Levitico 26 - Chol: I T’an Dios

I yutslel lac Yum ti' tojlel jini mu' bʌ i wen jac'ob

¹ Mach yomic mi la' bajñel mel la' dios. Mach yomic mi la' ch'ujutesan jini dioste' tac, mi dios xajlel tac mi ts'ʌpbil bʌ te' tac. Mach mi la' ñocchocon la' bʌ ti' tojlel. Come joñon jach la' Yumon la' Dioson.

² Chʌn ña'tanla i q'uiñilel c'aj o. Q'uelela ti ñuc jini cotot. Joñoñʌch la' Yumon.

^3-5 Mi xuc'ul mi la chʌn jac'beñon c t'an yic'ot c mandar, joñon mi caj cʌq'ueñetla ja'al che' ti' yorajlel. Che' jini mi caj i wen loq'uel chuqui mi la' pʌc' ya' ti la' lum. Jini te' mi caj i wen ac' i wut. Mi caj i wen loq'uel i wut la' ts'usub. Mi caj la' wen ñaj'an che' mi la' c'ux i bʌl la' ñʌc'. Tijicña' mi caj la' wubin ya' ti la' chumlib.

⁶ Joñon mi caj cʌq'ueñetla i ñʌch'tʌlel la' pusic'al ila ti pañimil. Tijicña mi caj i yochel la' wʌyel. Ma'anic majch mi caj i bʌc'tesañetla. Joñon mi caj c jisan jini jontol tac bʌ bʌte'el ya' ti la' lumal.

⁷ Mi caj la' wajñesan la' contrajob. Mi caj la' jisañob.

⁸ Che' an jo'tiquiletla mi caj la' wajñesan jo'c'al (100). Che' an jo'c'aletla mi caj la' wajñesan lujump'ejl mil. Mi caj la' mʌl ti' tojlel pejtelel la' contrajob.

⁹ Come mi caj j cʌntañetla. Mi caj c p'ojlesañetla. Mi caj c ts'ʌctesan jini c t'an ti la' tojlel.

¹⁰ Mi caj i sobrajiyel la' wixim. Wen onto i colojbal ba' ora mi la' cha' cajel ti c'ajbal.

¹¹ Mi caj c chumtʌl ti' la' tojlel. Ma'anic mi caj c ts'a'leñetla.

¹² Mi caj c chʌn ajñel ti la' tojlel. Mi caj la' Diosiñon. Mi caj cotsañetla ti calobil.

¹³ Come joñoñʌch la' Yumon la' Dioson tsa' bʌ c loc'sayetla ti Egipto cha'an mi la' wochel tic winic. Joñon tsac ts'ocbeyetla la' tajbal ti al bʌ la' cuch. Tsa cʌc'ʌyetla ti ajñel ti libre. Jini cha'an anix i tijicñʌyel la' pusic'al cha'an librejetixla.

I tojol i mul jini xñusa t'an

¹⁴ Pero mi ma'anic mi la' chʌn ubin jini c t'an, mi ma'anic mi la' chʌn jac'beñon c mandar,

^15-16 mi tsa' jach caji' la' ñusan c mandar, mi tsa' caji' la' chañ'esan la' bʌ tic tojlel cha'an mi la' ñusan c t'an, yic'ot pejtelel j cʌntesa, joñon mi caj cʌq'ueñetla wocol. Mi caj cotsʌbeñetla la' bʌq'uen. Mi caj cʌq'ueñetla jini leco bʌ ojbal, yic'ot jini c'ajc tac c'ʌlʌl mi' yajpel la' wut, c'ʌlʌl mi' toj sajtel la' pusic'al. Che' jini lolom jach mi caj la' cha'len pac', come jini la' contrajob mi caj i c'uxbeñetla.

¹⁷ Mi caj j contrajiñetla. Mi caj la' puts'el ti' tojlel la' contrajob. Majqui jach ts'a' mi' q'ueletla, mi caj i p'ump'un tic'lañetla. Mi caj la' to'o cha'len bʌq'uen che' ma'anic majch woli' yajñesañetla.

¹⁸ Pero mi ma'anic mi la' cha' sutq'uin la' bʌ cha'an ili wocol tac, che' jini mu' to cʌq'ueñetla yambʌ wucyajl wocol cha'an i tojol la' mul.

¹⁹ Mi caj c jisʌbeñetla pejtelel i chanlel la' pusic'al. Mi caj cʌc' ti jajmel pañimil. Wen tsʌtsch'ojol mi caj i sujtel la' lum.

²⁰ Che' jini mi caj i to'ol jilel la' p'ʌtʌlel, come jini la' lum ma'anix mi caj i wen cosan la' pʌc'ʌb. Jini la' te' ma'anix mi caj i yʌc' i wut.

²¹ Mi tilel bixel jax la' pusic'al, mi mach la' womic la' wen ubin c t'an, mi caj cʌq'ueñetla yambʌ wucyajl jini wocol cha'an i tojol la' mul.

²² Mi caj c choc tilel ti la' tojlel jontol tac bʌ bʌte'el cha'an mi' jisan la' walobilob yic'ot la' wʌlac'. Che' jini mi caj i pim'an la' bijlel.

²³ Mi cha'an pejtelel ili wocol ma'anic mi la' q'uextan la' pusic'al, mi tsa' jach caji la' chʌn ñusʌbeñon pejtelel jini c mandar,

²⁴ che' jini joñon mi caj cʌq'ueñetla pejtelel i tojol la' mul. Mu' to cʌq'ueñetla yambʌ wucyajl wocol cha'an i tojol la' mul.

²⁵ Mi caj ti jisañetla espada cha'an ti caj tsa' la' ñusʌbeyon c t'an. Anquese mi la' lon ña'tan la' coltan la' bʌ ya' ti la' tejclum tac, ya'i mi caj cʌq'ueñetla leco bʌ la' c'amʌjel. Wersa mi caj i jisañetla jini la' contrajob.

²⁶ Che' mic jisan i bʌl la' ñʌc', lujuntiquil x'ixicob mi caj i tiq'uesʌbeñetla la' waj ti jump'ejl i yajñib c'ajc. Che' mi la' c'ux, ma'anic mi caj la' ñaj'an.

²⁷ Pero mi ma'anic mi la' ñopon, mi tilel bixel jach la' pusic'al tic tojlel che' tsa'ix la' wubi pejtelel ili wocol,

²⁸ che' jini mi caj cʌq'ueñetla yambʌ wucyajl i tojol la' mul.

²⁹ Mi caj la' wʌlʌc c'uxben i bʌc'tal la' walobilob.

³⁰ Mi caj c jisʌbeñetla la' dios tac yic'ot jini bubujtʌl baqui mi la' lon pul majtañʌl yic'ot i pulʌntib. Mi caj j cʌy jini chʌmenix bʌ la' bʌc'tal tac ya' ba'an la' dios tac. Ts'a' mi caj j q'ueletla.

³¹ Jochocña mi caj j cʌy jini la' tejclum. Mi caj c jisan jini la' templo tac. Ma'anix mi caj cubiben i yujts'il jini majtañʌl mu' bʌ la' pul.

³² Jochocña' mi caj i cʌytʌl jini pañimil. La' contrajob mi caj i yajñelob ti la' lumal. Mi caj i toj sajtelob i pusic'al cha'an la' wocol.

³³ Mi caj c pam puquetla ti pejtelel pañimil. Mi caj cʌq'uetla ti jilel ti espada. Che' jini jochocña mi caj i cʌytʌl la' lum yic'ot la' tejclum tac.

^34-35 Che' jini mi caj i c'aj i yo pejtelel jini la' wumulel tac. Mi caj i c'aj i yo la' lum che' ya' añetla ti' lumal la' contrajob. Ti pejtelel ora che' jochol mi caj i c'aj i yo, jiñʌch i wentajlel cha'an ma'anic tsa' la' wʌq'ue i c'aj i yo che' ti' wuwucp'ejl jab che' bʌ ya'to chumuletla.

³⁶ Pejtelel jini ya' bʌ cuxulob mi caj i wersa pʌjyelob majlel ti' lumal i contrajob. Mi caj i yochelob ti' mozo. Che' chijlaw mi' yubibeñob i t'an i yopol te', mi caj i lon ña'tañob an majqui woli' yajñesañob. Mi caj i cha'leñob puts'el anquese ma'anic majch woli' yajñesañob. Mi caj i yajlelob.

³⁷ Mi caj i laj bʌ cujob i bʌ cha'an mi' cha'leñob puts'el, come mi' lon ña'tañob an majqui mi caj i tsʌnsañob. Che' jini mach mejlix la' mʌlben jini la' contrajob.

³⁸ Mi caj la' jisʌntel ti yambʌ lum tac. La' contrajob mi caj i jisañetla.

³⁹ Pejtelel la' pi'ʌlob mach bʌ anic mi' chʌmelob mi caj i c'unte' jilelob ti' lumal i contrajob cha'an i mul yic'ot i mul i ñojte'elob.

⁴⁰ Pero ya' ba' woliyob ti wocol wersa mi caj i subob i mul yic'ot i mul i ñojte'elob. Come ti' caj i tsʌtslelob i pusic'al tsi' ñusʌbeyoñob c t'an. Ma'anic tsi' wen ñopoyoñob.

⁴¹ Jini cha'an tsac ts'a'leyob. Tsa cʌc'ʌyob ti jisʌntel ti' tojlel i contrajob. Mi che' jini mi' peq'uesañob i bʌ che' mic ju'sʌbeñob i pusic'al yic'ot wocol,

⁴² joñon mi caj c ña'tan jini xuc'ul bʌ t'an tsa' bʌ cʌq'ue Jacob, yic'ot Isaac, yic'ot Abraham. Che' jini muq'uix c cha' c'uxbiñob.

⁴³ Tijicña mi caj i c'aj i yo jini lum che' jochocña mi' cʌytʌl. Che' jini mi caj i ña'tañob wersa tsi' tojoyob i mul cha'an ti' caj tsi' ñusayob c t'an. Ma'anic tsi' p'isiyob ti wenta c mandar.

⁴⁴ Anquese cabʌl tsi' ñusʌbeyoñob c mandar, anquese ya'ix añob ti' lumal i contrajob, ma'anic mi caj c junyajlel chocob. Ma'anic mi caj c jisʌben i c'ʌjñibal c trato ti' tojlelob, come joñoñʌch i Yumon i Dioson.

⁴⁵ Cha'an ti' caj wolij c'uxbin jini israelob, mi caj c chʌn ña'tan jini xuc'ul bʌ c t'an tsa' bʌ cʌq'ue i ñojte'elob cha'an mi' Diosiñoñob. Come tsac loc'sa i ñojte'elob ti Egipto ti' tojlel pejtelel winicob x'ixicob ti yambʌ lum tac. Joñon Yumʌlon, che'en.

⁴⁶ Lac Yum tsi' yʌc'ʌ pejtelel ili mandar yic'ot jini xuc'ul bʌ i t'an che' bajche' tsi' subeyob israelob ya' ti wits i c'aba Sinaí ti' tojlel jini x'e'tel i c'aba' Moisés.