Miqueas 5 - Chol: I T’an Dios

I yumʌntel jini xcoltaya am bʌ ti Belén

¹ Chajpan la' bʌ cha'an guerra, come ya' añob la' contrajob ti' pat ts'ajc ti' joytilel Jerusalén ba' ñup'uletla. Mi caj i jats'beñob i choj jini Yumʌl ti Israel.

² Jatet Belén Efrata wen ch'o'ch'oquet ti' tojlel pejtelel tejclum tac ti Judá, pero ya' mi caj i q'uel pañimil jini Rey mu' bʌ caj i cha'len yumʌl ti Israel, jini Rey cuxul bʌ c'ʌlʌl ti oñiyi.

³ Jini cha'an Dios mi caj i yʌc' jini winicob x'ixicob i cha'año' bʌ ti' wenta i contrajob jinto mi' cha' ilañob pañimil jini israelob. Jini tsa' bʌ pʌjyiyob majlel ti' ñajt bʌ tejclum tac mi caj i cha' pʌjyelob tilel cha'an mi' tem ajñelob ti' lumal Israel.

⁴ Che' jini mi caj i yochel ti xcʌnta tiñʌme' mu' bʌ caj i cʌntañob ti' c'aba' i Yum Dios, ti cabʌl i p'ʌtʌlel yic'ot i ñuclel. Tijicña mi caj i yajñelob jini mu' bʌ i yumañob, come mi caj i q'uejlel ti ñuc ti pejtelel pañimil.

⁵ Jini xcʌntaya mi caj i yʌq'ueñonla i tijicñʌyel lac pusic'al. Che' mi' tilelob ti lac lumal jini asiriajob cha'an mi' jemob lac tejclum, mi caj i wa'chocon wuctiquil xcʌñañob cha'an mi' q'ueloñob, yic'ot waxʌctiquil ñuco' bʌ i ye'tel cha'an mi' toj'esañoñob.

⁶ Mi caj i cha'leñob yumʌl ti Asiria ti' p'ʌtʌlel espada. Mi caj i bots'ob i yespada che' mi' yochelob ti' lumal Nimrod. Che' jini mi caj i coltañoñob che' mi' yochelob jini asiriajob ti lac lumal cha'an mi' contrajiñoñob.

⁷ Che' jini, jini israelob mi caj i c'uxbintelob ti pejtelel pañimil che' bajche' jini ye'eb yic'ot ja'al mu' bʌ i choc tilel lac Yum che' i yorajlelix, anquese mach c'ajtibilic lac cha'an.

⁸ Ñuc mi caj i q'uejlel Israel ti' tojlel yan tac bʌ tejclumob che' bajche' bajlum ti' tojlel bʌte'el. Israel mi caj i c'uxob. Mi caj i t'uchtañob. Ma'anic i p'ʌtʌlel jini tejclum tac ti' tojlel Israel. Che'ʌch añob bajche' tiñʌme' ti' tojlel bajlum.

⁹ Israel, mi caj a yumʌntel cha'an a contrajob. Mi caj a laj jisan jini yomo' bʌ i jisañet.

¹⁰ Ti jim bʌ ora, che'en lac Yum, mi caj c jisan pejtel la' we'tʌjib cha'an guerra.

¹¹ Mi caj c laj jisan jini ts'ajquibil bʌ tejclum tac ti la' lumal, ya' ba' mi la' puts'el ti bʌq'uen cha'an mi la' coltan la' bʌ.

¹² Mi caj c jisan jini xwujtob. Ma'anix mi caj i chʌn ajñelob ti la' tojlel jini xch'ʌcoñelob.

¹³ Mi caj c laj jisan pejtelel la' dioste' tac yic'ot i yoyel. Ma'anix mi caj la' chʌn ch'ujutesan i melbal la' c'ʌb.

¹⁴ Mi caj c wersa choc loq'uel ti la' tojlel jini dios Asera yic'ot i templo tac. Pucujemel mi caj i cʌytʌl pejtel la' tejclum.

¹⁵ Ti cabʌl c mich'lel mi caj cʌq'ueñob i toj i mul pejtel winicob x'ixicob mu' bʌ i ñusañob c t'an, che'en lac Yum.