Lamentaciones 1 - Chol: I T’an Dios

I ch'ijiyemlel jini xcʌjchelob

¹ Jiñʌch i t'an Jeremías: Ñʌch'ʌlix i bijlel tac Jerusalén ba' motocña winicob x'ixicob ti yambʌ ora. Ch'ijiyem jini tejclum che' bajche' meba' x'ixic che' i bajñel mi' cʌytʌl. Ti yambʌ ora tsa' q'uejli ti ñuc ti pejtelel pañimil. Wʌle ts'a'lebilix che' bajche' xñujp'el.

² Jini tsa' bʌ cʌjchiyob majlel mi' ñusañob ac'ʌlel ti uq'uel. Ma'anic mi' tijq'uel i ya'lel i wut. Ma'anic mi juntiquilic i yaj coltaya ti' tojlel pejtel jini tsa' bʌ i c'uxbiyob ti yambʌ ora. Tsa' laj sujtiyob ti' contra.

³ ¿Chucoch cʌchʌl tsa' pʌjyi majlel Judá ti' wenta i yum am bʌ ti ñajtʌl? Cha'an ti' caj i mul. Tsi' cʌchʌ yaño' bʌ. Tsi' tic'layob. Wʌle majlemix ti ñajtʌl. Che jach meq'uel i c'ʌb. Ma'anic i ñʌch'tilel i pusic'al come añʌchix ti' wenta xtic'layajob.

⁴ Ch'ijiyem pejtel i bijlel Jerusalén. Ma'anix mi' chʌn letselob ti tejclum ti mojt ti mojt cha'an tijicña mi' melob q'uin. Jejmenix i ti'. Ch'ijiyem i pusic'al jini motomajob. Tic'lʌbilob tsa' pʌjyiyob majlel jini xch'ocob.

⁵ Añobix ti' wenta i contrajob. Woli' mʌjlel i cha'añob. Lac Yum woli' jultesʌben i pusic'al Judá cha'an ti' caj cabʌl i mul. Pʌybilob majlel ti to'ol e'tel i yalobilob. Tic'lʌbilob cha'an i contrajob.

⁶ Tsa'ix jili pejtel i ñuclel Sion. Tsa' sujtiyob i yumob che' bajche' me' mach bʌ anic chuqui mi' c'ux. Tsa' jili i p'ʌtʌlel ti' tojel i wut jini woli bʌ i yajñesañob.

⁷ Che' c'unix pañimil cha'an cabʌl xʌmbal, tsi' ña'tayob i ñuclel yic'ot i chubʌ'an am bʌ i cha'an ti Jerusalén che' tijicñayob to. Che' bʌ tsa' bʌc' tili i contra cha'an mi' jisañob, ma'anic majqui tsi' coltayob mi ts'ita'ic. Tsa' cajiyob ti wajleya i contrajob che' bʌ tsi' q'ueleyob ti wocol.

⁸ Jontol jax Jerusalén cha'an i mul. Tsa' sujti ti bibi' ti' wut Dios che' bajche' sajtem bʌ. Ti yambʌ ora jini winicob ti yan tac bʌ lum tsi' c'uxbiyob. Wʌle mi' ts'a'leñob, come pits'ilix. Mi' mʌyob i wut cha'an quisin. Mi' cha'leñob ajcʌn.

⁹ Tsi' cha'leyob ts'i'lel. Ma'anic tsi' p'isiyob ti wenta mi muc'ʌch i tojob i mul. Jini cha'an quisintic jax tsi' meleyob. Wʌle ma'anic i yaj coltaya. Mi' yʌlob: Q'uele bajche' añon lojon c Yum, cha'an cabʌl lojon c wocol, come wen chan mi' melob i bʌ j contrajob, che'ob.

¹⁰ I contrajob tsa'ix i laj chilbeyob i chubʌ'an letsem tac bʌ i tojol. Woli' yochelob ti ch'ujul bʌ a wajñib ba' tsi' tempayob i bʌ a winicob, ba' tic'bil mi' yochel jini mach bʌ judíojic.

¹¹ Pejtel c pi'ʌlob woliyob ti ajcʌn cha'an wi'ñal che' mi' sʌclañob ñumel i bʌl i ñʌc'. Tsi' yʌc'ʌyob i chubʌ'an i q'uexol i waj ame chʌmicob. Q'uele, c Yum. Otsan ti a pusic'al, come p'ump'uñon. Ts'a'lebilon.

¹² ¿Mach ba la' wentajic jatetetla woliyet bʌ la ti ñumel? Q'uele mi an yambʌ woli bʌ i cuch wocol che' bajche' joñon. P'ump'un tsi' meleyon c Yum che' cʌlʌx jax i mich'ajel.

¹³ Ya' ti chan tsi' choco jubel c'ajc cha'an mi' jisañon. Tsi' yʌc'ʌ coc ti yac yubil. Tsi' cha' chocoyon majlel. C'un pañimil che' mi' sʌc'an c'ʌlʌl mi' yic'an. Ma'anix c p'ʌtʌlel.

¹⁴ Cabʌl c mul, tsʌts cʌchʌl tic bic' yubil che' bajche' i te'el wacax. Woli' wit'on c Yum. Tsi' jisʌbeyon c wersa. Tsi' yʌc'ʌyon ti' c'ʌb j contra ba' mach mejlicon ti colel.

¹⁵ Lac Yum tsi' jisʌbeyob i p'ʌtʌlel pejtel jini ch'ejlo' bʌ tic tojlel lojon. Tsi' pʌyʌ tilel jini ñajt bʌ ch'oyolob cha'an mi' jisañob jini ch'iton winicob. Lac Yum tsi' juch'teq'ue Judá che' bajche' mi lac pets'ben loq'uel i ya'lel ts'usub.

¹⁶ Jini cha'an mic cha'len uq'uel. Cabʌl i ya'lel c wut. Ma'anic caj coltaya mu' bʌ i tijicñesan c pusic'al. Meba'obix calobilob yilal. Añobʌch ti' wenta j contrajob.

¹⁷ Sion mi' letsan i c'ʌb ti c'ajtiya, pero ma'anic i yaj coltaya. Lac Yum tsi' cha'le mandar cha'an mi' laj tejchelob ti' contra Jacob. Bibi'ix Jerusalén ti' wutob jini año' bʌ ti' joytʌlel.

¹⁸ Sion woli' yʌl: Toj lac Yum ti pejtelel i melbal, pero an c mul cha'an tsac ñusʌbe i t'an. Ubin c t'an che' jini, pejtel winicob. Q'uele c wocol. Majlemobix ti to'ol e'tel jini calobilob, jini xch'ocob yic'ot ch'itoñob c'uxbibilo' bʌ c cha'an.

¹⁹ Tsaj c'ajtibeyob j coltʌntel jini tsa' bʌ i c'uxbiyoñob, pero tsa' sujtiyob tij contra. Tsa' chʌmiyob ti wi'ñal jini motomajob yic'ot jini xñoxob che' bʌ tsi' sʌclayob ñumel i bʌl i ñʌc' wʌ' ti tejclum, che'en.

²⁰ Q'uele c Yum. Wen ch'ijiyemon. Wocol jax mi cubin tic pusic'al. Wolic mel c pusic'al cha'an cabʌl c mul. Tsac ñusʌbeyet a t'an. Ya' ti bij woli' chʌmelob cabʌlob ti espada. Ti mal otot woli' chʌmelob ti c'amʌjel.

²¹ Ubiñon cha'an woliyon ti ajcʌn. Ma'anic ba' mic taj caj coltaya mi juntiquilic. Tsi' q'ueleyoñob ti wocol j contrajob. Tijicñayob cha'an tsa' wʌc'ʌyon ti wocol. Tsa' mele che' bajche' tsa' wʌn alʌ. La' jilicob ja'el che' bajche' joñon.

²² Q'uele pejtel i jontolil. Melben che' bajche' tsa' melbeyon cha'an ti' caj c mul. Cabʌl woliyon ti ajcʌn, ch'ijiyem c pusic'al.