Miqueas 3 - Chol: I T’an Dios

I mul jini yumʌlob ti Israel

¹ Ñich'tanla, yumʌlet bʌ la ti' tojlel israelob. An ti la' wenta cha'an mi la' ña'tan chuqui tac toj.

² Pero jatetla mi la' ts'a'len chuqui toj. Mi la' c'uxbin chuqui tac jontol. P'ump'un mi la' tic'lan winicob. Mi la' chilbeñob pejtel i chubʌ'an c'ʌlʌl mi la' ts'ulbeñob i pʌchʌlel yic'ot i bʌc'tal yilal.

³ Mi la' jisan c pi'ʌlob. Mi la' lowbeñob i pʌchʌlel ti asiyal. Mi la' c'ʌsbeñob i bʌquel. Mi la' bic'ti tsepob yilal che' bajche' we'elʌl mu' bʌ la' wotsan ti p'ejt.

⁴ Anquese cabʌl la' mul, mi la' c'ajtiben lac Yum la' coltʌntel che' ti' yorajlel wocol. Pero ma'anix mi caj i chʌn jac'beñetla. Mi caj i mʌy i wut ti la' tojlel cha'an jontol la' melbal.

⁵ Lac Yum i contrajʌch jini x'alt'añob mu' bʌ i socbeñob i pensar winicob. Jini x'alt'añob mi' pejcañob ti uts bʌ t'an jini winicob mu' bʌ i yʌq'ueñob i bʌl i ñʌc': “Yom mi la' wʌq'uentel la' wenlel. Ñʌjch'enla”, che'ob. Pero mi' p'ajob jini winic mach bʌ anic mi' yʌq'ueñob.

⁶ Jini cha'an lac Yum ma'anic mi caj i jac'beñob che' mi' c'ajtibeñob ti wocol t'an. Ma'anic mi caj i toj'esañob. Ma'anic mi caj i yʌq'ueñob i q'uel jini mach bʌ tsiquilic ti' wut winicob. Ma'anic mi caj i pejcañob. Mi caj i cha'leñob xʌmbal ti ic'ch'ipan bʌ pañimil ti q'uiñil yic'ot ti ac'ʌlel.

⁷ Che' jini mi' cajelob ti quisin jini payxo bʌ x'alt'añob, come mach tilemic ti Dios i t'an. Mi caj i ñʌjch'elob, come ma'anic woli' pejcañob Dios.

⁸ Pero joñon but'ulon ti' p'ʌtʌlel i Ch'ujlel lac Yum cha'an mic tsictesʌbeñob i mul jini israelob. Dios mi caj i yʌq'ueñob i toj i mul.

⁹ Ñich'tanla che' jini, yumʌlet bʌ la ti Israel. Mi la' ts'a'len chuqui tac toj. Mi la' soc jini wen tac bʌ.

¹⁰ Mi la' bec'ben i ch'ich'el jini mach bʌ anic i mul cha'an mi la' ñuq'uesan la' bʌ.

¹¹ Mi la' tempan la' chubʌ'an ya' ti Jerusalén ti' caj la' xujch'. Jini am bʌ i ye'tel mi' to'ol ñusan jontolil che' on mi' yʌq'uentel taq'uin. Jini motomajob yic'ot jini x'alt'añob mi' cha'leñob cʌntesa cha'an jach i mulʌntel taq'uin. Pero mi' lon alob: “Añonla ti' wenta lac Yum. Mach talic wocol ti lac tojlel”, lon che'ob.

¹² Jini cha'an ti' caj la' jontolil mi caj i bic'ti jejmel Sion che' bajche' mi' tojp'el lum. Pucujemel mi caj i cʌytʌl Jerusalén che' bajche' jejmen bʌ otot. Mi caj i sujtel ti mate'el jini wits ba' wa'chocobil Templo.