Levitico 15 - Chol: I T’an Dios

I bibi'lel winicob x'ixicob

^1-2 Lac Yum tsi' sube Moisés yic'ot Aarón: Yom ma' cʌntesan israelob ili mandar tac: Che' mi' taj i pʌjq'uemal winic mi' yajñel ti bibi'.

³ Jiñʌch i bibi'lel ti jujunyajl che' mi' choc i p'ʌtʌlel i bʌc'tal.

⁴ Pejtelel wʌyibʌl ba' mi' wʌyel jini winic, bibi' mi' cʌytʌl, che' ja'el baqui jach mi' buchtʌl bibi' mi' cʌytʌl.

⁵ Majqui jach mi' tʌl jini wʌyibʌl wersa yom mi' wuts' i pislel. Yom mi' cha'len ts'ʌmel ja'el. Pero ma'anic mi' poj q'uejlel ti sʌc c'ʌlʌl mi' bʌjlel q'uin.

⁶ Majqui jach mi' buchtʌl ya' ti' buchlib jini, yom mi' wersa wuts' i pislel. Yom mi' cha'len ts'ʌmel ja'el. Ma'anic mi' poj q'uejlel ti sʌc c'ʌlʌl mi' bʌjlel q'uin.

⁷ Che'ʌch yom mi' mel majqui jach mi' tʌle'.

⁸ Che' ja'el mi tsa' c'oti i tujb jini winic ba'an yambʌ, wersa yom mi' wuts' i pislel jini tsa' bʌ tujbʌnti. Yom mi' cha'len ts'ʌmel. Ma'anic mi' poj q'uejlel ti sʌc c'ʌlʌl mi' bʌjlel q'uin.

⁹ Pejtelel i sillajlel caballo che' mi' c'ʌchtan jini winic, bibi' mi' cʌytʌl.

¹⁰ Majqui jach mi' tʌl chuqui tac an ti yebal jini winic, yom mi' wuts' i pislel. Yom mi' cha'len ts'ʌmel, pero bibi' to mi' cʌytʌl c'ʌlʌl mi' bʌjlel q'uin.

¹¹ Majqui jach mi' chucben i c'ʌb che' mach pocolic i c'ʌb ti ja', wersa yom mi' wuts' i pislel. Yom mi' cha'len ts'ʌmel. Pero ma'anic mi' poj q'uejlel ti sʌc c'ʌlʌl mi' bʌjlel q'uin.

¹² Che' ja'el mi tsi' tʌlʌ poc' jini winic, wersa mi' tojp'el jini poc'. Mi melbil ti te' jini poc', wersa mi' pojquel ti ja'.

¹³ Che' mi' yujtel i choc i p'ʌtʌlel i bʌc'tal, yom mi' tsic wucp'ejl q'uin cha'an i sʌq'uesʌntel. Yom mi' wuts' i pislel. Yom mi' cha'len ts'ʌmel ti cuxul bʌ ja'.

¹⁴ Che' ti' waxʌcp'ejlel q'uin la' i pʌy tilel cha'cojt x'ujcuts mi xpuruwoc, cha'an mi' tilel ba' añon ti' ti' jini Tabernáculo. La' i yʌq'uen jini motomaj.

¹⁵ Jini motomaj mi caj i yʌc' juncojt cha'an i mul jini winic, yambʌ cha'an mic pulbentel c majtan. Jini motomaj mi caj i yʌq'ueñon cha'an mic ñusʌben i mul jini winic cha'an ti' caj tsi' choco i p'ʌtʌlel i bʌc'tal.

¹⁶ Che' mi' taj i pʌjq'uemal winic, yom mi' cha'len ts'ʌmel, pero ma'anic mi' poj q'uejlel ti sʌc c'ʌlʌl mi' bʌjlel q'uin.

¹⁷ Jini i pʌjq'uemal jini winic che' mi' pʌq'ue jini pisil yic'ot yan tac bʌ, wersa yom mi' pojquel ti ja', pero ma'anic mi' poj q'uejlel ti sʌc c'ʌlʌl mi' bʌjlel q'uin.

¹⁸ Che' mi' pi'leñob i bʌ winic yic'ot x'ixic, wersa yom mi' laj bʌ cha'leñob ts'ʌmel, pero ma'anic mi' poj q'uelelob ti sʌc c'ʌlʌl mi' bʌjlel q'uin.

¹⁹ Che' woli i q'uel i c'amʌjel x'ixic, wucp'ejl q'uin yom mi' yajñel ti' bajñelil. Majqui jach mi' tʌl jini x'ixic, ma'anic mi' poj q'uejlel ti sʌc c'ʌlʌl mi' bʌjlel q'uin.

²⁰ Che' ja'el ya' ba' mi' ñoltʌl yic'ot ba' mi' buchtʌl jini x'ixic che' woli' q'uel i c'amʌjel, bibi' mi' cʌytʌl c'ʌlʌl mi' bʌjlel q'uin.

^21-23 Majqui jach mi' tʌl ya' ba' mi' wʌyel, ba' mi' buchtʌl, wersa mi caj i wuts' i pislel. Mi caj i cha'len ts'ʌmel. Ma'anic mi' poj q'uejlel ti sʌc c'ʌlʌl mi' bʌjlel q'uin.

²⁴ Che' ja'el mi an winic mu' bʌ i pi'len x'ixic che' maxto anic tsa' cha' sʌq'uesʌnti tic tojlel, bibi' mi' cʌytʌl. Ya' ba' mi' ñoltʌl jini winic mi' bib'esan jini wʌyibʌl ja'el.

²⁵ Che' mi' chʌn q'uel i c'amʌjel x'ixic che' ñumenix i yorajlel bajche' mi' q'uel ti uw ti uw, bibi' mi' yajñel jini x'ixic c'ʌlʌl jinto mi' lajmel i c'amʌjel.

²⁶ Baqui jach mi' ñoltʌl jini x'ixic yic'ot bajqui jach mi' buchtʌl che' woli i q'uel i c'amʌjel, bibi' mi' cʌytʌl che' bajche' ti uw ti uw che' mi' q'uel i c'amʌjel.

²⁷ Majqui jach mi' yochel ya' ti otot, mi tsi' tʌlʌ jini wʌyibʌl mi jini tem, wersa yom mi' wuts' i pislel. Yom mi' cha'len ts'ʌmel, pero bibi' to mi' cʌytʌl c'ʌlʌl mi' bʌjlel q'uin.

²⁸ Che' ujtemix i q'uel i c'amʌjel, che' ñumenix wucp'ejl to q'uin mi' cha' q'uejlel ti sʌc.

²⁹ Che' ti' waxʌcp'ejlel q'uin yom mi' pʌy tilel cha'cojt x'ujcuts mi xpuruwoc cha'an mi' yʌq'uen jini motomaj ya' ti' ti' jini Tabernáculo.

³⁰ Jini motomaj mi caj i yʌc' juncojt cha'an majtañʌl cha'an i mul jini x'ixic, yambʌ cha'an mic pulbentel. Jini motomaj an ti' wenta cha'an mi' yʌq'ueñon ili majtañʌl cha'an i q'uexol i mul jini x'ixic che' ujtemix i q'uel i c'amʌjel.

³¹ Jini cha'an che'ʌch yom mi' la' sʌq'uesan jini israelob che' woli' q'uelob i c'amʌjel cha'an ma'anic mi' chʌmelob che' mi' yochelob tic Tabernáculo am bʌ ti la' tojlel.

³² Che' ja'el jiñʌch ili mandar che' an winic tsa' bʌ i taja i bibesʌntel cha'an ti' caj i c'amʌjel, yic'ot che' an i pʌjq'uemal.

³³ Jiñʌch mandar ja'el cha'an x'ixic che' woli' q'uel i c'amʌjel, che' ja'el ti' tojlel jini mu' bʌ i wʌyel yic'ot jini x'ixic che' mach sʌquic. Che' tsi' yʌlʌ lac Yum.