Levitico 24 - Chol: I T’an Dios

I ya'lel i ts'ʌjbib c'ajc

^1-2 Lac Yum tsi' sube Moisés: Yom ma' subeñob pejtelel jini israelob cha'an mi' ch'ʌmbeñetob tilel jini aceite loc'sʌbil bʌ ti olivote', cha'an ma' c'ʌn a ts'ʌb c'ajc ti pejtelel ora ya' ti cotot.

^3-4 Ya'an jini lámpara melbil bʌ ti oro ti' tojel jini tsalʌl bʌ pisil mu' bʌ i mʌctan jini C'ax Ch'ujul bʌ Ajñibʌl. An ti' wenta Aarón cha'an mi' cha' otsan aceite, cha'an mi' tsepben tac i mechajlel ti jujump'ejl sʌc'ajel. Pejtelel iliyi yom mi la' chʌn ña'tan ti pejtelel q'uin jatetla yic'ot la' p'olbal.

Jini waj mu' bʌ i yʌjq'uel ti jujump'ejl q'uin

^5-8 Yom ma' chajpan jini harina, cha'an ma' pʌs jini lajchʌnq'uejl waj, jujunq'uejl jini waj yom ojlil latu jini harina. Yom cha'tsolom mi la' wʌc' jini waj tic tojlel ya' ti mesa melbil bʌ ti oro yic'ot jini pom ya' ti' pam. Che' jini wen xojocña mi' tsictiyel i yujts'il jini pom che' mi la' pulbeñon. Ti jajayajl che' ti' q'uiñilel c'aj o yom ma' tsole' tic tojlel jini c majtan mu' bʌ i yʌq'ueñoñob israelob. Che'ʌch yom mi la' mel c'ʌlʌl ti pejtelel ora.

⁹ Aarón yic'ot i yalobilob mi caj i c'uxob jini waj ya' ti Ch'ujul bʌ Ajñibʌl. Come jiñʌch c'ax ch'ujul bʌ c majtan yom bʌ mic chʌn aq'uentel ti pejtelel ora. Che' tsi' yʌlʌ lac Yum.

I tojol i mul jini xp'ajoñelob

¹⁰ Ti jim bʌ ora juntiquil i yalobil x'ixic mero israel bʌ, ch'oyol bʌ ti Egipto i tat, tsa' caji ti leto yic'ot juntiquil winic israel bʌ.

¹¹ Che' woli ti leto i yalobil jini egipto, tsi' p'ajbe i C'aba' lac Yum. I c'aba' i ña' jiñʌch Selomit, i yalobil jini Dibri loq'uem bʌ ti' p'olbal Dan. Tsa' pʌjyi ba'an Moisés jini winic tsa' bʌ i cha'le p'ajoñel.

¹² Che' jini tsi' yotsayob ti mʌjquibʌl jinto tsi' yubiyob chuqui mi' yʌl lac Yum.

^13-14 Lac Yum tsi' sube Moisés: Pʌyʌ majlel ti junwejl i ti' tejclum jini tsa' bʌ i cha'le p'ajoñel. Pejtelel jini winicob tsa' bʌ i yubiyob che' bʌ tsi' cha'le p'ajoñel, la' majlicob cha'an mi' yʌc'ob i c'ʌb ti' jol. Ti wi'il yom mi' julob ti' xajlel pejtelel israelob.

^15-16 Che' ja'el yom ma' subeñob jini israelob: Pejtelel majqui jach mi' p'ajbeñon j c'aba' Dios, wersa mi' tsʌnsʌntel cha'an i tojol i mul. Pejtelel jini winicob la' i julob ti xajlel, mi israel, o mi mach israelic. Mi tsi' p'ajbeyon j C'aba', la' chʌmic jini winic.

¹⁷ Che' ja'el jini winic mu' bʌ i tsʌnsan yambʌ, wersa mi caj i tsʌnsʌntel jini winic.

¹⁸ Che' an winic mu' bʌ i lowe' juncojt i yʌlac' yambʌ, wersa mi caj i q'uextʌbentel.

¹⁹ Jini mu' bʌ i lowe' i pi'ʌl, che' yom mi' melbentel ja'el.

²⁰ Jajts'el i q'uexol jajts'el, wutʌl ti' q'uexol wutʌl, ejʌl ti' q'uexol ejʌl, che' bajche' jach mi' low yambʌ, che'ʌch mi' melbentel ja'el.

²¹ Majqui jach mi' lowben i yʌlac' yambʌ, wersa yom mi' cha' q'uextbentel. Jini mu' bʌ i tsʌnsan yambʌ, la' chʌmic jini winic.

²² Che'ʌch yom mi la' mel ti' tojlel jini ñajt bʌ ch'oyolob, yic'ot ti' tojlel la' pi'ʌlob wʌ' bʌ añob i lumal, come la' Yumon la' Dioson, che'en.

²³ Moisés tsi' subeyob jini israelob cha'an mi' loc'sañob jini tsa' bʌ i cha'le p'ajoñel. Tsi' juluyob ti xajlel. Jini israelob tsi' meleyob che' bajche' lac Yum tsi' yʌlʌ.