Juezob 7 - Chol: I T’an Dios

Gedeón tsi' jisa madiañob

¹ Che' ti yijc'ʌlal wen seb to tsa' ch'ojyi Jorobaal, jiñʌch Gedeón, yic'ot pejtelel jini winicob tsa' bʌ pʌjyiyob tilel. Tsa' majliyob c'ʌlʌl ti' loq'uib ja' ya' ti Harod. Ya' añob madiañob ti jini bujtʌl i c'aba' More.

² Lac Yum tsi' sube Gedeón: Ñumenix ti p'is jini soldadojob woli' majlelob a wic'ot. Mach mejlic cʌq'ueñetla la' jisan jini madiañob che' cabʌletla ame che' jini mi cajel i lon chañ'esañob i bʌ jini israelob, ame cajic i yʌlob: “Tic bajñel p'ʌtʌlel tsa' mejli j coltan c bʌ”, ame lon che'ob.

³ Yom ma' subeñob: “Majqui jach an i bʌq'uen ti' pusic'al la' i cʌy ti ora jini wits Galaad”, che'en. Che' jini cabʌl winicob tsa' sujtiyob ti ora, cha'p'ejl i cha'c'al mil (22,000). Tsa' jach cʌleyob lujump'ejl mil winicob.

⁴ Lac Yum tsi' cha' sube Gedeón: Cabʌl to a winicob tsa' bʌ cʌleyob. Pʌyʌyob majlel ya' ti ja' cha'an mic yajcʌbeñet jini weño' bʌ. Jini yajcʌbil bʌ c cha'an, jiñʌch yom bʌ mi' majlel a wic'ot. Pero jini mach bʌ yajcʌbilic c cha'an mach mejlic ti majlel a wic'ot, che'en lac Yum.

⁵ Che' jini tsa' caji ti majlel Gedeón yic'ot pejtelel jini winicob ya' ti ja'. Lac Yum tsi' sube Gedeón: Parte yom ma' wʌc' pejtelel jini mu' bʌ i loch'ob ja' ti' c'ʌb cha'an mi' japob ja' che' bajche' mi' lec' ja' ts'i'. Che' ja'el parte yom ma' wʌc' pejtel jini winicob mu' bʌ i ñoctʌlob ti lum cha'an mi' japob ja'.

⁶ Jo'lujunc'al (300) winicob tsi' loch'oyob ja' ti' c'ʌb cha'an mi' japob. Pejtelel i pi'ʌlob tsa' ñocleyob cha'an mi' japob ja'.

⁷ Lac Yum tsi' sube Gedeón: Mi caj j c'ʌn ili jo'lujunc'al winicob cha'an mic jisan jini madiañob. Jiñobʌch tsa' bʌ i loch'oyob ja' ti' c'ʌb cha'an mi' japob. Mi caj cʌc' ti la' c'ʌb jini madiañob. La'ix sujticob majlel ti' yotot yaño' bʌ winicob, che'en lac Yum.

⁸ Gedeón tsi' ch'ʌmʌ jini uc'um tac yic'ot trompeta tac ti' tojlel winicob. Tsi' cha' choco majlel ili israelob ti' yototob. Cojach tsa' cʌleyob jini jo'lujunc'al winicob. Ya' much'ulob jini madiañob ti joctʌl, ya' ti entʌl.

⁹ Ti jim bʌ ac'ʌlel lac Yum tsi' pejca: Ch'ojyen ti ora. Cucu ya' ba' much'ulob jini madiañob, come tsa'ix cʌc'ʌyob ti a wenta cha'an ma' jisañob.

¹⁰ Mi an a bʌq'uen che' ma' bajñel majlel ti' contra, pʌyʌ jubel Fura jini a waj e'tel, ya' ba' tempʌbilob jini winicob.

¹¹ Ya'i mi caj a wubin chuqui woli' yʌlob. Che' jini mi caj a wutsi p'ʌt'an cha'an ma' contrajiñob. Jini cha'an tsa' jubi majlel yic'ot Fura i yaj e'tel ya' ti' ti' ba' much'ulob jini xcʌntayajob i cha'an Madián.

¹² Awilan ya' much'ulob ti joctʌl cabʌl madiañob yic'ot amalecob, yic'ot jini tilemo' bʌ ti' pasibal q'uin. Lajal i yonlel bajche' sajc'. Ya'an bajc'ʌl camello che' bajche' i yonlel i ji'il colem ja'.

¹³ Che' bʌ tsa' c'oti Gedeón ti lʌc'ʌl, juntiquil winic woli' suben i pi'ʌl chuqui tsi' ñajle: Joñon tsac ñajle junc'ojl waj. Woli' jubel tilel ba' much'quibilonla. Tsa' c'ʌlʌl jubi ti lac tojlel. Tsʌts tsi' cuju jump'ejl pisil bʌ otot. Tsa' ch'a' yajli, che'en.

¹⁴ Yambʌ winic tsi' jac'be: Jiñʌch i p'ʌtʌlel Gedeón (i yalobil Joás ch'oyol bʌ ti Israel). Dios tsa'ix i yʌc'ʌ ti' c'ʌb Gedeón pejtelel jini madiañob cha'an mi' jisañob, che'en.

¹⁵ Gedeón tsi' yubi jini winic che' woli' sub i ñajal yic'ot che' woli' tsictesan i sujmlel. Tsi' ñocchoco i bʌ i ch'ujutesan lac Yum. Che' jini tsa' cha' c'oti ba' tempʌbilob jini israelob. Tsi' subeyob: Ch'ojyenla ti ora, come lac Yum tsa'ix i yʌc'ʌ ti laj c'ʌb pejtelel jini madiañob cha'an mi lac jisañob, che'en Gedeón.

¹⁶ Tsa' caji i mel ti uxmojt jini jo'lujunc'al winicob. Ti jujuntiquil tsi' yʌq'ueyob trompeta yic'ot uc'um ba' woli' lejmel c'ajc ti mal.

¹⁷ Gedeón tsi' subeyob: Yom mi la' wen q'uel bajche' mic mel. Che' ya'ix añon ti junwejl ba' much'ulob, che' mic wus jini trompeta, che'ʌch yom mi' la' mel ja'el.

¹⁸ Temel mi caj c wus jini trompeta joñon yic'ot jini winicob mu' bʌ i majlelob quic'ot. Che' jini yom mi la' wus la' trompeta ya' ti' joytʌlel ba' much'ulob. Yom mi la' pejcan ti c'am bʌ t'an: “I cha'añon lac Yum yic'ot Gedeón”, che'etla. Che' tsi' yʌlʌ Gedeón.

¹⁹ Che' jini tsa' c'oti Gedeón yic'ot jini jo'c'al winicob ya' ti junwejl ba' much'ulob jini madiañob. Woli' q'uextañob i bʌ jini xcʌntayajob che' ti' yojlil ac'ʌlel. Che' jini tsa' caji i wusob jini trompeta tac. Tsi' top'oyob jini uc'um tsa' bʌ i ch'ʌmʌyob majlel.

²⁰ Jini uxmojt soldadojob tsi' wusuyob trompeta. Tsi' top'oyob i yuc'um. Ti ts'ej bʌ i c'ʌbob tsi' cha' ch'ʌmʌyob jini nich c'ajc. Ya' ti ñoj bʌ i c'ʌbob tsi' chucuyob majlel trompeta woli bʌ i wusob. Tsi' cha'leyob oñel: I yespada lac Yum am bʌ ti' wenta Gedeón, che'ob.

²¹ Che' jini ti jujuntiquil tsa' wa'leyob ti' joytʌlel ba' much'ul jini winicob. Jini madiañob tsa' loq'uiyob ti oñel cha'an mi' puts'elob.

²² Che' bʌ tsi' wusuyob trompeta jini jo'lujunc'al israelob, lac Yum tsi' yʌq'ue madiañob i wʌlʌc tsʌnsañob i bʌ ti' tojlel i pi'ʌlob ya' ba' tempʌbilob. Jini soldadojob tsa' puts'iyob majlel ti Betsita, ya' ti' tojel Zerera, yic'ot c'ʌlʌl ba' jaxʌl i lumal Abelmehola ti Tabat.

²³ Tsa' pʌjyiyob tilel pejtelel israelob loq'uemo' bʌ ti Neftalí, yic'ot ti Aser, yic'ot ti pejtelel Manasés. Tsa' caji i yajñesañob majlel jini madiañob.

²⁴ Gedeón tsi' choco majlel suboñel ti' tojlel pejtelel jini chumulo' bʌ ti wits i c'aba' Efraín. Tsi' subeyob: La'la cha'an mi la' mʌctan jini madiañob ya' ba' mi' c'axelob ti Jordán ja' c'ʌlʌl ti Bet-bara, che'en. Che' jini pejtelel jini winicob ti Efraín tsa' pʌjyiyob tilel. Tsi' mʌctayob jini c'axib ja' am bʌ ti Jordán c'ʌlʌl ti Betbara.

²⁵ Che' jini tsi' chucuyob cha'tiquil i reyob jini madiañob, Oreb yic'ot Zeeb. Tsi' tsʌnsayob Oreb ya' ti xajlel i c'aba' Oreb. Jini Zeeb tsa' tsʌnsʌnti ya' baqui mi' chajpañob i ya'lel ts'usub i c'aba' Zeeb. Tsi' yajñesayob majlel jini madiañob. Wi'ilix tsi' wox cuchbeyob tilel i jol Oreb yic'ot Zeeb ti' tojlel Gedeón ti junwejl jini Jordán.