Levitico 20 - Chol: I T’an Dios

Castigo cha'an i melol chuqui jontol

^1-2 Lac Yum tsi' cha' sube Moisés: Subeñob pejtelel israelob: Che' an winic, mi jini israel bʌ, mi jini ñajt bʌ ch'oyol mu' bʌ i cha'len chumtʌl ba'an israelob, majqui jach mi' yʌc' i yalobil cha'an pulbil bʌ i majtan jini dioste' Moloc, wersa mi' chʌmel jini winic. Yom mi la' jul ti xajlel.

³ Joñon ja'el mi caj j contrajin jini winic. Mi caj c choc loq'uel ti' tojlel i pi'ʌlob, come tsa'ix i yʌc'ʌ i yalobil cha'an i majtan Moloc. Tsa'ix i bib'esa jini Ch'ujul bʌ Ajñibʌl. Tsi' juch' teq'ue jini ch'ujul bʌ j c'aba'.

⁴ Mi tsa' q'uele woli' majlel winic cha'an mi yʌc' i yalobil ba'an Moloc, mi che' jach tsa' q'uele, mi ma'anic tsa' tsʌnsa,

⁵ che' jini, joñon mi caj j contrajiñet yic'ot pejtelel a pi'ʌlob. Mi caj c choquet loq'uel tic tejclum yic'ot a pi'ʌlob woli bʌ i tsajcañob jini dioste' Moloc.

⁶ Che' ja'el jini winic mu' bʌ i majlel ba'an payxo x'alt'añob yic'ot ba'an xwujtob cha'an mi' tsajcʌbeñob i melbal, mi caj j contrajin jini winic. Mi caj c choc loq'uel ti' tojlel i pi'ʌlob.

⁷ Jini cha'an yom ch'ujul mi la' wajñel ti pejtelel la' melbal, come la' Yumon la' Dioson.

⁸ Yom mi la' chʌn jac'beñon pejtelel c t'an cha'an chʌn c'ajal la' cha'an ti pejtelel ora, come joñoñʌch la' Yumon la' Dioson mu' bʌ c sʌq'uesañetla.

⁹ Majqui jach mi' p'aj i tat i ña' wersa mi' tsʌnsʌntel, come i tatʌch i ña'ʌch tsa' bʌ i p'aja. La' ajnic ti' bajñel wenta jini mulil.

¹⁰ Che' an winic mu' bʌ i pi'lʌben i yijñam i pi'ʌl, jini winic yic'ot jini x'ixic wersa yom mi' tsʌnsʌntelob.

¹¹ Che' ja'el majqui jach mi' pi'lʌben i yijñam i tat, tsa'ix i yʌc'ʌ ti quisin i tat. Jini winic yic'ot jini x'ixic wersa mi caj i tsʌnsʌntelob. La' ajnic jini mulil ti' wentajob.

¹² Che' an tatʌl mu' bʌ i pi'len i yʌ'lib, ti' cha'ticlelob mi caj i tsʌnsʌntelob, come c'ax bibi' jini tsa' bʌ i meleyob. La' ajnic jini mulil ti' wentajob.

¹³ Che' an winicob mu' bʌ i wʌlʌc pi'leñob i bʌ, la' cʌlec ti' wentajob jini mulil come tsa'ix i meleyob chuqui bibi'. Jini cha'an ti' cha'ticlelob wersa mi' chʌmelob.

¹⁴ Jini mu' bʌ i pʌy x'ixic temel yic'ot i ña', c'ax ñucʌch i mul. Yom mi' wersa pulelob ti yuxticlelob cha'an mi' jilel jini jontolil ti la' tojlel.

¹⁵ Che' ja'el che' an winic mu' bʌ i pi'len alʌc'ʌl, wersa mi' tsʌnsʌntel temel yic'ot jini alʌc'ʌl.

¹⁶ Che' ja'el jini x'ixic mi tsi' yʌc'ʌ i bʌ ti pi'lentel ti chuqui tac an ti pañimil, wersa mi' tsʌnsʌntel jini x'ixic yic'ot jini alʌc'ʌl. La' cʌlec ti' bajñel wenta i mul.

¹⁷ Che' an winic mu' bʌ i pi'len i chich mi i yijtsin, mi xch'oc bʌ i yalobil i tat i ña', c'ax ñucʌch i mulil. Quisintic jax chuqui mi' mel. Wersa mi caj i tsʌnsʌntelob ti' wut pejtelel israelob. La' cʌlec i mul ti' wenta.

¹⁸ Che' an winic mu' bʌ i pi'len x'ixic che' woli' q'uel i c'amʌjel, yom mi' chojquelob loq'uel ti' tojlel i pi'ʌlob ti' cha'ticlelob come tsa'ix tsictiyi i c'amʌjel.

¹⁹ Jini winic mach yomic mi' pi'lʌben i yijts'in i tat, mi i yijts'in i ña', come i ña'jelʌch. Mi caj i yajñel i mul ti' wenta.

²⁰ Che' an winic mu' bʌ i pi'lʌben i yijñam i yumijel, wolix i chilben i yijñam i yumijel. Ti' cha'ticlel mi caj i tojob i mul. Ma'anic mi' caj ti ajñel i yalobil.

²¹ Jini winic mu' bʌ i pi'leben i yijñam i yeran, mulilʌch, come tsa'ix i chilbe i yijñam i yeran. Jini cha'an mi caj i chʌmelob.

²² Wersa yom mi la' jac'beñon pejtelel c t'an yic'ot c mandar, ame mic cha' choquetla loq'uel ti jini lum che' bʌ tsac pʌyʌyetla ochel.

²³ Mach yomic mi la' mel jini lolom jax tac bʌ che' bajche' jini winicob mu' bʌ caj c choc loq'uel ti la' tojlel, come jontol jax pejtel chuqui mi' melob. Jini cha'an wolij contrajiñob.

²⁴ Tsa'ix c subeyetla cha'an mi la' ch'ʌmbeñob i lum. Tsa'ix cʌq'ueyetla jini wen bʌ lum ba' mi' colel ti uts'at pejtelel pʌc'ʌbʌl. Joñoñʌch la' Yumon la' Dioson tsa' bʌ c yajcayetla. Ma'anic tsac yajca yambʌ winicob x'ixicob.

²⁵ Jini cha'an yom tsajiletla ame la' c'ux jini tic'bil bʌ alʌc'ʌl tac, yic'ot xwejlel mut. Jini jach sʌc bʌ yom mi la' c'ux. Mach yomic mi la' bib'esan la' bʌ yic'ot jini tic'bil bʌ alʌc'ʌl, yic'ot jini tic'bil bʌ mut, anquese wen cabʌl jini alʌc'ʌl tac.

²⁶ Yom ch'ujul mi la' wajñel tic tojlel, come joñon la' Yumon, ch'ujulon. Ma'anic tsac yajca yambʌ winicob x'ixicob. Tsac yajcayetla cha'an mi la' wochel tic cha'an bʌ.

²⁷ Che' an winic mi x'ixic mu' bʌ i pejcʌben i ch'ujlel jini xchʌmel, o mi' lon ña'tan chuqui tac mi' caj ti yujtel, wersa mi' caj ti jujlel ti xajlel. Jini mulil mi' cʌytʌl ti' wentajob. Che' tsi yʌlʌ lac Yum.