Lamentaciones 2 - Chol: I T’an Dios

Tilem ti lac Yum i ch'ijiyemlel Sion

¹ Mʌcʌl ti tocal Sion cha'an mich' lac Yum. Tsi' choco jubel Israel. Tsi' jisʌbe i t'ojlʌwib. Tsi' ts'a'le i t'uchlib i yoc ti' yorajlel i mich'ajel.

² Lac Yum tsi' jisa pejtel chuqui tac c'uxbibil i cha'an Jacob. Ma'anic tsi' wis p'unta. Tsi' jisʌbe i ts'ajquil ba' lon xuc'ul i pusic'al Judá. Tsi' jisʌbe i ñuclel i yumob. Tsi' chocoyob jubel ti lum. Ma'anix i yumʌntel.

³ Lac Yum tsi' laj loc'sayob ti' ye'tel cha'an cʌlʌx jax i mich'ajel. Ma'anic tsi' wis coltayob che' bʌ tsa' tiliyob i contrajob. Tsi' tsuc'u c'ajc ti' yojlil i lumal Jacob. Tsa' pam ñumi ti pañimil.

⁴ Woli' sʌts' i jalʌjb yilal. Wa'alix woli' contrajin Sion. Tsi' yʌc'ʌ ti jisʌntel pejtel chuqui tac uts'atax ti' wut i yalobilob. Cʌlʌx jax i mich'ajel che' bajche' c'ajc.

⁵ Lac Yum i contrajʌch Israel. Tsi' laj jisa yic'ot ñuc bʌ i yotot tac yic'ot i ts'ajquil. Tsi' yʌc'ʌ ti wocol Judá, we'ecña ti uq'uel.

⁶ Lac Yum tsi' jeme i yotot che' bajche' mi lac jem ts'usubil mach bʌ anic i c'ʌjñibal. Tsi' jisa i yajñib ba' tsi' tempayob i bʌ i winicob. Tsi' yʌc'ʌ ti ñajʌyel lac cha'an jini q'uin sábado yic'ot pejtel q'uiñijel. Tsi' ts'a'le jini rey yic'ot jini motomaj. Tsi' loc'sayob ti' ye'tel.

⁷ Tsi' ts'a'le i pulʌntib yic'ot ch'ujul bʌ i yajñib. Tsi' yʌc'ʌ ti jisʌntel jini colem otot tac ti' c'ʌb i contrajob. Tsi' cha'leyob oñel ya' ti' yotot lac Yum che' bajche' ti' yorajlel q'uiñijel.

⁸ Lac Yum tsi' yʌc'ʌ ti jisʌntel i ts'ajquil Sion che' bajche' tsi' wʌn ña'ta ti' pusic'al. Tsi' yotsʌbe i mojonlel tejclum ba' jaxʌl mi' jisʌntel. Jini cha'an tsa' yajli ts'ajc ti' tojlel.

⁹ Ma'anix i c'ʌjñibal i ti' tac tejclum. Jejmenix pejtel i c'ʌclib yic'ot i barate', come lac Yum tsi' jisayob. Majlemobix ti ñajtʌl jini rey yic'ot año' bʌ i ye'tel. Ma'anix majqui mi' chʌn cʌntesañob ti ley. Lac Yum tsi' cʌyʌ i pejcan jini x'alt'añob.

¹⁰ Ñʌch'ʌl jini xñoxob. Buchulob ti lum, lʌpʌl i cha'añob coxtal. Mi' mujlañob i jol ti' ts'ubeñal lum cha'an i ch'ijiyemlel i pusic'al. Jini xch'ocob mi' lijob i jol cha'an quisin.

¹¹ C'unix pañimil mi cubin cha'an cabʌl uq'uel. Chʌquix c wut. Ch'ijiyem c pusic'al. Cabʌl mic mel c pusic'al che' mij q'uel chuqui woli' yujtel tic lumal. Woli' chʌmelob ti bij alʌlob mach bʌ anic i chu'.

¹² Woliyob ti uq'uel jini alʌlob. Mi' chʌn subeñob i ña': Com waj. Com ja', che'ob. Mi' yajlelob ti bij che' bajche' jini jec'bilo' bʌ ti espada. Mi' chʌmelob, meq'uelob i cha'an i ña'.

¹³ ¿Chuqui mi mejlel c subeñetla, c pi'ʌlob ti Jerusalén? ¿Bajche' mi mejlel c ñʌch'tesʌbeñet la' pusic'al? Come cabʌl la' wocol che' bajche' i yonlel colem ñajb. Jisʌbiletla. ¿Majqui mi mejlel i lajmesañetla?

¹⁴ Cabʌl tsi' lotiyetla jini x'alt'añob la' cha'an. Tonto i t'an. Ma'anic tsi' pʌsbeyet la' mul cha'an mi la' sutq'uin la' bʌ. Tsi' cha'leyob lot. Tsi' yʌlʌyob ma'anic mi caj la' pʌjyel majlel ti to'ol e'tel ti' wenta la' contrajob.

¹⁵ Woli' wajleñetla pejtel jini xñumelob: ¿Jim ba i t'ojol jax bʌ tejclum? ¿Jim ba jini tejclum c'uxbibil bʌ i cha'an pejtel pañimil? che'ob.

¹⁶ Mi' wajleñetob la' contrajob. Mi' ts'a'leñetob. Tsa'ix lac jisayob, che'ob. Jal tsa' lac pijta ili q'uin. Tsa'ix juli wʌle. Tsa'ix laj q'uele i jilibal, che'ob.

¹⁷ Pero jiñʌch lac Yum tsa' bʌ i mele Jerusalén che' bajche' tsi' wʌn alʌ. Tsi' ts'ʌctesa i t'an che' bajche' tsi' yʌlʌ wajali. Tsi' chocoyet jubel. Ma'anic tsi' p'untayet. Tsi' colta a contrajob. Jini cha'an chan woli' melob i bʌ ti a tojlel, tijicñayob i pusic'al.

¹⁸ Tsa' cajiyetla ti uq'uel ti' tojlel lac Yum cha'an jejmenix i ts'ajquil Sion. La' loq'uic i ya'lel la' wut ti q'uiñil yic'ot ti ac'ʌlel che' bajche' i ya'lel pa'. Mach mi la' lujb'an ti uq'uel. Mach yomic mi la' cʌy cha'an wʌyel.

¹⁹ Ch'ojyenla ti ac'ʌlel. Pejcanla Dios. Lu' subenla i ch'ijiyemlel la' pusic'al che' bajche' mi' bejq'uel loq'uel ja' ti' yajñib. Letsan la' c'ʌb ti c'ajtiya cha'an mi' p'untan la' walobilob, come woli' chʌmelob ti wi'ñal ti jujump'ejl bij.

²⁰ C Yum, ña'tan ili winicob x'ixicob, come a cha'añobʌch. ¿Yom ba mi' c'uxob i bʌc'tal i yalobilob tsa' bʌ i meq'ueyob? ¿Yom ba mi' chʌmelob motomajob yic'ot x'alt'añob ya' ti' Templo lac Yum?

²¹ Q'ueleyob ya' ba' ñololob ti lum jini ñoxobix bʌ yic'ot ch'iton winicob yic'ot xch'ocob. Laj tsʌnsʌbilob ti espada cha'an i contrajob. Jatet tsa' tsʌnsayob cha'an mich'et, c Yum. Tsa' tsʌnsayob, ma'anic tsa' p'untayob.

²² Tsa' wʌn ña'ta jini q'uin cha'an ma' jisañob. Ma'anic majqui tsa' mejli ti puts'el ti' yorajlel a mich'ajel. Ma'anic majqui tsa' cʌle. Laj chʌmeñobix ya' ti bij jini tsa' bʌ c meq'ueyob tsa' bʌ j cosayob. Tsi' laj jisayob j contra.