Nehemias 8 - Chol: I T’an Dios

Esdras tsi' pejcʌbeyob i t'an Dios

¹ Pejtel jini winicob x'ixicob tsi' tempayob i bʌ ti jump'ejl i pusic'al ya' ti' ti' tejclum i c'aba' Ja' Ti'. Tsi' c'ajtibeyob Esdras, jini sts'ijbujel, cha'an mi' ch'ʌm tilel i juñilel mandar ts'ijbubil bʌ i cha'an Moisés tsa' bʌ i yʌq'ueyob israelob lac Yum.

² Che' ti ojlil septiembre, Esdras, jini motomaj, tsi' ch'ʌmʌ tilel jini mandar ba' tempʌbilob winicob x'ixicob yic'ot pejtel añobix bʌ i pusic'al cha'an mi' ch'ʌmbeñob isujm.

³ C'ʌlʌl ti sʌc'ajel c'ʌlʌl ti xinq'uiñil tsi' pejca jini jun ti c'am bʌ t'an ti' tojel i ti' tejclum i c'aba' Ja' Ti', ya' ba' tempʌbilob winicob x'ixicob yic'ot i yalobilob añobix bʌ i pusic'al. Ti pejtelelob tsi' wen ñich'tayob i juñilel mandar.

⁴ Ya'ʌch wa'al Esdras jini sts'ijbujel ti t'uchlibʌl. Melbil ti te' i t'uchlib cha'an mi' t'uchtʌl ti subt'an. Ya' wa'alob ti' ñoj Esdras, Matatías, Sema, Anías, Urías, Hilcías yic'ot Maasías. Ya' wa'alob Pedaías, Misael, Malquías, Hasum, Hasbadana, Zacarías yic'ot Mesulam ti' ts'ej.

⁵ Esdras tsi' tili majlel jini bʌlbil bʌ jun ti' wutob pejtel winicob x'ixicob, come chan ba' t'uchul. Che' bʌ tsi' tili jini jun, tsa' wa'leyob ti pejtelelob.

⁶ Esdras tsi' ch'ujutesa lac Yum jini ñuc bʌ Dios. Pejtel winicob x'ixicob uts'at tsi' yubibeyob i t'an. Tsi' yʌlʌyob: Che'ʌch yom, che'ʌch yom, che'ob. Tsi' letsayob i c'ʌb ti oración. Tsi' pʌcchocoyob i bʌ ti lum. Tsi' ch'ujutesayob lac Yum.

⁷ Jini levíjob ja'el tsi' cha'leyob cʌntesa ti mandar: Jesúa, Bani, Serebías, Jamín, Acub, Sabetai, Hodías, Maasías, Kelita, Azarías, Jozabed, Hanán yic'ot Pelaía. Jini ya' bʌ wa'alob tsi' wen ñich'tʌbeyob i t'an.

⁸ C'am tsi' pejcayob i mandar Dios ti jun cha'an mi' laj ubiñob. Tsi' pʌsbeyob i sujmlel cha'an mi' wen ch'ʌmbeñob isujm.

⁹ Nehemías, jini gobernador, yic'ot Esdras, jini motomaj am bʌ i ye'tel ti ts'ijbujel ja'el, yic'ot levíjob tsa' bʌ i cʌntesayob winicob x'ixicob, tsi' subeyob ti pejtelelob: Ch'ujul ili q'uin cha'an lac Yum Dios. Mach mi la' mel la' pusic'al. Mach mi la' cha'len uq'uel, che'ob. Come ti pejtelelob tsi' cha'leyob uq'uel cha'an jini mandar che' bʌ tsi' yubiyob.

¹⁰ Esdras tsi' subeyob: Sujtenixla ti la' wotot. C'uxula sumuc bʌ we'elʌl. Japʌla tsaj bʌ i ya'lel ts'usub. Chocbeñob majlel we'elʌl jini mach bʌ chajpʌbilobic, come ch'ujul mi' q'uel ili q'uin lac Yum. Mach mi la' mel la' pusic'al, come jiñʌch la' p'ʌtʌlel che' tijicñayetla ti lac Yum, che'en.

¹¹ Jini levíjob tsi' ñʌch'tesʌbeyob i pusic'al winicob x'ixicob ti pejtelob. Tsi' subeyob: Yom ñʌch'ʌl la' pusic'al. Ch'ujul ili q'uin. Mach mi la' mel la' pusic'al, che'ob.

¹² Jini cha'an tsa' majliyob ti c'ux waj ti pejtelelob. Tsi' japʌyob tsaj bʌ i ya'lel ts'usub. Tsi' chocbeyob majlel i bʌl i ñʌc' jini mach bʌ añobic i cha'an. Tijicñayobix i pusic'al tsi' meleyob q'uin, come tsi' ch'ʌmbeyob isujm jini t'an tsa' bʌ subentiyob.

¹³ Ti yijc'ʌlal tsi' cha' tempayob i bʌ jini ñuco' bʌ winicob yic'ot motomajob yic'ot levíjob ba'an Esdras, jini sts'ijbujel, cha'an yomob i cha' ubiñob mandar.

¹⁴ Ya' ti jun ts'ijbubil bʌ i cha'an Moisés tsi' tajayob mandar cha'an mi' chumtʌlob ti lejchempat i yalobilob Israel che' ti' yorajlel q'uiñijel ti' wucp'ejlel uw, come che'ʌch tsi' subeyob lac Yum.

¹⁵ Yom ja'el mi' pam pucob ili t'an ti pejtelel xchumtʌl tac yic'ot ti Jerusalén, come tsi' yʌlʌ lac Yum: Cucula ti wits. Cha' ch'ʌmʌla tilel ti tejclum i xʌc' tac olivote', jini pʌc'ʌl bʌ yic'ot jini yilol jach bʌ mi' colel ti mate'el, yic'ot i yopol olivote', yic'ot i xʌc' tac arrayán te', yic'ot i xʌc' tac palma, yic'ot i xʌc' tac yambʌ te' am bʌ i yopol. Melela lejchempat che' bajche' ts'ijbubil, che'en.

¹⁶ Jini cha'an tsa' laj majliyob i ch'ʌm tilel i xʌc' tac te' yic'ot i yopol. Tsi' meleyob lejchempat ti' jol i yotot tac yic'ot ti' pam tac i yotot yic'ot ti' pam i yotot Dios yic'ot ti parque am bʌ ti' ti' tejclum i c'aba' Ja' Ti' yic'ot ti parque am bʌ ti' ti' tejclum ba' mi lac majlel ti Efraín.

¹⁷ Tsi' tempayob i bʌ pejtelel tsa' bʌ sujtiyob tilel ti' lumal, loq'uemo' bʌ ti ñajt tac bʌ lum ba' tsa' wersa pʌjyiyob majlel. Tsi' meleyob lejchempat. Tsa' chumleyob ti lejchempat. Ti yambʌ ora c'ʌlʌl ti' yorajlel Josué, i yalobil Nun, tsi' cʌyʌyob i mel bajche' jini. Cojach wʌle tsi' cha' techeyob i chumtʌl ti lejchempat. Jini cha'an tsa' p'ojli i tijicñʌyel i pusic'al.

¹⁸ Esdras tsi' chʌn q'uele i juñilel i mandar Dios wucp'ejl q'uin. Jini israelob tsi' cha'leyob q'uiñijel wucp'ejl q'uin. Ti' waxʌcp'ejlel q'uin tsi' laj tempayob i bʌ cha'an mi' ch'ujutesañob Dios che' bajche' ts'ijbubil.