Juezob 4 - Chol: I T’an Dios

Débora yic'ot Barac tsi' jisayob Sísara

¹ Che' bʌ tsa' chʌmi Aod, jini israelob tsa' caji i cha' melob chuqui jontol ti' wut lac Yum.

² Jini cha'an lac Yum tsi' yʌc'ʌyob ti' wenta Jabín jini rey ti Canaán tsa' bʌ i mele i ye'tel ya' ti Hazor. I yum soldadojob ti Canaán jiñʌch Sísara tsa' bʌ chumle ti Harosetgoim.

³ An i cha'an jini rey Jabín jo'c'al i yuxbajc' (900) carreta tac melbil bʌ ti tsucul taq'uin. Junc'alix jab woli' yubiñob wocol jini israelob. Jini cha'an c'am tsa' caji i pejcañob lac Yum.

⁴ Jini yumʌl ti Israel ti jim bʌ ora jiñʌch Débora, jini x'ixic bʌ x'alt'an, i yijñam bʌ Lapidot.

⁵ Chumul ti yebal palma am bʌ ti yojlil Ramá yic'ot Betel ti wits i c'aba' Efraín. Jini israelob tsa' tiliyob ba'an Débora cha'an mi' toj'esʌntelob.

⁶ Débora tsi' choco ti pʌyol Barac i yalobil Abinoam am bʌ ti Cedes ti Neftalí. Tsi' sube: Lac Yum, i Dios Israel, woli' subeñet: “Tempan a winicob ya' ti wits i c'aba' Tabor. Tempan lujump'ejl mil winicob i p'olbal Neftalí yic'ot i p'olbal Zabulón.

⁷ Joñon mi caj c pʌybeñet tilel Sísara, i yum i soldadojob Jabín, yic'ot pejtelel i carreta tac, yic'ot i winicob ya' ti pa' Cisón. Mi caj cʌc'ob ti' a wenta”, che'en lac Yum. Che' tsi' yʌlʌ Débora.

⁸ Barac tsi' jac'ʌ: Mi muc'ʌch a majlel quic'ot, mu' cu c majlel. Mi ma'anic ma' majlel, ma'anic mic majlel, che'en.

⁹ Débora tsi' jac'ʌ: Mu' cu c majlel a wic'ot, pero yambʌ mi caj i q'uejlel ti ñuc che' mi' mʌjlel lac cha'an. Come lac Yum woli' yʌc' Sísara ti' c'ʌb x'ixic, che'en. Tsa' majli Débora yic'ot Barac che' bʌ tsa' sujti ti Cedes.

¹⁰ Barac tsi' tempa majlel lujump'ejl mil winicob i p'olbal Zabulón yic'ot Neftalí. Débora tsa' majli yic'otob.

¹¹ Heber, jini ceneo, tsi' tʌts'ʌ i bʌ ti' tojlel yambʌ ceneojob i p'olbalob Hobab i nij'al Moisés. Tsa' majli i wa'chocon jini pisil bʌ i yotot ya' ti Zaanaim am bʌ ti t'ejl Cedes.

¹² Tsa' subenti Sísara majlemix Barac (i yalobil Abinoam) ti' witsilel Tabor.

¹³ Sísara tsi' tempa pejtelel i carreta tac. An jo'c'al i yuxbajc' (900) i carreta melbil bʌ ti tsucu taq'uin yic'ot pejtelel i winicob loq'uemo' bʌ ti Harosetgoim. Tsa' c'otiyob ti jini pa' am bʌ ti Cisón.

¹⁴ Débora tsi' sube Barac: Ch'ojyen come ti ili q'uin lac Yum mi caj i yʌc' ti a c'ʌb jini Sísara. ¿Mach ba wolic i majlel lac Yum ti ñaxan ti' tojel a wut? che'en. Barac tsa' jubi ya' ti' wits Tabor yic'ot lujump'ejl mil winicob.

¹⁵ Lac Yum tsi' bʌc'tesa majlel Sísara yic'ot i carro tac, yic'ot pejtelel i winicob. Sísara tsi' cʌyʌ i carreta. Tsa' puts'i.

¹⁶ Barac tsi' tsajca majlel jini carreta tac yic'ot soldadojob c'ʌlʌl ti Aroset-goim. Pejtelel i winicob Sísara tsa' tsʌnsʌntiyob. Ma'anic tsa' cʌle mi juntiquilic.

¹⁷ Sísara tsa' majli ti ajñel ti pisil bʌ i yotot Jael i yijñam Heber jini ceneo, come ma'anic guerra ti' tojlel Jabin i rey Hazor yic'ot Heber.

¹⁸ Che' bʌ tsi' q'uele Jael ya'ix tilel Sísara, tsi' sube: La' ti cotot. Mach a cha'len bʌq'uen, che'en. Tsa' tili. Tsa' ochi ti' yotot. Jael tsi' moso yic'ot pisil.

¹⁹ Sísara tsi' yʌlʌ: Awocolic aq'ueñon ts'ita' ja' cha'an mic jap, come tiquin c ti', che'en. Jini Jael tsi' jamʌ i yajñib leche. Tsi' yʌq'ue cha'an mi' jap. Ti wi'il tsi' cha' moso.

²⁰ Sísara tsi' sube: Wa'i ti' ti' otot. Mi an majch mi' tilel, mi tsi' c'ajti: “¿Am ba majch tsa' ochi ilayi?” mi che'en, suben: “Ma'anic”, che'en Sísara.

²¹ Jael i yijñam Heber tsi' ch'ʌmʌ jay bʌ i ni' te' yic'ot martillo. Che' wen wʌyʌl Sísara tsi' sʌl jec'be jini te' ti' pam c'ʌlʌl tsa' sojli ti lum. Ma'anic tsi' cha' cañʌ i wut. Tsa' chʌmi.

²² Barac woli to i tsajcan majlel Sísara. Tsa' c'oti ya' ba'an Jael. Jael tsi' sube: La', mi caj c pʌsbeñet jini winic woli bʌ a sʌclan, che'en. Tsa' ochi. Tsi' q'uele ya'an Sísara chʌmenix yic'ot i ni' te' ti' pam.

²³ Che' jini lac Yum tsi' peq'uesa Jabín, rey ti Canaán, ti' tojlel israelob.

²⁴ I p'ʌtʌlel jini israelob tsa' p'ojli ti' contra Jabín jini rey ti Canaán c'ʌlʌl jinto tsi' jisayob.