Lamentaciones 4 - Chol: I T’an Dios

Sion tsa'ix i tojo i mul

¹ Tsa'ix sujti ti bibi' jini oro. Ma'anix i c'ʌc'al. Pamal an jini xajlel tac ba' jejmenix otot.

² Wen c'uxbibilob i yalobilob Sion che' bajche' oro letsem tac bʌ i tojol, pero ts'a'lebilobix che' bajche' uc'um che' tojp'emix.

³ Jini jontol bʌ ts'i' mi' tsu'san i yal, pero ñumen jontolob jini x'ixicob israelob. Mi' cʌyob i yalobilob che' bajche' mi' cʌy i yal avestruz ya' ti colem bʌ i tiquiñal pañimil.

⁴ Lʌp'ix i yac' alʌlob cha'an tiquin i ti'. Jini alʌlob mi' c'ajtiñob waj, pero ma'anic majqui mi' xut'beñob.

⁵ Ti yambʌ ora ñʌmʌlob ti dulce yic'ot i bʌl i ñʌc', pero wʌle woli' chʌmelob ti wi'ñal ya' ti bij. Ti yambʌ ora wen fino i pislel. Wʌle ñololob ti ta'.

⁶ Ti' caj i mul c pi'ʌlob woli' chʌmelob, come tsa' ñumi ti p'is i mul che' bajche' i mul Sodoma. Tsa' bʌc' jili Sodoma, anquese ma'anic i contrajintel ti winicob.

⁷ Ti yambʌ ora wen i t'ojol jax lac yumob. Sʌsʌc i pislel che' bajche' i ña'al tsʌñal yic'ot lech. Wen c'oc' i bʌc'tal. Chʌchʌc i ch'ich'el che' bajche' rubí. I t'ojol jax che' bajche' zafiro.

⁸ Pero wʌle i'iq'uix i pʌchʌlel che' bajche' buts'. Mach cʌmbilobic i cha'an i pi'ʌlob. Tiquinix i pʌchʌlel, yajyajob. Che'ʌch i bʌquel bajche' te'.

⁹ Tijicñayob jini tsa' bʌ chʌmiyob ti espada. P'ump'uñob jini woliyo' bʌ ti chʌmel ti wi'ñal. C'unte' woli' chʌmelob cha'an ma'anic i bʌl i ñʌc'.

¹⁰ Anquese mi' c'uxbiñob i yalobilob, jini x'ixicob tsi' ch'ʌxʌyob cha'an mi' c'uxob, i wenta i bʌl i ñʌc' che' bʌ tsa' puli jini tejclum.

¹¹ Lac Yum tsi' meleyonla. Cʌlʌx jax i mich'ajel. Tsi' tsuc'u c'ajc ti Sion. Laj jilemix ti c'ajc c'ʌlʌl ti yebal.

¹² Jini reyob ti pañimil ma'anic tsi' ñopoyob. Ma'anic majqui tsi' ñopo anquese wʌn subebilob cha'an talob laj contrajob mu' bʌ caj i jisañob Jerusalén.

¹³ Tsa' jili cha'an ti' caj i mul jini x'alt'añob, ti' caj i jontolil jini motamajob tsa' bʌ i tsʌnsayob jini tojo' bʌ.

¹⁴ Tʌctʌcñayob woli' ñumelob ti bij che' bajche' xpots'ob. Pʌc'bilob ti ch'ich'. Tsi' bib'esayob pejtel chuqui tac tsi' tʌlʌyob.

¹⁵ I pi'ʌlob tsi' subeyob: Cucula, bibi'etla. Cucula, ame la' pʌc'on lojon, che'ob. Tsa' puts'iyob. Tsa' ñumiyob ti pañimil. Ma'anic majqui tsi' pʌyʌyob ti chumtʌl. Mach mi la' wajñel quic'ot lojon, che'ob pejtel winicob.

¹⁶ Lac Yum tsi' pucuyob. Mach uts'atic mi' q'uelob. Ma'anic tsi' c'uxbiyob jini motomajob. Ma'anic tsi' pejcayob jini xñoxo' bʌ ti uts bʌ t'an.

¹⁷ Cuxulon to la, pero c'unix pañimil che' mi lac lon sʌclan laj coltʌntel. Tsa' laj c'ajti ti' tojlel jini mach bʌ yujilic p'untaya.

¹⁸ Tsi' mʌctayonla ti bij ame puts'iconla. Lʌc'ʌlix i yorajlel lac chʌmel. Ma'anix jayp'ejl q'uin. Isujm i yorajlelix mi lac chʌmel.

¹⁹ Tsi' yajñesayonla laj contrajob, ñumen p'is ti ajñel bajche' xiye' ti panchan. Tsi' yajñesayonla ti wits. Tsi' chijtayoñob ti jochol bʌ lum. Tsi' yʌlʌ i jisayonla ti mal lum.

²⁰ Tsi' chocoyob ochel ti tocol bʌ lum jini yajcʌbil bʌ ti Dios. Tsa' la cʌlʌ: Añonla ti' wenta lac Yum. Mux caj lac chumtʌl ti' yebal i wich' che' pujquemonla ti' tojlel jini sajtemo' bʌ, cho'onla.

²¹ Tijicñayetla i yalobiletla Edom ya' ba' chumuletla ti' lumal Uz. Pero mi caj la' wʌq'uentel wocol ja'el. Mi caj i tajetla i mich'ajel Dios.

²² Wʌ' jach jaxʌl mi caj a toj a mul, Sion. Ma'anix mi caj a chʌn pʌjyel majlel ti to'ol e'tel. Wʌle lac Yum mi caj i melet, Edom. Mi caj i tsictesan a mul.