Levitico 21 - Chol: I T’an Dios

I sʌq'uesʌntel jini motomajob

¹ Lac Yum tsi' sube Moisés: Subeñob jini motomajob i yalobilob Aarón: Mach yomic mi la' tʌl jini xchʌmel ame bib'aquetla.

^2-4 Pero mach tic'bilic mi la' tʌl mi tsa' chʌmi la' pi'ʌl, mi' la' tat mi' la' ña', mi' la' walobil, mi' la' weran, mi xch'oc bʌ la' wijts'in max to bʌ anic i ñoxi'al. Mach yomic mi la' bib'esan la' bʌ ti' tojlel yambʌ winicob, come motomajetla.

⁵ Mach la' wʌc' ti jujchintel i tsutsel la' jol. Mach mi' la' set' la' tsucti'. Mach yomic lojwentic la' bʌc'tal.

⁶ Yom ch'ujuletla tic tojlel. Mach mi la' juch'tec' j c'aba', come an ti la' wenta la' wʌq'ueñon c majtan, come la' Yumon la Dioson.

⁷ Mach mi' la' cha'len ñujpuñel yic'ot sts'i'lel bʌ x'ixic mi cʌybil bʌ x'ixic.

⁸ Ch'ujul mi caj la' wajñel cha'an mi la' wʌq'ueñon c majtan tac, come ch'ujulon mu' bʌ c sʌq'uesañetla.

⁹ Mi tsa' caji i cha'len i ts'i'lel jini xch'oc bʌ i yalobil motomaj, woli' p'aj i tat. Wersa mi caj i pulel ti c'ajc.

¹⁰ Suben jini ñuc bʌ motomaj tsa' bʌ bombenti i jol ti aceite, lʌpbil bʌ i cha'an jini yajcʌbil bʌ i pislel: “Mach yomic wojtsic'tic a jol. Mach ma' tsil a pislel.

¹¹ Mach ma' wochel ba'an ch'ujlelʌl, anquese a tat a ña'.

¹² Mach ma' loq'uel ti Ch'ujul bʌ Ajñibʌl che' an a we'tel. Mach ma' lon q'uel jini Ch'ujul bʌ Ajñibʌl che' bajche' ba' jach bʌ otot, come joñon tsac wa'chocoyetla. Joñoñʌch la' Yumon.

¹³ Yom xch'oc to bʌ x'ixic cha'an a wijñam.

^14-15 Mach ma' pʌy meba' x'ixic, mi cʌybilix bʌ x'ixic, mi sts'i'lel bʌ x'ixic. Yom ma' pʌy xch'oc to bʌ a wijñam ti' tojlel a pi'ʌlob. Mach yomic che' xʌbʌl i ch'ich'el a walobilob yic'ot yambʌ colem bʌ tejclum”. Che'ʌch yom ma' suben, che'en lac Yum.

^16-17 Lac Yum tsi' cha' sube Moisés: Yom ma' suben Aarón: Mach mejlic i yʌq'ueñon c majtan, mi juntiquilic i p'olbal am bʌ i p'ajomal.

¹⁸ Mach mejlic i ñochtañon mi juntiquilic winic mach bʌ c'oq'uic, mi xpots' bʌ, mi jinic q'uichq'uichña bʌ i yoc, mi jinic mach bʌ wenic i wut, mi juntiquilic mach bʌ c'oq'uic.

¹⁹ Mach mejlic ti tilel ja'el jini c'ʌscujen bʌ i yoc i c'ʌb,

²⁰ yic'ot jini cotol bʌ i pat, yic'ot jini pec' bʌ winic, yic'ot jini am bʌ tocal ti' wut, yic'ot jini am bʌ i sal ti' bʌc'tal, yic'ot tsoy, yic'ot mach bʌ yujilic albʌl.

²¹ Majqui jach mach c'oq'uic ti' tojlel i p'olbal jini motomaj Aarón mach mejlic ti ochel ba' añon cha'an mi' pulbeñon c majtan. Tic'bil mi' pulbeñon c majtan come mach c'oq'uic.

²² Mi mejlel i c'ux jini ch'ujul bʌ c waj, jiñʌch c'ax ch'ujul bʌ c majtan.

²³ Pero tic'bil mi yochel ya' ti junwejlel tsalʌl bʌ pisil yic'ot ya' ba'an pulʌntib. Ti' caj cha'an mach c'oq'uic jini winic, mach mejlic ti ochel ame i bib'esan jini Ch'ujul bʌ Cajñib, come joñon i Yumon mu' bʌ c sʌq'uesañob, che'en lac Yum.

²⁴ Che'ʌch bajche' jini Moisés tsi' cha' sube Aarón yic'ot i yalobilob, yic'ot pejtelel jini israelob.