Lamentaciones 3 - Chol: I T’an Dios

An lac pijtaya ti Dios

¹ Joñoñʌch tsa' bʌ j q'uele pejtel jini wocol tsa' bʌ i choco tilel Dios ti' mich'ajel.

² Tsi' pʌyʌyon ochel ba' ic'ch'ipan bʌ pañimil. Tsi' ñup'uyon ba' ma'anic mi ts'ita'ic c'ajc.

³ Isujm tsa'ix sujti tij contra. Woli' yʌc'on ti wocol ti q'uiñil yic'ot ti ac'ʌlel.

⁴ Tsi' jisʌbeyon c p'ʌtʌlel. Ñoxoñix yubil. C'ux c bʌquel.

⁵ Tsi' ñet'eyon ti xajlel yubil. Jini jach wocol yic'ot ch'ijiyem bʌ mi cubin.

⁶ Tsi' yʌc'ʌyon ti ajñel ti mal lum che' bajche' ch'ujlelʌl. I'ic' i mal.

⁷ Tsi' wa'choco ts'ajc tic joytilel. Mach mejlicon ti loq'uel. Tsi' cʌchʌyon ti cadena. Alatax.

⁸ Mic cha'len oñel, mic cha'len uq'uel, pero ma'anic mi' yubin c t'an che' mic pejcan.

⁹ Ñup'ulon ti chan bʌ ts'ajc piyicña bʌ. Mʌctʌbilon ame loq'uicon. Tsi' yʌc'ʌ ti asiyel pañimil tic tojlel.

¹⁰ Lajal mi' pʌs i bʌ tic tojlel che' bajche' oso o mi bajlum mu' bʌ i chijtañon ti mucul.

¹¹ Mi' chucon, mi' tujc'añon majlel ti mate'el yubil. Lojwemon, tsi' cʌyʌyon ba' ma'anic j coltʌntel.

^12-13 Tsi' loco i jalʌjb. Tsi' juluyon. Tam tsi' choco ochel i te'el tic pusic'al.

¹⁴ C pi'ʌlob mi' tse'tañoñob. Leco mi' cha'leñob c'ay. Mi' ñusañob q'uin ti c'ay.

¹⁵ Lac Yum tsi' yʌq'ueyon cabʌl wocol. Wen ch'aj mi cubin. Wen ch'ijiyem c pusic'al cha'an ili wocol chocbebilon tilel i cha'an c Yum.

¹⁶ Wolij c'ux lum yic'ot xajlel yubil. Tsa' c'ʌscuyi i bʌquel quej. Tsi' yʌc'ʌyon ti wutstʌl ti' tʌñil c'ajc.

¹⁷ C Yum, ma'anix i ñʌch'tʌlel c pusic'al. Anix ora tsa' chilbeyon pejtel tijicña bʌ.

¹⁸ Tsa cʌlʌ: Ma'anix c p'ʌtʌlel. Ma'anix j coltʌntel tic Yum, cho'on.

¹⁹ Chʌn ña'tañon wʌ' ba' woliyon ti wocol. Q'uele i ch'ijiyemlel c pusic'al cha'an jini ch'aj bʌ.

²⁰ Mach sajtic tic pusic'al i ña'tʌntel wocol. Jini cha'an mach lajmic i ch'ijiyemlel c pusic'al.

²¹ Pero anto junchajp c pijtaya,

²² come cabʌl i yutslel i pusic'al lac Yum. Jini cha'an cuxulon to la. Ma'anic tsi' laj jisayonla. Xuc'ul lac Yum, mi' chʌn p'untañonla ti pejtelel ora.

²³ Mi' pʌsbeñonla i yutslel ti jujump'ejl sʌc'an. Xuc'ul i pusic'al ti pejtelel ora.

²⁴ Lac Yum jiñʌch c wenlel. Jini cha'an mic chʌn pijtan.

²⁵ Lac Yum uts'at mi' pʌs i bʌ ti' tojlel jini mu' bʌ i pijtañob yic'ot jini mu' bʌ i sʌclañob.

²⁶ Yom mi lac ñop lac Yum. Yom mi lac chʌn pijtan ti' xuc'tilel lac pusic'al jinto mi' coltañonla.

²⁷ Uts'at mi laj cuch wocol che' ch'itoñon to la.

²⁸ Jini woli bʌ ti wocol la' i bajñel cuch. Yom ñʌch'ʌl i pusic'al, come Dios tsi' yʌq'ue i cuch.

²⁹ La' jultesʌbentic i pusic'al. La' i ch'ujutesan i Yum. Tic'ʌl mi mux i lajmel jini wocol.

³⁰ La' i yʌc' i bʌ ti jajts'el. Mach yomic mi' mʌy i wut. La' i cuch che' woli' yʌ'lentel.

³¹ Come mach ti pejtelelic ora mi caj i tʌts' i bʌ lac Yum.

³² Isujm mi' yʌc'onla ti wocol, pero p'isbil jach. Mi caj i pʌsbeñonla i yutslel i pusic'al mach bʌ p'isbilic. Cabʌl jax i c'uxbiya.

³³ Mach tijicñayic i pusic'al che' mi' yʌc'onla ti wocol, che' mi' p'isbeñonla ch'ijiyem bʌ.

^34-36 Mach jinic Dios mu' bʌ i juch'tec' xñujp'elob ti yebal i yoc, mu' bʌ i yʌc' ti contrajintel jini toj bʌ winic che' pʌybil ti meloñel ti' tojlel jini C'ax Ñuc Bʌ. Lac Yum mach uts'atic mi' q'uel che' woli' ts'a'lentel jini toj bʌ ti meloñel.

³⁷ ¿Mach ba p'ʌtʌlic i t'an lac Yum? Che' mi' cha'len t'an mi' bʌc' ujtel che' bajche' tsi' yʌlʌ. Tilem ti' pusic'al lac Yum chuqui mi' yujtel.

³⁸ ¿Mach ba tilemic ti jini C'ax Ñuc Bʌ pejtel ñuc bʌ wocol yic'ot pejtel lac wenlel?

³⁹ ¿Chucoch tilebixel i pusic'al winicob? La' i cha'len uq'uel jujuntiquil cha'an ti' caj i mul.

⁴⁰ La' lac wen q'uel lac bʌ ti jujuntiquilonla mi an lac sajtemal. La' sujticonla ba'an lac Yum.

⁴¹ La' la cʌq'uen Dios lac pusic'al che' mi lac letsan laj c'ʌb ti' tojlel.

⁴² Añʌch lac mul. Tsa' lac ñusʌbe i mandar. Maxto anic tsi' ñusʌbeyonla lac mul.

⁴³ Mich' tsa' pʌsʌ a bʌ che' bʌ tsa' wajñesayon lojon. Tsa' tsʌnsayon lojon. Ma'anic tsa' p'untayon lojon.

⁴⁴ Tsa' mʌcʌ a bʌ ti tocal. Mach ñumic c t'an lojon che' mic ch'ujutesañet lojon.

⁴⁵ Jatet tsa' wʌc'ʌyon lojon ti ts'a'lentel ti' tojlel pejtel winicob. Leco mi' q'ueloñob.

⁴⁶ J contrajob lojon tsi' laj a'leyon lojon.

⁴⁷ Jini cha'an cabʌl mic cha'len lojon bʌq'uen come lu' jilemix c lumal yic'ot c chubʌ'an. Cabʌl mi cubin lojon wocol. Junyajlel jisʌbilon lojon.

⁴⁸ Cabʌl mic cha'len uq'uel. Ach'ix c wut cha'an i ya'lel c wut, cha'an tsa' jiliyob c pi'ʌlob mu' bʌ j c'uxbin.

⁴⁹ Mach yujilic tijq'uel i ya'lel c wut. Ma'anic mij c'aj co,

⁵⁰ jinto mi' q'uelon c Yum am bʌ ti panchan, jinto mi' cha' ña'tañon.

⁵¹ C'ux c pusic'al cha'an i tic'lʌntel pejtel jini xch'ocob ch'oyolo' bʌ tic tejclum.

⁵² Tsi' yajñesayoñob c pi'ʌlob tsa' bʌ i contrajiyoñob. Tsi' ña'tayob i chucon che' bajche' mut.

⁵³ Tsi' chocoyoñob ochel ba' tocol lum. Tsi' juluyoñob ti xajlel.

⁵⁴ Tsa' ñumi ja' ti pam c jol. Tsa cʌlʌ: Mach chʌn colicon, cho'on.

⁵⁵ Ya' ti mal lum tsac pejcayet, c Yum.

⁵⁶ Tsa' wubi c t'an. Mach ma' mʌc a chiquin che' woliyon ti uq'uel.

⁵⁷ Tsa' lʌc'tesa a bʌ ti jim bʌ ora che' bʌ tsac pejcayet. Tsa' wʌlʌ: Mach a cha'len bʌq'uen, che'et.

⁵⁸ Jatet, c Yum, tsa' xin otsa a bʌ che' bʌ tsaj c'ajtibeyet j coltʌntel. Tsa' wʌc'ʌyon ti cha' colel ame chʌmicon.

⁵⁹ Jatet, c Yum, tsa' q'uele c tic'lʌntel. Meleyon ti toj. La' i ña'tañob c pi'ʌlob a winicon.

⁶⁰ Tsa' q'uele che' bʌ tsi' sutq'uibeyoñob jontolil. Tsa' q'uele pejtel chuqui tsi' ña'tayob i mel tij contra.

⁶¹ Jatet c Yum tsa' wubi che' bʌ tsi' wajleyoñob, yic'ot che' bʌ tsi' yʌ'leyoñob.

⁶² C'am tsi' cha'leyob t'an tij contra. Tsi' temeyob i t'an ti mucul c'ʌlʌl tsa' ñumi q'uin.

⁶³ Q'ueleyob ya' ba' buchulob. Q'ueleyob che' mi' ch'ojyelob. Che' mi' cha'leñob c'ay mi' wajleñoñob.

⁶⁴ Jatet, c Yum, mi caj a sutq'uibeñob che' bajche' an i melbalob.

⁶⁵ Mi caj a chilbeñob i ña'tʌbal ame i ch'ʌmbeñob isujm. Mi' cajelob ti p'ajtʌl cha'an tsi' ñusayob a t'an.

⁶⁶ Mi caj a wajñesañob ti cabʌl a mich'ajel. Mi caj a jisañob wʌ' ti pañimil ti' tojel a wut.