Miqueas 6 - Chol: I T’an Dios

I mich'lel lac Yum ti' contra Israel

¹ Ubinla chuqui woli' yʌl lac Yum: Tejchenla cha'an mi la' tsictesan mi an c mul. La' i yubin la' t'an jini wits tac.

² Ubinla, wits tac, chuqui woli' yʌl lac Yum ti' contra jini israelob, come añob i mul. Wersa mi caj i melob i bʌ yic'ot.

³ Woli' yʌl: Obol la' bʌ c winicob x'ixicob. ¿Chuqui tsac melbeyet? ¿Chucoch tsa' la' cʌyʌyon? Tsictesʌbeñon. ¿Chucoch tsa' c'ojyi la' jac'beñon?

⁴ Joñon tsac pʌyʌyet loq'uel ti' lumal Egipto, ya' ba' tsa' la' cha'le majtan e'tel. Joñon tsaj coltayetla. Tsac chocbeyetla tilel Moisés yic'ot Aarón, yic'ot Miriam i yijti'an. Tsi' pʌyʌyetla majlel.

⁵ C winicob, ña'tanla chuqui tsi' yʌlʌ ti la' contra jini Balac i rey Moab. Ña'tanla bajche' tsi' jac'ʌ jini Balaam i yalobil Beor. Ña'tanla chuqui tsa' ujti ti' bijlel Gilgal che' bʌ tsa' loq'uiyob ti Sitim. Tsac pʌsbeyetla i yutslel c pusic'al cha'an mi la' wen cʌñon come la' Yumon, che'en.

Jini mu' bʌ i c'ajtin lac Yum

⁶ ¿Chuqui yom mic ch'ʌmben tilel lac Yum che' talon c ñucchocon c bʌ ti' tojlel jini c'ax ñuc bʌ Dios? ¿Yom ba mic ch'ʌmben tilel alʌ tat wacax an jax to bʌ jump'ejl i jabilel cha'an mi cʌq'uen tsʌnsʌbil bʌ i majtan?

⁷ ¿Tijicña ba i pusic'al lac Yum che' cabʌl mi cʌq'uen tat tiñʌme' yic'ot lujump'ejl mil p'isoñib but'ul bʌ ti aceite? ¿Yom ba mi cʌq'uen jini yʌx alʌl, i p'olbal c bʌc'tal, cha'an mi' ñusʌbeñon c mul?

⁸ Tsa'ix i pʌsbeyet chuqui uts'at ti' wut. Jini jach woli' c'ajtibeñet. Mele chuqui tac toj. Pʌsʌ i yutslel a pusic'al yic'ot c'uxbiya. Peq'uesan a bʌ ti' tojlel a Dios.

⁹ Lac Yum woli ti t'an ti pejtelel Jerusalén. Jini winic am bʌ i ña'tʌbal, la' i ñʌch'tʌben i t'an. Talob la' contrajob mu' bʌ caj i jisañetla. Lac Yum woli' chocob tilel.

¹⁰ Come cabʌl la' jontolil. Mi' p'ojlel la' chubʌ'an cha'an la' xujch'. Mach tojic la' balanza yic'ot la' p'isoñib.

¹¹ ¿Yom ba mic to'ol ñusʌbeñob i mul jini xchoñoñelob mu' bʌ i lotiñob i pi'ʌlob yic'ot jechojc bʌ balanza?

¹² But'ulob i yotot jini wen chumulo' bʌ yic'ot chubʌ'añʌl tsa' bʌ i tajayob ti leto yic'ot ti lotiya. Wen ñʌmʌlob ti lot.

¹³ Jini cha'an mi caj cʌq'ueñetla ñuc bʌ wocol cha'an mi la' toj la' mul.

¹⁴ Mi caj la' c'ux i bʌl la' ñʌc', pero chʌn an la' wi'ñal che' mi' yujtel la' c'ux. Ma'anic mi caj la' ñaj'an. Anquese mi la' cha'len ganar, ma'anic mi' jastiyel la' c'ʌn. Mi an i colojbal taq'uin, mi caj cʌq'ueñob la' contrajob.

¹⁵ Mi caj la' cha'len pac', pero ma'anic mi caj la' c'aj. Mi caj la' lon juch'ben i wut olivote'. Mach jasʌlic i yaceite cha'an mi la' bon la' bʌ. Mi caj la' lon yʌts' ts'usub. Ma'anic mi caj la' japben i ya'lel.

¹⁶ Tsa'ix la' jac'be i mandar Omri. Tsa'ix la' mele jontolil che' bajche' Acab. Jini cha'an mi caj c jisañetla. Mi caj cʌq'uetla ti tse'tʌntel. Mi caj la' wajlentel cha'an winicob ti pejtelel pañimil.