Nehemias 4 - Chol: I T’an Dios

Tsajilonla cha'an laj contrajob

¹ Che' bʌ tsi' yubi Sanbalat wolix c mel lojon i ts'ajquil Jerusalén, tsa' mich'a. Cabʌl tsi' cha'le mich'ajel. Tsi' ts'a'le jini judíojob.

² Ya' ti' tojlel i pi'ʌlob yic'ot ti' tojlel jini soldadojob loq'uemo' bʌ ti Samaria tsi' wajleyonla: ¿Chuqui woli' lon melob jini judíojob? Bʌjobʌch i bʌ. Woli' lon ña'tañob i cha' melob tejclum. ¿Mu' ba caj i joloñel i ts'ajquiñob cha'an jump'ejl q'uin e'tel? ¿Mu' ba caj i cha' lotob jini xajlel am bʌ ti bʌltʌl tsa' bʌ puli? Che'ʌch tsi wajleyonla Sanbalat.

³ Ya' wa'al Tobías jini amon ti' t'ejl Sanbalat. Tsi' cha'le wajal ja'el: Mi tsa' letsi wax ba' cha' melbilix jini ts'ajc, mux i laj jemben i xajlelal, che'en.

⁴ C Dios lojon, ubiben i t'an come ts'a'lebilonix lojon. Sutq'uiben i ts'a'leya ti' tojlel. Ac'ʌyob ti cʌjchel majlel ya' ti ñajt bʌ lum ba' mi' cajelob ti quisin.

⁵ Mach ma' ñusʌbeñob i mul. Mach ma' yʌpbeñob. Yom ma' mich'leñob, come tsi' ts'a'leyetob che' bʌ tsi' wajleyob jini woli bʌ i cha' melob ts'ajc. Che' tsac cha'le oración.

⁶ Che' jini tsac mele lojon ts'ajc, come ch'ejlob ti e'tel jini c pi'ʌlob. Ñup'ulix jini ts'ajc ya' ba' tocol pero anto yom i chanlel.

⁷ Tsa' wen mich'ayob Sanbalat yic'ot Tobías yic'ot jini arabejob yic'ot amoñob yic'ot jini ch'oyolo' bʌ ti Asdod che' bʌ tsi' yubiyob wolix lac cha' lʌts jini jejmen bʌ ts'ajc. Wolix i ñujp'el majlel.

⁸ Ti pejtelob tsi' temeyob i t'an cha'an temel mi' techob guerra ti' contra Jerusalén. Tsi' ñopo i socob jini wʌ' bʌ chumulob cha'an mi' quep cʌyob i ye'tel.

⁹ Tsa' lac pejca Dios ti oración. Tsa' lac wa'choco xcʌnta bijob ti q'uiñil ti ac'ʌlel cha'an mi' chʌcʌ q'uelonla.

¹⁰ Jini chumulo' bʌ ti Judá tsi' yʌlʌyob: Wolix i lujb'añob jini xcuchijelob. Sʌcʌ c'uñix pañimil. Cabʌl jax jini misʌjelʌl. Mach chʌn mejlix lac cha' mel jini ts'ajc, che'ob.

¹¹ Tsi' yʌlʌyob laj contrajob: Mach yujilobic judíojob chuqui mi caj lac mel. Conla c tsʌnsañob. Ma'anic mi caj i q'uelonla jinto che' c'otemonixla ti' tojlel. Che' jini mux lac jisʌbeñob i ye'tel, che'ob.

¹² Jini judíojob chumulo' bʌ ti' t'ejl laj contrajob tsa' tili i subeñon lojon: Mi caj i loq'uelob tilel ti jujump'ejl xchumtʌl cha'an mi' tsʌnsañonla, che'ob. Lujunyajl tsi' subeyoñob chuqui woli' ña'tañob i mel laj contrajob.

¹³ Jini cha'an tsac wa'choco winicob yic'ot i pi'ʌlob ti jujunmojt ti yebal ts'ajc ba' pec' ya' ba' ma'anic otot. An i yespada yic'ot i lanza yic'ot i jalʌjb ja'el.

¹⁴ Tsaj q'uele uts'at añob. Tsa' wa'leyon c subeñob jini ñuco' bʌ winicob yic'ot año' bʌ i ye'tel yic'ot yaño' bʌ lac pi'ʌlob ti pejtelelob: Mach la' bʌc'ñañob. Ña'tanla wen ñuc lac Yum mu' bʌ lac bʌc'ñan. Cha'lenla wersa ti guerra cha'an mi la' coltan la' pi'ʌlob yic'ot pejtel la' walobilob yic'ot la' wijñam yic'ot la' wotot, cho'on.

¹⁵ Jini laj contrajob tsi' yubiyob ña'tibilix lac cha'an chuqui tsi' lon ña'tayob i mel. Jini cha'an ma'anic tsa' mejliyob come Dios tsi' mʌctayob. Tsa' sujtiyonla ba' quepel la que'tel ti ts'ajc.

¹⁶ Ti ili ora tsa' caji' jelob i bʌ ti e'tel c winicob. Ojlil tsi' meleyob ts'ajc. Ojlil tsi' chucuyob lanza tac yic'ot mʌctijibʌl tac melbil bʌ ti tsucul taq'uin. Jini yumʌlob tsi' laj coltayob i pi'ʌlob chumulo' bʌ ti Judá

¹⁷ woli bʌ i cha' melob ts'ajc. Jini tsa' bʌ i cha'leyob cuchijel tsi' cha'leyob e'tel ti junts'ijt i c'ʌb che' chucul i cha'an espada ti yambʌ i c'ʌb ti jujuntiquil.

¹⁸ Jini tsa' bʌ i meleyob ts'ajc an i yespada cʌchbil bʌ ti' ts'ej ti jujuntiquil che' woliyob ti e'tel. Jini xwus trompeta an tic t'ejl cha'an mi' pʌy tilel lac pi'ʌlob.

¹⁹ Tsac sube jini ñuco' bʌ winicob yic'ot año' bʌ i ye'tel yic'ot yaño' bʌ winicob ti pejtelob: Anto yom cabʌl e'tel come wen colem jini ts'ajc. Ñajt pujquemonla ti' pam ti jujuntiquilonla.

²⁰ Baqui jach añetla che' mi la' wubiben i t'an trompeta, la'la ba' woli' wustʌl cha'an mi la' coltan la' pi'ʌlob. Lac Dios mi caj i coltañonla ti guerra, cho'on.

²¹ Che' jini tsa' lac cha'le e'tel. Ojlil chuculob i cha'an lanza tac c'ʌlʌl ti sʌc'ajel c'ʌlʌl che' iq'uix che' tsiquilix ec'.

²² Tsac subeyob ja'el: Chʌ'ix to ajñiquetla ti mal Jerusalén ti jujuntiquiletla yic'ot la' winicob cha'an mi la' coltan la' pi'ʌlob ti ac'ʌlel, yic'ot cha'an mi la' cha'len e'tel ti q'uiñil, cho'on.

²³ Jini cha'an ma'anic tsa' lac jocho lac pislel che' bʌ tsa' wʌyiyonla. Tsa' jach lac poj jocho che' bʌ tsa' lac cha'le ts'ʌmel, joñon quic'ot c pi'ʌlob quic'ot c winicob quic'ot i winicob jini rey, xcʌntayajob c cha'an tsa' bʌ i pi'leyoñob tilel. Chuculob i cha'an i yespada.