Nehemias 3 - Chol: I T’an Dios

Mic t'oxbeñob i ye'tel ti jujuntiquil

¹ Eliasib, jini ñuc bʌ motomaj, yic'ot i pi'ʌlob tsa' caji i melob i ti' tejclum ba' mi' yochel tiñʌme'. Tsi' yʌc'ʌyob ti' wenta Dios cha'an mi' yujtel ti uts'at i ye'tel. Tsi' wa'chocoyob colem tranca tac ba'an i ti'. Tsi' yʌc'ʌyob ti' wenta Dios jini wa'chocobil bʌ c'ʌlʌl ti chan bʌ ts'ajc i c'aba' Hamea c'ʌlʌl ti chan bʌ q'ueloñib i c'aba' Hananeel.

² Jini winicob loq'uemo' bʌ ti Jericó tsi' tem cha'leyob e'tel ti' t'ejl Eliasib. Zacur (i yalobil Imri) tsi' cha'le e'tel ti' t'ejl winicob loq'uemo' bʌ ti Jericó.

³ I yalobilob Senaa tsi' melbeyob i ti' ba' mi' choñob chʌy. Tsi' wa'chocobeyob i cucujlel i ti' ts'ajc. Tsi' wa'chocobeyob i chumte'lel yic'ot i trancajlel. Tsi' yotsʌbeyob i ñejt'il tac yic'ot i c'ʌtlon te'el.

⁴ Meremot (i yalobil Urías, i yalobil bʌ Cos) tsi' cha' mele ts'ajc ti' t'ejl i yalobilob Senaa. Mesulam (i yalobil Berequías, i yalobil bʌ Mesezabeel) tsi' cha' mele ts'ajc ti' t'ejl Meremot. Sadoc, (i yalobil Baana) tsi' cha' mele ts'ajc ti' t'ejl Mesulam.

⁵ Jini ch'oyolo' bʌ ti Tecoa tsi' cha' meleyob ts'ajc ti' t'ejl Sadoc. I yumob ya' ti Tecoa ma'anic tsi' yʌc'ʌyob i bʌ cha'an i ye'tel lac Yum.

⁶ Joiada (i yalobil Paseah) yic'ot Mesulam (i yalobil Besodías) tsi' cha' melbeyob i ti' i c'aba Oñiyix Bʌ. Tsi' c'ʌcchocobeyob i cucujlel. Tsi' wa'chocobeyob i chumte'lel yic'ot i trancajlel. Tsi' yotsʌbeyob i ñejt'il yic'ot i c'ʌtlon te'el.

⁷ Melatías ch'oyol bʌ ti Gabaón yic'ot Jadón ch'oyol bʌ ti Merenot tsi' cha'leyob e'tel ti' t'ejl Joiada. Tsi' pi'leyob ti e'tel jini ch'oyolo' bʌ ti Gabaón yic'ot ti Mizpa año' bʌ ti' wenta gobernador ti junwejl ja'.

⁸ Uziel (i yalobil Harhaía), x'e'tel ti oro, tsi' cha' mele ts'ajc ti' t'ejl Melatías. Hananías, jini xmel pom, tsi' cha' mele ts'ajc ti' t'ejl Uziel. Che' jini tsi' cha' meleyob i ts'ajquil Jerusalén c'ʌlʌl ba' wen ñuc i xujc.

⁹ Refaías (i yalobil Hur), jini yumʌl am bʌ ti' wenta lamital Jerusalén, tsi' cha' mele ts'ajc ti' t'ejl Uziel.

¹⁰ Jedaías (i yalobil Harumaf) tsi' cha' mele ts'ajc ya' ti' tojel i yotot ti' t'ejl Refaías. Hatús (i yalobil Hasabnías) tsi' cha' mele ts'ajc ti' t'ejl Jedaías.

¹¹ Malquías (i yalobil Harim) yic'ot Hasub (i yalobil Pahatmoab) tsi' cha' meleyob junxujt' ts'ajc yic'ot ja'el jini chan bʌ q'ueloñib i c'aba' Tic'ʌjib.

¹² Salum (i yalobil Halohes), jini yumʌl am bʌ ti' wenta ojlil Jerusalén yic'ot xchumtʌlob ti' joytilel, tsi' cha' mele ts'ajc ti' t'ejl Malquías. Tsi' pi'leyob ti e'tel xch'oc bʌ i yalobilob.

¹³ Hanún yic'ot jini xchumtʌlob año' bʌ ti Zanoa tsi' cha' melbeyob i ti' ts'ajc ba'an joctʌl. Tsi' wa'chocobeyob i trancajlel. Tsi' yotsʌbeyob i ñejt'il yic'ot i c'ʌtlon te'el. Tsi' cha' meleyob jo'c'al i cha'bajc' metro jini ts'ajc c'ʌlʌl ti' ti' ba' mi' chojquel misʌjelʌl.

¹⁴ Malquías (i yalobil Recab), woli bʌ i yumʌntel ti jini lum am bʌ ti Bethaquerem, tsi' cha' melbe i ti' ts'ajc ba' mi' chojquel misʌjelʌl. Tsi' wa'chocobeyob i trancajlel. Tsi' yotsʌbeyob i ñejt'il yic'ot i c'ʌtlon te'el.

¹⁵ Salum (i yalobil Colhoze), ñuc bʌ yumʌl ti Mizpa, tsi' cha' melbe i ti' ts'ajc i c'aba' Cuxul bʌ Ja'. Tsi' melbe i jol. Tsi' wa'chocobe i trancajlel. Tsi' yotsʌbe i ñejt'il yic'ot i c'ʌtlon te'el. Tsi' melbe i ts'ajquil jini pa' i c'aba' Siloé ba'an i pʌc'ʌb jini rey c'ʌlʌl ba'an tec'oñib ba' mi lac jubel loq'uel ti' tejclum David.

¹⁶ Nehemías (i yalobil Azbuc), ñuc bʌ yumʌl am bʌ ti' wenta lamital Betsur, tsi' cha' mele ts'ajc ti' t'ejl Salum c'ʌlʌl ti' tojel mucoñibʌl i cha'an David, c'ʌlʌl ti melbil bʌ i yajñib ja' c'ʌlʌl ti' yotot winicob cʌmbilo' bʌ cha'an ñuc tac bʌ i melbal.

¹⁷ Tsi' cha'leyob e'tel jini levíjob ja'el. Rehum (i yalobil Bani) tsi' cha' mele ts'ajc ti' t'ejl Nehemías. Hasabías i yum lamital Keila tsi' cha' mele jini ts'ajc am bʌ ti' wenta.

¹⁸ I pi'ʌlob Hasabías yic'ot i pi'ʌlob Rehum tsi' cha'leyob e'tel ja'el: Bavai (i yalobil Henadad), ñuc bʌ yumʌl am bʌ ti' wenta lamital Keila, tsi' cha' mele ts'ajc ti' t'ejl Hasabías.

¹⁹ Ezer (i yalobil Jesúa), am bʌ i ye'tel ti Mizpa, tsi' cha' mele junxujt' ts'ajc ti' t'ejl Bavai, ti' tojel ba' mi lac letsel majlel ti' yotlel e'tijibʌl cha'an guerra ya' ti' xujc ts'ajc.

²⁰ Baruc (i yalobil Zabai) tsi' cha' mele junxujt' ts'ajc ti' t'ejl Ezer, c'ʌlʌl ti' xujc ts'ajc c'ʌlʌl ti' puertajlel i yotot Eliasib, jini ñuc bʌ motomaj.

²¹ Meremot (i yalobil Urías, i yalobil bʌ Cos) tsi' cha' mele junxujt' ts'ajc ti' t'ejl Baruc, ti' puertajlel i yotot Eliasib c'ʌlʌl ti' junwejlel i yotot Eliasib.

²² Jini motomajob ch'oyolo' bʌ ti joctʌl tsi' cha' meleyob ts'ajc ti' t'ejl Meremot.

²³ Benjamín yic'ot Hasub tsi' cha' meleyob ts'ajc ya' ti' tojel i yotot ti' t'ejl jini ch'oyolo' bʌ ti joctʌl. Azarías (i yalobil Maasías i yalobil bʌ Ananías) tsi' cha' mele ts'ajc ti' t'ejl Benjamín yic'ot Hasub, ya' ti' tojel i yotot.

²⁴ Binúi (i yalobil Henadad) tsi' cha' mele junxujt' ts'ajc ti' t'ejl Azarías, ya' ba'an i yotot Azarías c'ʌlʌl ti jump'ejl i xujc ts'ajc c'ʌlʌl ti yambʌ i xujc.

²⁵ Palal (i yalobil Uzai) tsi' cha' mele ts'ajc ti' tojel i xujc ts'ajc. Tsi' mele ja'el jini chan bʌ q'ueloñib ti pam i yotot rey am bʌ ti bujtʌl ya' ba'an i pam cárcel. Pedaías (i yalobil Faros) tsi' cha' mele ts'ajc ti' t'ejl Uzai.

²⁶ Jini chumulo' bʌ ti Ofel mu' bʌ i cha'leñob e'tel ti Templo tsi' cha' meleyob ts'ajc c'ʌlʌl ti' tojel i ti', i c'aba' Ja' Ti', ya' ba' mi' pasel q'uin. Tsi' meleyob ja'el jini chan bʌ q'ueloñib ñumen to bʌ i colemlel bajche' ts'ajc.

²⁷ Jini ch'oyolo' bʌ ti Tecoa tsi' cha' meleyob yambʌ junxujt' ts'ajc ti' t'ejl Palal ya' ti' tojel chan bʌ q'ueloñib ñumen to bʌ i ñuclel bajche' ts'ajc, c'ʌlʌl ti' ts'ajquil Ofel.

²⁸ Jini motomajob tsi' cha' meleyob ts'ajc ti' chañelal jump'ejl i ti', i c'aba' Caballo, ya' ti' tojel tac i yotot.

²⁹ Sadoc (i yalobil Imer) tsi' cha' mele ts'ajc ti' t'ejl motomajob ti' tojel i yotot. Semaías (i yalobil Secanías), jini xcʌntaya tsa' bʌ i q'uele i ti' ts'ajc ba' mi' pasel q'uin, tsi' cha' mele ts'ajc ti' t'ejl Sadoc.

³⁰ Hananías (i yalobil Selemías) yic'ot Hanún (i wʌcticlel winic bʌ i yalobil Salaf) tsi' cha' meleyob junxujt' ts'ajc ti' t'ejl Semaías. Mesulam (i yalobil Berequías) tsi' cha' mele ts'ajc ti' t'ejl Hananías ti' tojel i yotot Mesulam.

³¹ Malquías, xmel oro, tsi' cha' mele ts'ajc ti' t'ejl Mesulam c'ʌlʌl ti' yotot jini mu' bʌ i cha'leñob e'tel ti Templo c'ʌlʌl ti' yotot xchoñoñelob ya' ti' tojel i ti' ts'ajc ba' mi' cha'leñob meloñel c'ʌlʌl ba' mi' letselob ti' cha'lajmlel otot ya' ti' xujc.

³² Jini mu' bʌ i cha'leñob e'tel ti oro yic'ot jini xchoñoñelob tsi' cha' meleyob ts'ajc ba' mi' letselob ti cha'lajmlel otot ya' ti xujc c'ʌlʌl ti' ti' ba' mi' yochel tiñʌme'.