Lamentaciones 5 - Chol: I T’an Dios

Tsi' c'ajti i p'untʌntel ti oración

¹ Chʌn q'uele chuqui woli cubin lojon, c Yum. Q'uele bajche' woli cʌ'lentel lojon.

² Tsa' ochiyob yaño' bʌ tic lum lojon tsa' bʌ a wʌq'ueyon lojon. Jini ñajt bʌ ch'oyolob tsi' chilbeyon lojon cotot.

³ Tsa' sujtiyon lojon ti meba'. Ma'añobix c tat lojon. Meba' x'ixicob c ña' lojon.

⁴ Che' com lojon ja' wersa mic toj lojon. Letsem i tojol c si' lojon.

⁵ Mi' juch'tec'oñob c yum lojon. Ma'anic mic wis c'aj lojon co. Pejtel ora woliyon lojon ti e'tel.

⁶ Tsaj c'ajtibe pan Egipto. Tsaj c'ajtibe Asiria ja'el.

⁷ Tsi' cha'leyob mulil c tat lojon. Jini cha'an mach chʌn añobix.

⁸ Añon lojon ti' wenta jini mu' bʌ c yuman lojon. Ma'anic majqui mi' yʌc'on lojon ti colel. Bʌbʌq'uen mic tsʌnsʌntel lojon che' mic sʌclan lojon c waj.

⁹ Mi' pʌsbeñoñob espada ya' ti jochol bʌ lum.

¹⁰ Wen ticʌw jax c pʌchʌlel lojon che' bajche' c'ajc. Woliyon lojon ti c'ajc cha'an wi'ñayon lojon.

¹¹ J contrajob tsi' tic'layob x'ixicob ti Sion yic'ot xch'ocob ti Judá.

¹² Tsi' jich'iyob yumʌlob ti' c'ʌbob. Ma'anic tsi' p'untayob jini ñoxobix bʌ.

¹³ Tsi' yʌq'ueyob i cuch ña'tun jini ch'itoñob. Colel i yajlel cha'an woli' cuchob tilel si' cabʌl bʌ i yalel.

¹⁴ Ma'anix mi' chʌn cha'leñob meloñel jini ñoxobix bʌ ti' ti' tejclum. Ma'anix mi' chʌn cha'leñob son yic'ot c'ay jini ch'iton winicob.

¹⁵ Tsa'ix ñumi i yorajlel i tijicñʌyel c pusic'al lojon. Tsac junyajlel cʌyʌ lojon son cha'an uq'uel.

¹⁶ Ma'anix c yumʌntel lojon. Obol lojon c bʌ come tsa'ix c cha'le lojon mulil.

¹⁷ Jini cha'an c'uñix lojon c pusic'al. Ma'anix mi' wen c'otel c wut lojon.

¹⁸ Cabʌl woli' p'ojlelob wax ya' ti wits Sion ba' ma'añobix winicob.

¹⁹ Jatet, c Yum, xuc'ulet ti a buchlib ti pejtelel ora. Ma'anic i jilibal a yumʌntel tic tojlel lojon yic'ot ti' tojlel calobil lojon yic'ot i yalobilob ti pejtelel ora.

²⁰ ¿Chucoch ñajʌyemon lojon a cha'an? ¿Chucoch cʌybilon lojon a cha'an? ¿Mu' ba caj a cʌyon ti pejtelel ora?

²¹ Sutq'uiñon lojon cha'an mic lʌc'tesan lojon c bʌ ba' añet, c Yum. Tsijibtesañon lojon cha'an mic cha' tsajcañet lojon che' bajche' ti ñaxan.

²² ¿Mu' ba caj a junyajlel cʌyon lojon? ¿Mach ba yujilic lajmel a mich'ajel tic tojlel lojon?