Levitico 25 - Chol: I T’an Dios

I jabilel c'aj o

^1-2 Lac Yum tsi' sube Moisés ya' ti wits i c'aba' Sinaí: Yom ma' suben pejtelel israelob: Che' bʌ tsa'ix ochiyetla ti la' lum mu' bʌ caj cʌq'ueñetla, yom mi la' wʌc ti c'aj o jini lum che' ti' wuwucp'ejlel jab.

³ Wʌcp'ejl jab mi' mejlel la' c'ʌn jini lum, wʌcp'ejl jab mi la' porajin la' ts'usubil cha'an mi la' tuc'ben i wut.

⁴ Che' ti' wucp'ejlel jab mi caj la' wʌq'uen i c'aj i yo jini la' lum, come jiñʌch c'aj o tic tojlel. Mach yomix mi la' cha'len pac' ya' ti' la' lum. Mach yomix mi la' chʌn porajin jini la' ts'usubil.

⁵ Che' mi' cha'len wut jini la' pʌc'ʌb ya' ti la' lum, mach yomix mi la' tuc'. Che' mi' cha'len wut la' ts'usubil, mach yomix mi la' tuc'. Come jiñʌch i jabilel cha'an mi' c'aj i yo jini la' lum.

⁶ Pero chʌn jasʌl chuqui mi caj la' c'ux, jatetla yic'ot la' winicob yic'ot la' criadajob, yic'ot la' waj e'tel mu' bʌ i cha'len chumtʌl la' wic'ot.

⁷ Pejtelel la' wʌlac' yic'ot bʌte'el, jasʌlʌch cha'an mi' c'ux.

⁸ Che' jini yom mi la' tsic bolomp'ejl i yuxc'al (49) jab. Che' tsa'ix ñumi mi caj i yʌjq'uel majtañʌl cha'an i tojol la' mul.

⁹ La' wuslec jini trompeta tac ti pejtelel la' lumal.

¹⁰ I lujump'ejlelix i yuxc'al (50) i jabil yom mi la' q'uel ti ch'ujul. Yom mi la' wʌc' ti colel pejtel la' pi'ʌlob chucbilo' bʌ ti majtan e'tel ti pejtelel la' lumal. Jiñʌch i yorajlel cha'an mi la' yʌp pejtelel jini bet tac. Jini lum tsa' bʌ chojñi mi caj i cha' aq'uentel i yum.

¹¹ Jiñʌch i jabilel cha'an mi la' wʌq'ueñon wocolix cʌlʌ, che' mi la' c'aj la' wo che' ti lujump'ejl i yuxc'al jabil. Mach yomic mi la' cha'len pac', mach yomic mi la' tuc'ben i wut la pʌc'ʌb ya' ti la' chol. Mach yomic mi la' tuc'ben i wut la' ts'usub.

¹² Come jiñʌch i jabilel la' tijicñʌyel. Ch'ujulʌch ti la' tojlel jini jabil. Pejtelel chuqui tac mi' yilol ac' la' lum mi mejlel la' c'ux.

¹³ Jiñʌch tijicña bʌ jabil. I yorajlelix mi la' cha' ch'ʌm i lum la' tat mi tsa' chojni.

^14-16 Mi tsa' la' chombe lum la' pi'ʌlob, mi tsa' la' mʌmbeyob i lum, mach yomic mi la' wis lotiñob. Ña'tanla jayp'ejl to jab jinto mi yujtel i jabilel la' tijicñʌyel. Che'ʌch yom i tojol la' lum che' mi la' cha'len choñoñel mʌñoñel ti' tojlel la' pi'ʌlob. Che' bajche' c'amel jini jabil yic'ot c'ajbal che'ʌch yom i tojol. Che' jal to jini jabil, letsem i tojol, pero che' lʌc'ʌl jini jabil yom juben i tojol, come che'ʌch bajche' c'amel jini c'ajbal mu' to bʌ caj i c'aj che'ʌch mi caj i chombeñet.

^17-18 Pero mach yomic mi la' wis lotin la' pi'ʌlob. Yom jach mi la' chʌn bʌc'ñañon. Come joñoñʌch la' Yumon, la' Dioson. Jini cha'an ts'ʌcʌl yom mi la' jac' jini t'an. Che'ʌch yom mi la' chʌn cha'len, cha'an tijicña mi la' wajñel ya' ba' chumuletla.

¹⁹ Che' jini ts'ʌcʌl mi caj i colel la' pʌc'ʌb. Mi caj la' c'ux jinto mi la' ñaj'an. Ma'anic majch mi caj i tic'lañetla.

²⁰ Pero mi tsa' caji la' lon al: ¿Chuqui mi caj laj c'ux c'ʌlʌl ti' wucp'ejlel jab? come ma'anix mi caj lac chʌn cha'len pac'. Ma'anix mi caj lac chʌn lotben i wut lac pʌc'ʌb, mi che'etla,

^21-22 Joñon mic jac'beñetla: Mi caj cʌq'ueñetla c bendición che' ti' wʌcp'ejlel jab, c'ʌlʌl ti' waxʌcp'ejlel jab. Che' ti' waxʌcp'ejlel jab mi caj la' cha'len pac'. Pejtelel la' c'ajbal mi caj la' c'ux c'ʌlʌl ti' waxʌcp'ejlel jabil, che' cha' anix i wut la' pʌc'ʌb.

²³ Jini lum mach mejlic ti junyajlel chojñel come c cha'añʌch. Ti la' pejtelel woli jach la' poj cha'len cʌntaya che' bajche' x'e'tel am bʌ ti' yum.

²⁴ Jini cha'an baqui jach chumuletla ti la' tejclum, wersa yom mi la' chʌcʌ q'uel la' lum. Majqui jach mi' mʌmbeñetla mi caj i cha' chombeñetla.

^25-26 Che' p'ump'un jax juntiquil israel, mi wersa mi' chon i lum, la' tilic i yeran cha'an mi' mʌn cha'an mi' cha' aq'uen. Pero mi tsa'ix i choño come ma'anic majch mi' coltan, mi tsi' taja taq'uin cha'an mi' cha' mʌñ i lum,

²⁷ la' i tsic jini jabil c'ʌlʌl che' bʌ tsi' choño jini lum. Che' ts'ʌcʌl mi' toj, an ti' wenta jini tsa' bʌ i mʌñʌ lum cha'an mi' cha' aq'uen i yum.

²⁸ Pero mi mach jasʌlic jini taq'uin cha'an mi' cha' ch'ʌm jini lum, che' jini chombilix mi' cʌytʌl. I cha'añʌchix jini tsa' bʌ i mʌñʌ, c'ʌlʌl ti' jabilel la' tijicñʌyel. Che' ti' yorajlel la' tijicñʌyel mi caj i cha' ch'ʌm i yum.

²⁹ Che' an winic mu' bʌ i chon i yotot am bʌ ti ts'ajquibil bʌ tejclum, mi mejlel i cha' mʌn i yotot. C'ʌlʌl ti jump'ejl jab mi mejlel i cha' ch'ʌm.

³⁰ Mi ma'anic tsa' mejli i cha' ch'ʌm che' ti jump'ejl jab, muq'uix i junyajlel ochel ti' wenta jini tsa' bʌ i tojo jini otot. Mach mejlix i cha' ch'ʌm jini ñaxan bʌ i yum che' ti jabilel la' tijicñʌyel.

³¹ Pero jini otot tac am bʌ ti xchumtʌl mach bʌ joy ts'ajquibilic i ti'il lajalʌch bajche' cholel tac. Mi mejlel i cha' ch'ʌm i yum che' ti jabilel la' tijicñʌyel che' mi' sujtel jini lum tac.

³² Pero ya' ba' mi' chumtʌlob jini levíjob, anquese ti tejclum tac, ti ba' jach bʌ ora mi mejlel i cha' ch'ʌm i yum.

³³ Mi an leví tsa' bʌ i choño i yotot am bʌ ti tejclum, mi caj i cha' ch'ʌme' che' ti' jabilel la' tijicñʌyel. Come i cha'añob levíjob i yototob yic'ot i tejclumob, i wenta i lumob ti' tojlel israelob.

³⁴ Pero jini levíjob mach mejlic i choñob jini lum an tac bʌ ti' joytʌlel jini tejclum tac. Come i cha'añobʌch jini lum ti pejtelel ora cha'an mi' chumtʌlob.

³⁵ Che' p'ump'un jax a pi'ʌl, an ti a wenta cha'an ma' coltan mi israel o mi parte ba' ch'oyol. Yom ma' pʌy tilel ti a wotot cha'an mi' yajñel a wic'ot.

³⁶ Yom ma' wen bʌc'ñan Dios. La' ajnic a wic'ot jini winic. Mach yomic ma' c'ajtiben i jol taq'uin mu' bʌ a wʌq'uen ti bet.

³⁷ Mach yomic ma' c'ajtiben i jol. Aq'uen chuqui yom,

³⁸ come joñoñʌch la' Yumon la' Dioson tsa' bʌ c loc'sayetla ti Egipto cha'an mi c'ʌq'ueñetla jini lum am bʌ ti Canaán, cha'an mi la' Diosiñon.

³⁹ Pero mi tsa' ochi ti pobre juntiquil a pi'ʌl, mi tsi' choño i bʌ ti a tojlel, mach yomic ma' wotsan ti a mozo cha'an ma' c'ʌn ti majtan e'tel.

⁴⁰ Pero uts'at mi' yochel ti a winic, che' bajche' xjula' ñajt bʌ tilem cha'an mi' coltañet ti a we'tel c'ʌlʌl ti' jabilel la' tijicñʌyel.

⁴¹ Che' jini mi caj i cha' loq'uel ti a wotot yic'ot i yalobilob, cha'an mi' cha' majlel ba'an i pi'ʌlob ya' ti' lum tsa' bʌ aq'uenti i tat.

⁴² Come tsac loc'sayetla ti Egipto. Jini cha'an mach mejliquetla ti chojñel cha'an mi la' cha' ochel ti majtan e'tel.

⁴³ Mach yomic ma' chañ'esan a bʌ ti' tojlel che' i yumet pero yom ma' bʌc'ñañon.

⁴⁴ Che' la' wom la' waj e'tel yom mi la' mʌn tilel ti yambʌ tejclum tac.

⁴⁵ Che' ja'el mi mejlel la' mʌmben i yalobil jini ñajt bʌ ch'oyolob wʌ'ix bʌ chumulob yic'otetla, anquese tsi' q'ueleyob pañimil ti la' lumal.

⁴⁶ Che' jini mi mejlel i cʌytʌlob ti la' wenta cha'an mi' ch'ʌmob ti' wenta la' walobilob ja'el. Pero mach yomic mi la' chañ'esan la' bʌ ti' tojlel la' pi'ʌlob, israelet bʌ la.

⁴⁷ Mi tsa' sujti ti rico jini ñajt bʌ ch'oyol ya' bʌ chumul la' wic'ot, mi tsa' ochi ti p'ump'un juntiquil a pi'ʌl, mi tsi' choño i bʌ ti' tojlel jini rico bʌ am bʌ ti la' tojlel,

⁴⁸ mu' to mejlel i cha' mʌjñel loq'uel cha'an juntiquil i yeran.

⁴⁹ Uts'at ja'el mi' coltan i yichan, mi i yalobil i yichan, mi juntiquil mero i pi'ʌl bʌ. Mi tsa' mejli i taj ts'ita' i taq'uin, mi mejlel i bajñel coltan i bʌ.

⁵⁰ La' i tsictesan bajche' c'amel an i bet ti' tojlel i yum, c'ʌlʌl ti jini jabil che' bʌ tsi' choño i bʌ c'ʌlʌl ti' jabilel la' tijicñʌyel. La' i tsic jayp'ejl jab an ti' tojlel i yum cha'an mi' toj che' bajche' mi' cha'len ganar x'e'tel. Che'ʌch mi caj i ña'tan bajche' c'amel yom tojtʌl cha'an mi' loq'uel ti libre.

⁵¹ Pero mi anto yom cabʌl jabil, ts'ʌcʌl yom mi' tojben cha'an mi mejlel ti loq'uel ti' wenta i yum.

⁵² Mi ñumenix cabʌl jab, mi cha'p'ejl uxp'ejl to jab yom cha'an i jabilel la' tijicñʌyel, mach onic mi caj i toj.

⁵³ I yum mi caj i q'uel che' bajche' x'e'tel ti jujump'ejl jabil. Ma'anic mi caj i p'ump'un tic'lan ti e'tel. Mach majtanic e'tel woli.

⁵⁴ Mi ma'anic tsa' mejli ti coltʌntel ti jini jabil tac, uts'at mi caj i loq'uel che' ti' jabilel la' tijicñʌyel. Temel yic'ot i yalobilob mi caj i loq'uel.

⁵⁵ Come jini israelob caj e'telobʌch, c winicobʌch. Tsac loc'sayob ti Egipto. La' Yumon la' Dioson.