Nehemias 6 - Chol: I T’an Dios

Mach ñʌch'ʌlobic laj contrajob

¹ Tsa' caji' yubiñob Sanbalat yic'ot Tobías yic'ot Gesem jini árabe yic'ot yaño' bʌ laj contrajob, tsa'ix ujti lac mel jini ts'ajc. Tsi' yubiyob ma'anix ba' tocol (anquese maxto anic tsac wa'chocobe i puertajlel i ti' tac).

² Che' jini Sanbalat yic'ot Gesem tsi' chocbeyon tilel winicob tsa' bʌ i subeyoñob: La' quic'ot lojon. La' lac tempan lac bʌ ti tejclum ya' ti joctʌl i c'aba' Ono, che'ob. Tsi' lon ña'tayob i contrajiñon.

³ Tsac chocbeyob majlel x'ac' juñob. Tsac subeyob: Ñucʌch que'tel woli bʌ c mel. Mach mejlicon ti jubel ba' añet. ¿Yom ba mij cʌy jini que'tel cha'an mic pejcañetla? cho'on.

⁴ Chʌnyajl tsi' chocbeyoñob tilel t'an che' bajche' jini. Lajal tsac subeyob ti jujunyajl.

⁵ I jo'yajlel tsi' chocbeyon tilel i winic Sanbalat cha'an mi' contrajiñon. Chucul i cha'an welel bʌ jun.

⁶ Jiñʌch chuqui ts'ijbubil ti jun: “Cabʌl winicob ti ñajt tac bʌ lum woli' yʌlob an a mul, jatet a wic'ot a pi'ʌlob judíojob. Che'ʌch woli' yʌl Gasmu ja'el. Wolix la' ña'tan la' tʌts' la' bʌ ti' wenta rey cha'an ma'anix mi la' chʌn jac'ben i mandar. Jin cha'an woli la' mel ili ts'ajc cha'an a wom a mel a bʌ ti rey.

⁷ Tsa'ix a wa'choco x'alt'añob ja'el cha'an mi' pam subob ti Jerusalén: Wʌ'an lac rey ti Judá, che'ob. Muq'uix caj i subentel jini rey Asuero chuqui woli' yʌlob. Jini cha'an la'ix. La' lac pejcan lac bʌ”. Che'ʌch ts'ijbubil ti jun.

⁸ Tsac choco majlel x'ac' jun ba'an Sanbalat. Tsac sube: Mach che'ic wolic mel lojon bajche' wola' wʌl. Woli jach a lon jop'beñon c mul ti a bajñel pusic'al, cho'on.

⁹ Pejtel laj contrajob tsi' lon ñopoyob i bʌc'tesañonla ti t'an, come tsi' lon ña'tayob mux laj quep cʌy jini e'tel cha'an mach chʌn mejlix la cujtesan. Jini cha'an tsac pejca Dios. P'ʌtesañon lojon, cho'on.

¹⁰ Tsajñiyon ti' yotot Semaías, jini ñup'ul bʌ i yalobil Delaías, i yalobil Mehetabel. Tsi' yʌlʌ: La' lac taj lac bʌ ti' yotot Dios ti mal Templo. La' lac ñup' i ti' Templo ame ochicob jini mu' bʌ i tilelob i tsʌnsañet. Talob i tsʌnsañet ti ac'ʌlel, che'en.

¹¹ Tsac sube: ¿Yom ba mic puts'el che' ñuc que'tel? Mach yomic. Mach mejlic ti ochel jini mach bʌ motomajic, come tic'bil. Anquese yomob i tsʌnsañon, ma'anic mi caj cochel, cho'on.

¹² Tsa'ix c ña'ta mach chocbilic tilel jini winic ti Dios. Tsa' jach i lotiyon cha'an mi' bʌc'tesañon, come Tobías yic'ot Sanbalat tsi' tojoyob.

¹³ Tsi' yʌq'ueyob taq'uin cha'an mi' techbeñon c bʌq'uen, cha'an mic jac'ben i t'an. Tsi' subeyon ochel ti Templo, come mulilʌch mi tsa' ochi juntiquil tic'bil bʌ. Che' jini tsi' ña'ta i pam pucob c mul. Yomob i yʌc'on ti wajlʌntel.

¹⁴ C Dios, ña'tʌben chuqui tsi' cha'leyob Tobías yic'ot Sanbalat yic'ot jini x'ixic bʌ x'alt'an Noadías ja'el yic'ot yaño' bʌ x'alt'añob yomo' bʌ i techbeñon c bʌq'uen. Cho'on ti oración.

¹⁵ Che' jini tsa' ujti lac mel jini ts'ajc ti' tejchibal septiembre. Lajchʌmp'ejl i yuxc'al (52) q'uin tsa' lac laj ujtesa jini e'tel.

¹⁶ Che' bʌ tsi' yubiyob pejtel laj contrajob, tsa' laj cajiyob ti bʌq'uen ti pejtel colem tejclum tac ti lac joytilel. Tsa' caji' q'uelob i bʌ ti pec'. Cabʌl tsi' meleyob i pusic'al, come tsi' ña'tayob cha'añʌch i p'ʌtʌlel Dios tsa' joloñi jini e'tel cha'an tsi' coltayonla Dios.

¹⁷ Ti ili ora ja'el jini ñuco' bʌ winicob ti Judá tsi' chocbeyob majlel cabʌl carta Tobías. Tobías tsi' cha' chocbeyob tilel i q'uexol jun.

¹⁸ Come cabʌl chumulo' bʌ ti Judá tsi' meleyob i bʌ yic'ot Tobías come i ñij'alʌch Secanías (i yalobil bʌ Ara). Johanán ja'el, i yalobil Tobías, tsi' pʌyʌ xch'oc bʌ i yalobil Mesulam cha'an i yijñam. Mesulam i yalobilʌch Berequías.

¹⁹ I pi'ʌlob Tobías wʌ' bʌ chumulob ti Jerusalén tsi' subeyoñob cabʌl wen bʌ i melbal Tobías. Tsi' cha' subeyob Tobías chuqui tsa cʌlʌ. Tobías tsi' chocbeyon tilel jun cha'an mi' bʌc'tesañon.