchic c cha'an ili wocol. Mach mejlic cʌq'ueñob chuqui woli' c'ajtibeñoñob. Wen wocol jax mi cubin.

¹⁵ Mi che'ʌch woli a ña'tan, a wocolic mij c'ajtibeñet, tsʌnsañon ti ora. Pʌsbeñon i yutslel a pusic'al. La' loq'uicon ti ili wocol, che'en Moisés.

¹⁶ Jini cha'an lac Yum tsi' sube Moisés: Tempan lujuntiquil i chʌnc'al (70) winicob a cʌñʌyo' bʌ, ñoxobix bʌ ti' tojlel israelob año' bʌ i ye'tel. Pʌyʌyob tilel ti' ti' jini Tabernáculo. La' tem wa'lecob a wic'ot ya'i.

¹⁷ Che' jini mi caj c jubel tilel cha'an mic pejcañet. Mi caj cʌq'ueñob jini Espíritu che' bajche' tsa cʌq'ueyet. Che' jini temel mi caj la' cuch ili wocol. Mi caj i coltañetob ili lujuntiquil i chʌnc'al winicob.

¹⁸ Subeñob jini winicob woliyo' bʌ ti wulwul t'an: Yom mi la' sʌq'uesan la' bʌ come ijc'ʌl mi caj la' c'ux we'elʌl, come tsa'ix la' cha'le uq'uel tic tojlel. Tsa' la' wʌlʌ: “Anic lac cha'an we'elʌl wʌle che' bajche' ti Egipto, tijiñayonla”, che'etla.

¹⁹ Jini cha'an mi caj cʌq'ueñetla we'elʌl cha'an mi la' c'ux, mach cha'anic cha'p'ejl q'uin, mi jo'p'ejl q'uin, mi lujump'ejl q'uin mi junc'al q'uin.

²⁰ Jump'ejl uw mi caj la' c'ux jinto che' muq'uix la' cha' bi'len. Mi caj la' xejtan. Mi caj i loq'uel ti la' ñi'. Come tsa'ix la' ts'a'leyon. Tsa' la' wuc'ta Egipto tic tojlel, che'en lac Yum.

²¹ Che' jini Moisés tsi' yʌlʌ: ¿Bajche' mi caj i yujtel iliyi? Wʌ'an lujunc'al i chabajc' mil (600,000) winicob. (Mach tsicbilobic jini x'ixicob yic'ot i yalobilob.) Pero jatet woli a wʌl mi caj i c'uxob we'elʌl.

²² Mi tsa' lac tsʌnsa pejtelel la cʌlac', pejtelel jini tiñʌme' yic'ot wacax, ¿jasʌl ba jini? Mi tsi' laj much'qui i bʌ jini chʌy am bʌ ti colem ñajb, ¿mejl ba lac chuc cha'an mi' c'uxob? che'en Moisés.

²³ Lac Yum tsi' sube Moisés: ¿Tsa'ix ba jili c p'ʌtʌlel? Mu' to a q'uel mi ma'anic mi' ts'ʌctiyel c t'an, che'en lac Yum Dios.

²⁴ Tsa' loq'ui Moisés ti Tabernáculo. Tsi' subeyob winicob pejtelel chuqui tsi' yʌlʌ lac Yum. Che' jini tsi' tempayob i bʌ lujuntiquil i chʌnc'al jini xñoxob año' bʌ i ye'tel ti' tojlel israelob. Tsi subeyob wa'tʌl ti' joytʌlel jini Tabernáculo.

²⁵ Lac Yum tsa' jubi tilel ti Tocal. Tsi' pejca Moisés. Tsi' ch'ʌmʌ jini Espíritu am bʌ ti' tojlel Moisés. Tsi' yʌq'ueyob ja'el jini lujuntiquil i chʌnc'al xñoxob. Che' bʌ tsa' tili i yEspíritu ti' tojlelob, tsa' cajiyob ti sub t'an. Jal tsi' chʌn cha'leyob.

²⁶ Cha'tiquil tsa' cʌleyob ti xchumtʌl. Ma'anix tsa' majliyob yic'ot i pi'ʌlob ti' ti' jini Tabernáculo. Tsa' cajiyob ti sub t'an ti' tojlel israelob. Juntiquil i c'aba' Eldad, jini yambʌ i c'aba' Medad. Che' ja'el ti' tojlel jini cha'tiquil tsa' c'oti jini Espíritu, anquese parte añob, pero ch'ʌmbilobix ti tsic yic'ot jini yaño' bʌ, anquese ma'anic tsa' mejliyob ti majlel ya' ti Tabernáculo. Ya' jach tsi' cha'leyob subt'an ya' baqui añob.

²⁷ Ti ajñel tsa' majliyob cha'tiquil uxtiquil winicob i subeñob Moisés. Tsi' yʌlʌyob: Jini Eldad yic'ot Medad wolix i cha'leñob subt'an ya' ba' añon lojon, che'ob.

²⁸ Mach uts'atic tsi' yubi Josué (i yalobil Nun) i yaj e'tel Moisés, come i pi'ʌlʌch ti e'tel c'ʌlʌl che' ch'iton to. Tsi' sube i yum: A wocolic c yum, yom ma' tic'ob, che'en jini Josué.

²⁹ Moisés tsi' jac'be: ¿Yom ba tsʌytsʌyña a pusic'al tic tojlel? Ma' lon ña'tan mach uts'atic mi' cha'leñob subt'an winicob, pero yomcu. Uts'at muq'uic i yʌq'ueñob i yEspíritu lac Yum pejtelel winicob x'ixicob, che'en.

³⁰ Che' jini Moisés yic'ot jini xñoxtacob ti Israel tsa' sujtiyob majlel jujuntiquil ti' yotot.

³¹ Lac Yum tsi' choco tilel p'ʌtʌl bʌ ic' tsa' bʌ i wets'e tilel bajc'ʌl xculucap. Tsa' wejliyob tilel ti' pam ñajb. Tsa' jubiyob ti' tojlel israelob yic'ot ti' joytʌlel ya' ba'añob. Baqui jach tsa' loq'uiyob winicob, tsa' majli i chucob. Jump'ejl q'uin xʌmbal ti jujunwejl c'ʌlʌl ba' jaxʌl. Pec' jach tsa' wejliyob c'otel, ya jump'ejl jach metro i chanlel.

³² Ti jim bʌ q'uin pejtelel winicob x'ixicob tsi' tempayob jini xculucap. Ma'anic tsa' wʌyiyob ti ac'ʌlel. Cha'p'ejl q'uin yic'ot jump'ejl ac'ʌlel woli' chucob jini xculucap. Jini mach bʌ cabʌlic tsa' mejli i chuc, cojach lujump'ejl i yuxc'al ti p'ujch, jujump'ujch jiñʌch che' bajche' jump'ejl colem coxtal tac tsi' tempayob ti mojt ti mojt jini israelob. Pejtelel jini israelob ti' pamol jini xchumtʌlob tsi' tiquesayob ti q'uin i bʌc'tal jini xculucap.

³³ Che' bʌ tsa' caji i c'uxob jini we'elʌl, che' cajel jaxto woli' jach'ob, tsa' mich'a lac Yum ti' contra pejtelel winicob. Tsi' yʌq'ueyob wen tsʌts bʌ wocol. Tsi' jisayob lamital.

³⁴ Jini cha'an tsi' yotsʌbeyob i c'aba' jini ajñibʌl Kibrot Hataava, yom bʌ mi' yʌl ti lac t'an, “Mucoñibʌl cha'an xwo'lelob”, come ya'i tsi' mucuyob jini tsa' bʌ i wo'wo' uc'tayob Egipto.

³⁵ Tsa' majliyob ti Hazerot. Ya' tsa' cʌleyob.