Levitico 14 - Chol: I T’an Dios

Bajche' mi' cʌjñel chuqui tac bibi' yic'ot chuqui tac sʌc

^1-2 Lac Yum tsi' cha' sube Moisés che'ʌch yom melol ti' tojlel jini am bʌ leco bʌ i tsoy che' mi' lajmel. Yom mi' pʌjyel ba'an motomaj.

³ Jini motomaj mi caj i majlel ti junwejl i ti' jini tejclum cha'an mi' wen q'uel jini winic. Mi tsa'ʌchix junyajlel lajmi jini leco bʌ i tsoy,

⁴ jini motomaj mi caj i choc ti pʌyol cha'cojt sʌc bʌ mut. Yom mi' ch'ʌm ts'ita' ch'ujte' yic'ot chʌchʌc bʌ chij yic'ot hisopo cha'an mi' sʌq'uesʌntel jini winic tsa' bʌ lajmi.

⁵ Jini motomaj mi caj i yʌc' ti tsʌnsʌntel juncojt mut ti' mal jump'ejl poc' melbil bʌ ti lum ba' woli ti ajñel ja'.

⁶ La' i ch'ʌm jini i cha'cojtlel mut cuxul to bʌ. La' i ts'aj ti' ch'ich'el temel yic'ot jini ch'ujte' yic'ot jini chʌchʌc bʌ chij yic'ot jini hisopo.

⁷ Wucyajl yom mi' tsijcan jini i ch'ich'el ti' pam i bʌc'tal jini winic tsa' bʌ lajmi leco bʌ i tsoy. Jini motomaj mi caj i tsictesan lajmenix. Yom mi' cole' jini cuxul bʌ mut cha'an mi' cha' wejlel majlel.

⁸ Jini winic tsa' bʌ lajmi mi caj i wuts' i pislel. Mi caj i tsepben pejtelel i tsutsel i cuctal, mi caj i cha'len ts'ʌmel. Mi mejlel i cha' majlel ti chumtʌl ti' mal jini tejclum. Pero anto yom mi' ñumel wucp'ejl q'uin cha'an mi' cha' ochel ti pisil bʌ i yotot.

⁹ Che' ti' wucp'ejlel q'uin yom mi caj i cha' set'bentel i tsutsel i jol. Yom mi' jujchin i tsucti' yic'ot i tsutsel i wut. Yom mi' wuts' i pislel. Yom mi' cha'len ts'ʌmel. Che' jini mi caj i tsictiyel lajmenix.

¹⁰ Che' ti yijc'ʌlal (jiñʌch i waxʌcp'ejlel q'uin) la' i pʌy tilel cha'cojt tat tiñʌme', mach bʌ wis anic i c'amʌjel mi i lojwel, yic'ot juncojt xch'oc tiñʌme' am bʌ jump'ejl i jabilel mach bʌ wis anic i c'amʌjel mi i lojwel, yic'ot lujump'is jini harina wen juch'bil bʌ, xajc'ubil bʌ yic'ot olivo aceite, yic'ot ojlil litro olivo aceite.

¹¹ Jini motomaj mu' bʌ caj i sʌq'uesan, an ti wenta cha'an mi' yʌc' jini winic tic tojlel ya' ti' ti' Tabernáculo yic'ot pejtelel woli bʌ i yʌc' jini winic.

¹² Jini motomaj mi caj i ch'ʌm jini juncojt tat tiñʌme' cha'an i mul jini winic. Mi caj i jʌmts'un ojlil litro jini olivo aceite tic tojlel ya' ba'an jini pulʌntib.

¹³ Yom mi' tsʌnsan jini tiñʌme' baqui mi' tsʌnsʌntel jini alʌc'ʌl tac cha'an i tojol mulil yic'ot c majtan mu' bʌ c pulbentel ya' ti' ti' Tabernáculo. Yom mi' yʌq'uentel jini motomaj cha'an mi' c'ux che' bajche' jini majtañʌl cha'an i tojol mulil. Wen ch'ujulʌch jini majtañʌl.

¹⁴ Jini motomaj mi caj i ch'ʌmben i ch'ich'el jini tiñʌme' cha'an mulil, cha'an mi' bon ya' ti' c'unlel ñoj bʌ i chiquin jini winic, yic'ot ya' ti ñoj bʌ i ña'al i c'ʌb yic'ot ja'el ti ñoj bʌ i ña'al i yoc.

¹⁵ Yom ja'el mi' ch'ʌm jini olivo aceite cha'an mi' col ti' mal i c'ʌb ti' tojel i ts'ej.

¹⁶ Yom mi' yʌch'esan ti aceite i yal i c'ʌb am bʌ ti' tojel i ñoj. Wucyajl yom mi' tsijcan ti' c'ʌb tic tojel.

¹⁷ Jini motomaj mi caj i ch'ʌm lamital jini i ts'ajquil aceite mu' bʌ i cʌytʌl ya' ti mal i c'ʌb. Yom mi' bomben ti' c'unlel ñoj bʌ i chiquin yic'ot ti ñoj bʌ i ña'al i c'ʌb yic'ot ti ñoj bʌ i ña'al i yoc che' bajche' tsi' mele yic'ot i ch'ich'el jini majtañʌl cha'an bʌ mulil.

¹⁸ Jini i colojbal, la' i loch' ti mal i c'ʌb cha'an mi' bomben i jol jini winic. Che'ʌch yom mi' yʌq'ueñon majtañʌl jini motomaj cha'an i tojol i mul jini winic.

¹⁹ Wi'ilix jini motomaj mi caj i yʌc' jini majtañʌl cha'an mi' ñusʌbentel i mul jini winic, cha'an sʌquix mi' cʌytʌl ti' bibi'lel. Mi caj i tsʌnsan jini tiñʌme' cha'an mi' pulbeñon.

²⁰ Jini motomaj mi caj i pulbeñon yic'ot trigo bʌ majtañʌl ya' ti pulʌntib. Che' jini mi' yʌc' ti ñusʌntel i mul jini winic. Sʌq'uesʌbilix jini winic.

²¹ Mi c'ax p'ump'un jini winic, mi mach jasʌlic i cha'an cha'an mi' pʌy tilel cha'cojt alʌ tat tiñʌme', yom mi' pʌy tilel juncojt alʌ tat tiñʌme', cha'an mi' yʌq'ueñon cha'an i mul. Yom jʌmts'ubil jini c majtan cha'an i mul ya' ti' tojel jini pulʌntib. Yom jach uxp'ejl litro sʌsʌc bʌ harina wen juch'bil bʌ, xajc'ubil bʌ ti olivo aceite, cha'an c majtan melbil bʌ ti trigo. Yom ja'el ojlil i jo'p'ejl litro jini olivo aceite.

²² Che' ja'el yom mi' ch'ʌm tilel cha'cojt xpuruwoc mi x'ujcuts. Ya' tsiquil bajche' mi' mejlel i cha'an. Yom juncojt cha'an i ñusʌntel i mul, yambʌ cha'an mic pulbentel.

²³ La' i ch'ʌmben tilel jini motomaj ya' ti' ti' jini Tabernáculo. Che' ti waxʌcp'ejlel q'uin, mi caj i sʌq'uesan i bʌ tic tojlel.

²⁴ Jini motomaj mi caj i ch'ʌm jini tiñʌme' cha'an i tojol mulil yic'ot ojlil litro olivo aceite. La' i jʌmts'un ti' tojel jini pulʌntib che' bajche' jʌmts'ubil bʌ c majtan.

²⁵ Ti wi'il yom mi' tsʌnsan jini tiñʌme' cha'an i tojol mulil. Mi caj i lotben i ch'ich'el cha'an mi' bon jini winic mu' bʌ caj i sʌq'uesʌntel. Yom mi' bomben ti' c'unlel ñoj bʌ i chiquin jini winic, yic'ot ti ñoj bʌ i ña'al i c'ʌb, yic'ot ti ñoj bʌ i ña'al i yoc.

²⁶ Mi caj i col jini aceite ti' mal jini ts'ej bʌ i c'ʌb.

²⁷ Mi caj i ts'ita' ach'esan i yal i c'ʌb i ñoj bʌ cha'an mi' tsijcan wucyajl tic tojel.

²⁸ Che' ja'el jini motomaj mi' c'ʌn ts'ita' jini aceite am bʌ ti ts'ej bʌ i c'ʌb cha'an mi' bomben i c'unlel i chiquin jini winic yic'ot i ña'al i c'ʌb yic'ot i ña'al i yoc ti' tojel i ñoj che' bajche' tsi' mele yic'ot i ch'ich'el jini majtañʌl cha'an tsi' taja i mul.

²⁹ Jini motomaj mi caj i bomben i jol jini winic woli bʌ i sʌq'uesʌntel yic'ot jini aceite mu' bʌ i colojbajel ti' c'ʌb cha'an mi' ñusʌbentel i mul.

³⁰ Mi caj i yʌc' cha'cojt xpuruwoc mi x'ujcuts. Ya' tsiquil bajche' mi' mejlel i cha'an.

³¹ Jini juncojt cha'añʌch mi' taj i ñusʌntel i mul, yambʌ cha'añʌch mic pulbentel yic'ot trigo bʌ majtañʌl. Jini motomaj mi caj i yʌq'ueñon i tojol i mul jini winic.

³² Che'ʌch yom melol che' an majqui mi' lajmel leco bʌ i tsoy che' mach jasʌlic jini majtañʌl mu' bʌ i yʌc', che'en.

^33-34 Lac Yum tsi' sube Moisés yic'ot Aarón: Che' ochemetixla ya' ti Canaán, ti jini lum mu' bʌ caj cʌq'ueñetla, che' mi cotsʌben i pʌjq'uemal otot,

³⁵ wersa yom mi' tilel i yum jini otot cha'an mi' tsictesʌben jini motomaj. La' i suben: “Tic'ʌl an i pʌjq'uemal cotot”, che'en.

³⁶ Jini motomaj mi caj i yʌc' mandar cha'an mi' jochtesʌntel jini otot, cha'an mi' wen q'uejlel, ame laj bib'ac jini am bʌ ti otot.

^37-38 Mi tsi' q'uele jini motomaj laj pʌjq'uem jini i ñʌc' tac bojte', mi yʌxquich'ʌ quich', mi chʌchʌc tsa' cʌle i pʌjq'uemal ya' ti bojte', mi tsa' tam'a ochel ti bojte', che' jini yom mi' yʌc' ti ñujp'el wucp'ejl q'uin.

^39-40 Che' ti' wucp'ejlel q'uin la' cha' majlic jini motomaj cha'an mi' cha' wen q'uel mi tsa'ix pam pujqui i pʌjq'uemal ya' ti' bojte'lel otot ba' pʌjq'uem. Jini motomaj mi caj i subeñob cha'an mi' jemob i bojte'lel jini otot ba' pʌjq'uem cha'an mi' chocob ti' pat tejclum ba' mi' chojquel misujelʌl.

⁴¹ Che' ja'el yom mi' yʌc' ti jujchintel jini otot ya' ti' mal. Pejtelel i bibi'lel mu' bʌ i loq'uel wersa yom mi' chojquel ti' pat jini tejclum ya' ba' mi' choquel chuqui tac bibi'.

⁴² Yom mi' cha' otsʌntel tac i q'uexol jini xajlel cha'an ts'ʌcʌl mi cha' cʌytʌl. Yom mi' cha' bojñel ti tsijib.

^43-44 Mi tsa' cha' tsictiyi jini i pʌjq'uemal tac ya' ti' mal jini otot wersa mi' cha' ochel i q'uele' jini motomaj. Mi tsa' utsi pʌjq'ui tac, jiñʌch jini leco bʌ i pʌjq'uemal. Bibi'ix jini otot.

⁴⁵ Jini otot wersa mi' caj ti jejmel. Pejtelel i te'el, yic'ot i bojte'lel, yic'ot i jamil tac, yic'ot pejtelel chuqui tac an ya'i, yom mi' laj chojquel loq'uel ti' ti' jini tejclum ya' ba' mi' chojquel chuqui tac bibi'.

⁴⁶ Majqui jach mi' yochel ti jini otot che' ñup'ul cha'an i bibi'lel, bibi' mi' q'uejlel c'ʌlʌl mi' bʌjlel q'uin.

⁴⁷ Majqui jach mi' wʌyel ya' ti otot, o mi tsi' c'uxu waj ya'i, la' i wuts' i pislel.

⁴⁸ Pero che' mi' cha' tilel jini motomaj cha'an mi' wen q'uele', mi ma'anic tsa' wen tsictiyi jini i pʌjq'uemal ya' ti otot che' bʌ cha' ujtemix ti bojñel, awilan jini motomaj mi caj i tsictesan sʌquix ili otot, come tsa'ix jili i pʌjq'uemal.

⁴⁹ Cha'an i sʌq'uesʌntel jini otot, yom cha'cojt x'ujcuts, yic'ot ch'ujte', yic'ot chʌchʌc bʌ chij, yic'ot hisopo.

⁵⁰ Yom mi' tsʌnsʌntel juncojt x'ujcuts ya' ti' mal jini poc' che' an ti yʌx bʌ ja' woli bʌ ti ajñel.

^51-52 Yom mi' ts'ajtʌl jini ch'ujte' yic'ot jini hisopo, yic'ot jini chʌchʌc bʌ chij, yic'ot jini cuxul to bʌ mut ya' ti' ch'ich'el jini mut tsa' bʌ tsʌnsʌnti. Wucyajl yom mi' tsijcʌntel jini otot. Che' jini mi' sʌq'uesʌntel jini otot.

⁵³ Che' ujtemix, yom mi' colel jini cuxul to bʌ mut ya' ti' ti' jini tejclum. Che' jini, mi caj i ñusʌbentel i mul jini otot. Mi caj c cha' q'uel ti sʌc, che'en lac Yum.

^54-56 Jiñʌch la' tic'ol cha'an ti' caj leco bʌ tsoy yic'ot la' pʌjq'uemal tac baqui jach mi' tsictiyel mi ti la' pislel, mi ti la' wotot, mi ti la' pʌchʌlel che' an la' tsoy tac, yic'ot che' an ba' sʌsʌc la' bʌc'tal.

⁵⁷ Che' jini mi lac ña'tan mi jiñʌch leco bʌ tsoy mi la' pʌjq'uemalʌch o mi sʌc. Che'ʌch yom melol, che'en.