Levitico 1 - Chol: I T’an Dios

Jini pulbil bʌ majtañʌl

¹ Lac Yum tsi' pejca Moisés che' bʌ ya'an ti Tabernáculo.

^2-3 Tsi' sube cha'an mi' yʌq'ueñob mandar jini israelob. Tsi' yʌlʌ: Che' mi la' tsʌnsʌbeñon c majtan, yom mi la' c'ʌn alʌc'ʌl tac loq'uem bʌ ti la' wacax yic'ot ti la' tiñʌme'. Mi mux la' wʌq'ueñon wacax, yom mi la' yajcan juncojt i tat bʌ mach bʌ wis anic i c'amʌjel. Yom mi la' pʌy tilel ti' ti' jini Tabernáculo ba' mi caj i ch'ʌmob jini motomajob.

⁴ Jini woli bʌ i yʌq'ueñon wacax, yom mi' c'ʌcchocon i c'ʌb ya' ti' jol jini majtañʌl. Che' jini joñon mi caj c ch'ʌm jini alʌc'ʌl cha'an ti' wenta jini winic. Che' mi' chʌmel jini alʌc'ʌl, ma'anic mi caj i chʌmel jini winic cha'an i mul.

⁵ Jini motomajob i yalobilob Aarón mi caj i tsʌnsañob jini alʌc'ʌl tic tojlel. Mi caj i ch'ʌmob jini ch'ich' cha'an mi' tsijcañob i joytʌlel i pulʌntib jini majtañʌl am bʌ ti' tojel i ti' jini Tabernáculo.

^6-7 Che' jini, jini motomajob mi caj i ts'ulob jini majtañʌl cha'an mi' bic'ti t'ojob. Yom mi' xic'ob jini xutunte' am bʌ ya' ti' pam pulʌntib.

⁸ Mi caj i much'chocobeñob i bʌc'tal jini wacax yic'ot i jol yic'ot i lewil. Yom mi' yʌc'ob ya' ti' pam pulʌntib ya' ba' woli ti lejmel jini c'ajc.

⁹ Jini i yoc yic'ot i soyta' yom mi' pocob ti ja'. Che' jini ti wi'il jini motomajob mi caj i pulob ya' ti' pulʌntib cha'an uts'at bʌ c majtan mu' bʌ c mulan.

¹⁰ Mi tiñʌme', mi chivo jini ofrenda mu' bʌ i yʌq'ueñoñob, che' jini yom i tat bʌ mach bʌ wis anic i chʌmel.

¹¹ Jini mu' bʌ i pʌy tilel mi caj i tsʌnsan tic tojlel ya' ti' t'ejl i pulʌntib ti' tojel norte. Jini motomajob i yalobilob Aarón mi caj i ch'ʌmbeñob i ch'ich'el cha'an mi' tsijcañob i joytʌlel jini pulʌntib.

¹² Che' jini yom mi' bic'ti t'ojtʌl. Jini motomajob mi caj i yʌc'ob jini we'elʌl yic'ot i jol, yic'ot i lewil ya' ti' pam si' am bʌ ti pulʌntib.

¹³ Mi caj i ñaxan pocbeñob ti ja' i soyta' yic'ot i yoc. Che' jini, jini motomajob mi caj i pulob ti' pejtelel, come tijicña mij q'uel pulbil bʌ c majtan.

¹⁴ Majqui yom i yʌc' te'lemut la' i yʌq'ueñon xpuruwoc o mi x'ujcuts cha'an pulbil bʌ c majtan.

^15-17 Jini motomaj mi caj i ch'ʌm majlel jini te'lemut ya' ti pulʌntib. Mi caj i tuc'ben i jol. La' loq'uic i ch'ich'el ya' ti' t'ejl jini pulʌntib. Jini motomaj mi caj i loc'sʌben i chuyib. Mi caj i tujtun ti' tojel jini pulʌntib ba' mi' pasel q'uin ya' ba'an i tʌñʌl c'ajc. Che' jini yom mi' chucben i wich' cha'an mi' tsilben, pero mach yomic mi' bic'ti t'oj. An ti' wenta jini motomaj cha'an mi' pul ya' ti' pam pulʌntib. Tijicña mij q'uel ili majtañʌl.