Miqueas 4 - Chol: I T’an Dios

I yumʌntel lac Yum

¹ Ti jini cojix bʌ q'uin tac mi caj i cha' q'uejlel ti ñuc jini wits Sion ba'an i yotot lac Yum. Ñumen ñuc che' bajche' yan tac bʌ wits ti' wut winicob. Ya' talob ti xʌmbal jini ch'oyolo' bʌ ti pejtel pañimil.

² Mi caj i yʌlob: Conla. Yom mi lac letsel majlel ya' ti' wits lac Yum, ya' ba'an i Templo i Dios Jacob. Jini mi caj i cʌntesañonla pejtel i bijlel cha'an mi lac cha'len xʌmbal bajche' yom, che'ob. Come ti jim bʌ q'uin lac Yum mi caj i cha'len yumʌl ti Sion. Ya' ti Jerusalén mi caj i choc majlel i t'an cha'an mi' toj'esan winicob.

³ Lac Yum mi caj i mel winicob tilemo' bʌ ti cabʌl lum. Mi caj i toj'esan cabʌl tejclumob año' bʌ i yumʌntel ti ñajt bʌ pañimil. Jini yumʌlob mi caj i sutq'uiñob i yespada ti azadón. Jini puñal am bʌ i c'ʌjñibal ti guerra mi caj i sutq'uiñob ti tsepo' trigo. Ma'anix mi caj i chʌn cha'len guerra jump'ejl tejclum ti' contra yambʌ tejclum. Ma'anix mi caj i chʌn ñopob guerra winicob.

⁴ Jujuntiquil mi caj i yajñel ti' yotot ti' ñʌch'tʌlel i pusic'al. Ma'anic majch mi caj i bʌc'tesan, come che'ʌch tsi' yʌc'ʌ i t'an i Yum Panchan yic'ot Pañimil.

⁵ Yan tac bʌ winicob x'ixicob mi' ch'ujutesañob i diosob, pero mach joñonicla. La com xʌmbal ti' bijlel lac Yum Dios ti pejtelel ora.

Jini israelob mi' coltʌntelob loq'uel ti' wocol

⁶ Lac Yum woli' yʌl: Ti jim bʌ q'uin mi caj c cha' pʌy tilel jini mach bʌ weñobic i yoc yic'ot jini tsa' bʌ wejts'iyob majlel yic'ot jini woliyo' bʌ ti tsic pusic'al cha'an tsac chocbeyob wocol.

⁷ Mi caj c cha' p'ʌtesan jini ts'a'lebilo' bʌ. Mi caj i yochelob tic tejclum. Wen p'ʌtʌl mi' majlel. Joñon mi caj cochel ti rey ti' tojlelob. Mi caj c cha'len yumʌl ya' ti wits Sion. Mach jilic c yumʌntel ti pejtelel ora.

⁸ Jini wits Sion jiñʌch chan bʌ q'ueloñib ba' mi' q'uejlel cʌlac'. Jerusalén mi caj i cha' aq'uentel i ñuclel yic'ot i p'ʌtʌlel che' bajche' ti oñiyi.

⁹ Pero wʌle anto i wocol. ¿Chucoch we'ecñayob ti bʌq'uen jini ya' bʌ chumulob? ¿Mach ba anic la' rey? ¿Tsa' ba majli jini cabʌl bʌ i ña'tʌbal? Woliyetla ti wocol che' bajche' x'ixic woli bʌ ti bajq'uel cha'an i yalobil.

¹⁰ Ñolq'uin la' bʌ. Cuchula wocol añet bʌ la ti Sion. Come wersa mi caj la' loq'uel ilayi cha'an mi la' majlel ti chumtʌl ti mate'el jinto mi la' c'otel ti Babilonia, pero lac Yum mi caj i coltañetla ya' ti' tojlel la' contrajob. Mi caj i cha' pʌyetla loq'uel ti' c'ʌbob.

¹¹ Isujm tsa'ix i tempayob i bʌ cabʌl tejclumob ti la' contra. Mi' yʌlob: “Conla ti Sion cha'an mi lac junyajlel jisan che' bajche' yom lac pusic'al”, che'ob.

¹² Pero mach yujilobic chuqui woli' ña'tan i mel lac Yum. Ma'anic mi' ch'ʌmbeñob isujm mi woli' much'quiñob tilel che' bajche' trigo mu' bʌ caj i jajts'el.

¹³ Ch'ojyen añet bʌ la ti Sion. Jeq'ueyob che' bajche' tat wacax che' jontol. Mi caj cʌq'ueñetla la' xulub melbil bʌ ti tsucu taq'uin, yic'ot ja'el i pac'arelel la' woc melbil bʌ ti c'ʌnc'ʌn taq'uin. Mi caj la' jisan i yumʌntel cabʌl tejclum tac. Mi caj la' tempan i chubʌ'an cha'an mi la' wʌq'uen lac Yum, i Yum pejtel pañimil.