Nahum 1 - Chol: I T’an Dios

I mich'ajel Dios

¹ Ch'oyol Nahum ti Elcos. Jiñʌch tsa' pʌsbenti Nahum ti Dios. Dios tsi' pʌsbe jini wocol mu' bʌ caj i chocbentelob tilel ti Nínive ti' lumal Asiria.

² Lac Yum Dios mi' mich'an che' mi' yʌñob i pusic'al i cha'año' bʌ. Mi' q'uextʌbeñob i mul, cabʌl i mich'lel. Mi' q'uextʌbeñob i mul i contrajob. Ma'anic mi' cʌy i mich'leñob.

³ Jal mi' tejchel i mich'ajel lac Yum. Cabʌl i p'ʌtʌlel. Ma'anic mi' to'ol q'uel ti toj jini am bʌ i mul. Lac Yum mi' pʌs i p'ʌtʌlel ti sutujt ic' yic'ot ti p'ʌtʌl bʌ ic'. Lac Yum mi' pʌs i p'ʌtʌlel ti tocal.

⁴ Che' mi' tic' jini colem ñajb mi' tiquin. Jini colem ja' tac mi' sujtel ti tiquin pa'. Mi' lu' tiquin jamil ti' joctʌlel jini wits Basán yic'ot jini wits Carmelo. Mi' jilel i yʌxel te'el am bʌ ti Líbano.

⁵ Mi' ñijcʌyel wits ti' tojlel lac Yum. Mi' jejmel jini bujtʌl tac. Mi' yujquel lum ti' tojlel. Mi' jilelob winicob x'ixicob ti pejtelel pañimil.

⁶ Ma'anic majqui mi' mejlel ti wa'tʌl ti' tojlel i mich'lel lac Yum. Ma'anic majqui mi mejlel i cuchben i mich'lel. Come ticʌw che' bajche' c'ajc. Mi' bic'ti tojp'ejl xajlel cha'an ti' mich'lel.

⁷ Pero wen uts lac Yum ti' tojlel i cʌñʌyo' bʌ mu' bʌ i pijtañob. Wen xuc'ul mi' coltañob ti' yorajlel wocol. Mi' wen cʌn pejtel mu' bʌ i yʌc'ob i bʌ ti' wenta.

⁸ Pero mi caj i laj jisan i contrajob che' bajche' ti but' ja'lel. Mi caj i yajñesañob majlel c'ʌlʌl ti ic'ch'ipan bʌ pañimil.

⁹ Chuqui tac jach mi la' ña'tan la' mel ti' contra lac Yum mux i to'ol jilel. Lac Yum mi caj i mʌctan. Mi caj i jisan i contrajob. Jasʌl junñumel mi' q'uextʌbeñob i mul i contrajob.

¹⁰ Mi caj i chocob ti c'ajc che' bajche' tiquin ch'ix. Mi caj i pulelob che' bajche' tiquin bʌ jam.

Mi caj i jisʌntel Nínive

¹¹ Juntiquil yumʌl ti la' tojlel tsi' ña'ta i mel jontolil ti' contra lac Yum. Tsi' xiq'ui i pi'ʌlob ti jontolil. ¿Mach ba yujilobic bʌq'uen?

¹² Lac Yum tsi' yʌlʌ: Anquese p'ʌtʌlob, anquese cabʌlob, mi caj i junyajlel jisʌntelob. Mi caj i sʌc jilelob. Tsa'ix cʌc'ʌyetla ti wocol israelob, pero jasʌlix.

¹³ Mi caj c jisʌben i p'ʌtʌlel Nínive che' bajche' te' cha'an ma' colel ti' c'ʌb. Mi caj c ts'ocbeñet jini cadena mu' bʌ i cʌchet, che'en.

¹⁴ Lac Yum tsi' sube i rey Asiria: Ma'anix mi caj i ña'tʌntel a c'aba', come a p'olbal ma'anic mi caj i ch'ʌmbeñet a we'tel. Mi caj c choc loq'uel ti' yotlel a dioste' tac jini diosob melbil bʌ ti te' yic'ot ti tsucul taq'uin. Mi caj c muquet come tuwet cha'an a jontolil, che'en.

¹⁵ Awilanix tilel ti wits tac jini mu' bʌ i cha'leñob subt'an. Talob ti ajñel cha'an mi' subob jini tijicña bʌ t'an cha'an tsa'ix lajmi guerra. Jini cha'an, cha'lenla q'uiñijel añet bʌ la ti Judá. Ts'ʌctesan la' t'an tsa' bʌ la' subu ti' tojlel Dios. Come ma'anix mi caj i cha' ñumelob ti jisaya la' contrajob. Jini jontolo' bʌ mi caj i junyajlel jisʌntelob. Suben la' Yum wocolix i yʌlʌ.